Najlepšaja ideja abjekta ŭ adkrytaj prastory Minska — lustrany pakoj «Kalidor viečnaści»

Pieramožcy konkursu «Art-horad» na najlepšuju ideju abjekta ŭ adkrytaj prastory Minska ŭznaharodžany 18 žniŭnia ŭ Instytucie imia Hiote.

Konkurs tvoraŭ mastactva ŭ haradskim asiarodździ — adzin z etapaŭ prajekta instytuta ŭ krainach Uschodniaj Jeŭropy i Centralnaj Azii, jaki pryśviečany mastactvu ŭ publičnaj prastory. Etap pravodziŭsia ŭ Minsku, Novasibirsku, Uljanaŭsku, Taškiencie, Tbilisi, Jerevanie, Ałmaty.

Udzielnikam było prapanavana stvaryć aryhinalnuju art-instalacyju, jakaja, pavodle ich mierkavańnia, mahła b raźmiaścicca ŭ parku Simona Balivara ŭ Minsku.

Usiaho ŭ biełaruskim konkursnym etapie ŭziali ŭdzieł 10 rabot 14 mastakoŭ.

Favarytam konkursu pryznany małady mastak Aleś Kudrašoŭ ź instalacyjaj u vyhladzie lustranoha pakoja «Kalidor viečnaści», jakaja rassypajecca.

U jakaści pryzu arhanizatary zabiaśpiečać aŭtaru pajezdku ŭ Bierlin u vieraśni hetaha hoda. Druhoje miesca zaniaŭ Andrej Busieł ź instalacyjaj z kvietak słaniečnika, jaho ŭznaharoda — siemiestravy kurs vyvučeńnia niamieckaj movy ŭ instytucie. Treciaje miesca dastałasia mastačcy Natalli Paharanskaj.

Jak paviedamiŭ Aleś Kudrašoŭ, raźmiaščeńnie lusterkaŭ na jaho art-instalacyi daje adčuvańnie biaskoncaj prastory. «Lusterki — heta materyjał, jaki mianie zachaplaje, jon mnie cikavy. U historyi čałaviectva jon ihraje vielmi cikavuju rolu. U sintaiźmie lusterka — heta adzinaja kultavaja reč, u biełaruskaj kultury jano taksama ihraje nie apošniuju rolu, roŭna jak i ŭ mifałohii», — rastłumačyŭ aŭtar pieramožnaj kampazicyi.

«Važna, kab hladač znachodziŭsia ŭnutry hetaha pakoja, tamu što biaskoncaje adlustravańnie biez hledača biessensoŭna, jano budzie žyć svaim asobnym žyćciom, — skazaŭ Kudrašoŭ. — Heta matryca, jakaja mahła b zapisvać dziejańni ludziej. Čałaviek zojdzie tudy i pakinie niejkuju reakcyju, nie vyklučana, što, naprykład, učynić akt vandalizmu. Hetyja reakcyi ja pasprabavaŭ pradbačyć i apisaŭ u svajoj pracy».

Arhanizatary płanujuć prapanavać Minharvykankamu ŭstanavić pracu Kudrašova ŭ parku Symona Balivara ŭ 2012 hodzie. Kali haradskija ŭłady padtrymajuć ideju, finansavańnie prajekta instalacyi instytut voźmie na siabie.

Jak adznačyŭ načalnik upraŭleńnia dobraŭparadkavańnia i haradskoha dyzajnu kamiteta architektury i horadabudaŭnictva Minharvykankama Alaksandr Andrončyk, jon nie bačyć pryčyn, z-za jakich možna było b admović u realizacyi hetaha prajekta. Čynoŭnik adznačyŭ, što ŭ krajnim vypadku «Kalidor viečnaści» haradskija ŭłady mohuć ustanavić časova.

U Instytucie imia Hiote z 18 žniŭnia pa 18 vieraśnia budzie pracavać vystava eskizaŭ rabot udzielnikaŭ konkursu.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH