Dla 80% biełarusaŭ hałoŭnym pry vybary lekaŭ źjaŭlajecca ich cana 3

Jak śviedčać vyniki daśledavańnia, praviedzienaha śpiecyjalistami Biełaruskaha dziaržaŭnaha ŭniviersiteta i Dziaržaŭnaha instytuta kiravańnia i sacyjalnych technałohij BDU, vyznačalnym faktaram pry vybary lekaŭ biełarusami źjaŭlajecca ich cana: 80,5% respandentaŭ adznačyli važnaść koštu lakarstva. Na druhoj rejtynhavaj pazicyi akazałasia kraina-vytvorca lekavaha srodku (69,8%).

Firmu-vytvorcu ŭ jakaści važnaha kryteryju nazvali 53,8% apytanych. Pry hetym leki impartnaj vytvorčaści karystajucca ŭ nasielnictva bolšym davieram. Pry inšych roŭnych umovach 52,3% apytanych addali b pieravahu impartnamu preparatu, 32,8% paviedamili, što vybrali b ajčynny i 14,9% nie zmahli adkazać na hetaje pytańnie.

Svoj vybar na karyść impartnaha lakarstva respandenty patłumačyli ŭpeŭnienaściu ŭ ich bolšaj efiektyŭnaści i jakaści, mienšaj kolkaści pabočnych efiektaŭ, adsutnaści padrobak i lepšymi technałohijami vytvorčaści.

Prychilniki ž biełaruskich lekaŭ spasłalisia na imknieńnie padtrymać ajčynnych vytvorcaŭ, bolš nizkuju canu i davier tolki da ajčynnych vytvorcaŭ. Pry hetym vyjaviŭsia šerah cikavych tendencyj. Čym vyšejšy ŭzrovień adukacyi, tym čaściej respandenty schilnyja rabić vybar na karyść impartnaha lakarstva. A voś čym starejšyja respandenty, tym čaściej jany vybirajuć biełaruskija leki.

Cikava, što pry ŭmovie adnolkavaj cany impartnaje lakarstva vybieruć 60,2% respandentaŭ. I tolki pry ŭmovie istotnaj roźnicy ŭ canie ajčynny preparat kupiać 55,5% respandentaŭ. Pry adkazie na pytańnie: «Ci zaležyć efiektyŭnaść lekavaha srodku ad jaho cany?» — aŭdytoryja padzialiłasia amal papałam: 46,1% respandentaŭ adkazali, što efiektyŭnaść lakarstva čaściej za ŭsio nie zaležyć ad jaho cany, a 41,1% ličać, što čym daražejšaje lakarstva, tym vyšejšaja jaho efiektyŭnaść.

Pavodle Źviazdy

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH