Фота: akorda.kz
У Казахстане распушчаная ніжняя палата (мажыліс) парламента Казахстана і дэпутаты ўсіх рэгіянальных масліхатаў. Пра гэта гаворыцца ва ўказе, які апублікаваны на сайце прэзідэнта Казахстана Касым-Жамарта Такаева.
«Прызначыць пазачарговыя выбары дэпутатаў Мажыліса на 19 сакавіка 2023 года. <…> Указ ўводзіцца ў дзеянне з дня апублікавання», — гаворыцца ў дакуменце.
Дату выбараў дэпутатаў мясцовых саветаў вызначыць ЦВК краіны.
У спецыяльнай заяве Такаеў выказаў надзею, што абноўленыя склады дэпутатаў працягнуць працаваць у такім жа фармаце і «нададуць новы імпульс» усебаковай мадэрнізацыі краіны.
«Правядзенне пазачарговых выбараў у мажыліс і масліхаты прадыктавана логікай канстытуцыйнай рэформы, падтрыманай грамадзянамі на агульнанацыянальным рэферэндуме. Па яе выніках наша краіна перайшла на новыя, больш справядлівыя і канкурэнтныя правілы фарміравання прадстаўнічай галіны ўлады», — сказана ў заяве Такаева.
Паводле заявы казахстанскага прэзідэнта, цяпер 70% дэпутатаў Мажыліса будуць абірацца па партыйных спісах, а 30% — па аднамандатных акругах. Выбары ў масліхаты абласцей і гарадоў рэспубліканскага значэння пройдуць па змешанай выбарчай сістэме, у суадносінах 50 на 50, а на выбарах у масліхаты раёнаў і гарадоў абласнога значэння выбаршчыкі будуць галасаваць толькі за кандыдатаў па аднамандатных акругах. Такая сістэма, заявіў Такаеў, дазволіць абараніць інтарэсы выбаршчыкаў як на агульнанацыянальным, так і на рэгіянальным узроўні, забяспечыць «шырокую палітру поглядаў у прадстаўнічых органах улады» і створыць спрыяльныя ўмовы для далейшага развіцця грамадзянскай супольнасці.
