Ciapier rasijskija ŭłady abmiarkoŭvajuć, jak dać biełaruskim NPZ dempfier, bo biez hetych vypłat pastaŭki ŭ RF buduć dla ich stratnymi. Kali dempfier raspaŭsiudzicca na ŭvieś abjom raniejšaha ekspartu Biełarusi va Ukrainu, abjom padtrymki moža skłaści bolš za 60 młrd rasijskich rubloŭ za hod.
Minenierha i Minfin RF aktyŭna abmiarkoŭvajuć impart bienzinu i dyzpaliva ź Biełarusi, raspaviadajuć niekalki krynic «Kommiersanta» ŭ halinie. Pa słovach dźviuch krynic vydańnia, Rasija vyrašyła pašyryć pastaŭki ź Biełarusi va ŭmovach prablem biełaruskich NPZ sa zbytam, jakija abvastrylisia paśla spynieńnia ekspartu paliva va Ukrainu na fonie viadzieńnia RF bajavych dziejańniaŭ u hetaj krainie.
Hałoŭnaja meta mier — padtrymka biełaruskaj naftapierapracoŭki i dachodaŭ biudžetu krainy va ŭmovach sankcyj, kažuć krynicy «Kommiersanta». Pavodle źviestak Argus, Biełaruś zabiaśpiečvała 45% sukupnaha impartu bienzinu na Ukrainu i 37% impartu dyzpaliva — 1,04 młn ton i 2,97 młn ton adpaviedna.
Prablema składajecca ŭ tym, što rasijskija NPZ atrymlivajuć istotnyja subsidyi za pastaŭki paliva na ŭnutrany rynak — tak zvany dempfier, a biełaruskija NPZ ciapier nie majuć prava jaho atrymać.
Pastaŭki ŭ RF biez dempfiera buduć dla biełaruskich NPZ stratnyja, tamu ciapier takija apieracyi amal nie pravodziacca.
Rasijskija ŭłady ŭ hety momant abmiarkoŭvajuć, jak možna było b vypłačvać dempfier biełaruskim zavodam, pakul pastanovy niama. U Minenierha Biełarusi pieraadrasavali pytańni ŭ «Biełnaftachim», dzie ad kamientaryjaŭ admovilisia. U Minfinie RF pastupili hetak ža. U Minenierha nie adkazali.
Pa słovach adnaho z surazmoŭcaŭ «Kommiersanta», Minfin moža padrychtavać źmieny ŭ Padatkovy kodeks, nie ŭdakładniajučy, jaki miechanizm vypłat budzie vykarystany. Na dumku surazmoŭcaŭ «Kommiersanta», moža być vyvučany varyjant atrymańnia dempfiera Biełaruśsiu z dapamohaj trejdynhavych kampanij, zarehistravanych u RF. Ciapier «Biełnaftachim» pastaŭlaje pradukcyju ŭ RF praz rasijskaje TAA «Biełnaftachim-ROS». Ale, na dumku jurystaŭ, mahčymyja roznyja varyjanty.
Tak, kiraŭnik dyrekcyi jurfirmy Vegas Lex Kirył Nikicin ličyć bolš vierahodnym zaklučeńnie miždziaržaŭnaha pahadnieńnia ź Biełaruśsiu albo pryniaćcie adpaviednych narmatyŭna-pravavych aktaŭ na ŭzroŭni prezidenta abo ŭrada. Jon nahadvaje, što raniej pamiž Maskvoj i Minskam było dasiahnutaje pahadnieńnie ab kampiensacyi biełaruskamu boku strat u suviazi z padatkovym manieŭram u naftavaj halinie RF za košt źnižeńnia premij da koštu nafty, jakuju pastaŭlali ŭ Biełaruś rasijskija naftakampanii.
U apošnija hady pastaŭki paliva ŭ Rasiju ź Biełarusi byli minimalnyja.
Vyklučeńnie skłaŭ tolki 2020 hod, adznačaje Maryja Arje z «Pietramarkieta»: tady ŭ Rasii dempfier prymaŭ admoŭnyja značeńni (naftakampanii pavinny byli płacić u biudžet), ale biełaruskich NPZ heta nie tyčyłasia, što dazvoliła im u 20 razoŭ naraścić ekspart bienzinu ŭ Rasiju (da 152,1 tys.ton) i adnavić pastaŭki dyzpaliva (179,4 tys. ton).
