Лідар руху «За Свабоду» Аляксандр Мілінкевіч мяркуе, што 19 снежня людзі павінны выказаць сваё стаўленне да выбараў прэзідэнта і маюць на гэта права. «У нас Канстытуцыяй прадугледжана права на мірныя дэманстрацыі, акцыі пратэсту»,
— заявіў лідар руху «За Свабоду» журналістам 13 кастрычніка ў Брэсце.
«Я за плошчу 19 снежня, але толькі мірную. Гэта мая абавязковая ўмова. Калі пральецца кроў, гэта каласальная адказнасць палітыкаў. І людзі асудзяць нас. Усё роўна, хто там пачне», — падкрэсліў Мілінкевіч.
Паводле яго слоў,
на мінулых прэзідэнцкіх выбарах, паводле ацэнак КДБ, на плошчу выйшла 34 тыс. чалавек.
«Я лічу, гэта шмат, таму што татальны страх у краіне, — дапоўніў Мілінкевіч. — Колькі людзей прыйдзе на плошчу сёлета, не хачу загадваць. Я хачу, каб іх было больш».
Як адзначыў палітык, пратэстныя настроі ў грамадзян узраслі. «Людзі жадаюць жыць годна, жыць у дэмакратычнай краіне, каб іх галасы на выбарах не падменьвалі, а ўлічвалі. Толькі не ведаю, ці гатовыя яны выйсці на вуліцу, таму што страх у людзей застаўся. Нават калі прапаноўваем вылучацца ў выбарчыя камісіі, людзі баяцца таго, што будуць правяраць уладу», — падкрэсліў Мілінкевіч.
На яго думку, для таго
каб больш людзей прыйшло на плошчу 19 снежня, неабходны «мабілізацыйны фактар, а менавіта, аб’яднанне апазіцыі».
13 кастрычніка ў Брэсце Мілінкевіч удзельнічаў у двух пікетах па зборы подпісаў за вылучэнне кандыдатам на пасаду прэзідэнта ад Партыі БНФ Рыгора Кастусёва. Гэта яго першы ўдзел у такіх акцыях у рэгіёнах Беларусі.