Ministerstva achovy zdaroŭja Biełarusi pastanovaj numar 15 zaćvierdziła abnoŭleny pieralik lekavych srodkaŭ, jakija realizujucca biez recepta.
Abnoŭleny pieralik pradstaŭleny 964 namienkłaturnymi pazicyjami, što adpaviadaje bolš jak 2 tys. nazvaŭ lekaŭ. Prykładna stolki ž było i ŭ papiarednim biezrecepturnym śpisie. Usiaho ŭ Biełarusi na hety momant zarehistravana amal 6 tys. nazvaŭ. Siarod ich jość narkatyčnyja i psichatropnyja, preparaty śpisa A, jakija majuć taksičnaje dziejańnie na arhanizm, a taksama inšyja lakarstvy, bieskantrolnaje prymianieńnie jakich vyklikaje značnyja pabočnyja reakcyi, raskazali ŭ Ministerstvie achovy zdaroŭja.
Što datyčyć lakarstvaŭ, što adpuskajucca ŭ aptekach biez recepta, to jany pryznačany dla adkaznaha samastojnaha lačeńnia i akazańnia pieršaj miedycynskaj dapamohi. "Kali pacyjent prymianiaje hetyja srodki ŭ terapieŭtyčnych dozach, nazvanych na ŭpakoŭcy i ŭ instrukcyi pa prymianieńniu, to jany nie vyklikajuć ryzyki raźvićcia ŭskładnieńniaŭ, pabočnych dziejańniaŭ", - adznačyli ŭ pres-słužbie ministerstva. Jość jašče šerah umoŭ, pry vykanańni jakich lakarstvy pry rehistracyi zaličvajuć u biezrecepturny pieralik. Heta adsutnaść patencyjalna niebiaśpiečnych kambinacyj ź inšymi preparatami, prostaja schiema pryjomu, najaŭnaść dziciačych dazirovak i mnohija inšyja.
Adnak absalutna biasškodnych lakarstvaŭ niama, tamu pry vybary preparata ź biezrecepturnaha pieraliku treba źviarnucca pa kansultacyju da pravizara. U aptecy rastłumačać, pry jakich simptomach možna pramianiać lakarstvy, pryznačanyja dla samadapamohi i samaprafiłaktyki, a pry jakich nieabchodna iści da ŭrača, padkreślili ŭ pres-słužbie.
Jak paviedamlałasia raniej, z 1 lipienia 2012 hoda Ministerstva achovy zdaroŭja ŭzmocnić kantrol za vypisvańniem receptaŭ i vodpuskam lakarstvaŭ z aptek. Nabyvać preparaty, jakija ŭ pieralik svabodnych da prodažu nie ŭvachodziać, z hetaha času možna budzie tolki pa receptu doktara.
