Za minuły hod u krainie vydadziena 1322 patenty na vynachodnictvy. Pra heta «NN» paviedamili ŭ Nacyjanalnym centry intelektualnaj ułasnaści.
A vynachodniki z Bresckaha techničnaha ŭniviersiteta raspracavali robata-achoŭnika, jaki moža «rabić manitorynh pamiaškańniaŭ i spyniać niesankcyjanavanaje praniknieńnie», fota BiełTA
Bolšaść vynachodnictvaŭ, prapanavanych racyjanalizatarami i navukoŭcami, — vuzkaprofilnyja.
Nieśpiecyjalist i nie skiemić adrazu, navošta, naprykład, moža spatrebicca «pryłada dla ačystki płazmy duhavoha vyparalnika ad niezaradžanych makračaścic» albo «sposab madelavańnia traŭmatyčnaha nieŭrytu nižniealviealarnaha nierva ŭ trusa ŭ ekśpierymiencie».
Ale siarod patentaŭ traplajucca i, što nazyvajecca, ahulnaŭžyvalnyja. «NN» robić mini-ekskursiju pa samych zapaminalnych ajčynnych vynachodnictvach za 2010 hod.
Fitnes-rovar
«Navošta vynachodzić rovar?» — z takim pytańniem, vidać, u dziacinstvie čaściakom źviartalisia da Alaksandra Siniły. Nasupierak mierkavańniam skieptykaŭ jon stvaryŭ svoj rovar, jaki nazyvaje «akademičnym».
Aŭtar ščyra pryznajecca, što jamu viadomyja anałahi jaho vynachodnictva. Ale isnuje pryncypovaje adroźnieńnie: ruchomaje siadło, što sovajecca ŭzdoŭž ramy. Heta dazvalaje napružvać nie tolki myšcy noh, ale ruki, śpinu i navat brušny pres. Vynachodnik padrabiazna apisvaje čatyry fazy, u jakich napieramienku vykarystoŭvajecca kožnaja častka cieła. Zastajecca tolki adno pytańnie: ci nie pieratvorycca «ruch siadła napierad z paskareńniem» padčas rezkaha tarmažeńnia ŭ bieskantrolny palot papieradzie dvuchkołavaha siabra?
Jak schavać chvoi ad łasia
Instytut lesu NAN vystupiŭ z racyjanalizatarskaj prahramaj «Antyłoś». Reč u tym, što łasi nadta lubiać abjadać maładyja chvojki. Tamu leśniki vysadžvajuć kala drevaŭ naturalnuju pieraškodu — kalučyja kusty, adnak tyja nie majuć vialikaj haspadarčaj kaštoŭnaści.
Kalektyŭ navukoŭcaŭ prapanuje vakoł chvojaŭ sadžać jaliny. Ale nie aby-jakija! Pa-pieršaje, jany musiać być na try hady starejšyja za chvoi. Druhaja parada tyčycca praviłaŭ pasadki: jaliny treba vysadžvać dvuma šerahami pa ŭsim pierymietry sasońniku z krokam 0,7 m.
Kunavinskija treniroŭki
Patent možna atrymać, navat kali vynajdzieš novaje fizičnaje praktykavańnie. Jak Viktar Kunavin, jaki prafiesijna zajmajecca ich raspracoŭkaj. Praŭda, kab vykanać takoje, treba papacieć. Voś, naprykład, praktykavańnie, što palapšaje ruchomaść tazaściehnavych sustavaŭ. Prymicie zychodnaje pałažeńnie: siadźcie na padłohu pamiž padahnutymi ŭ kaleniach nahami, pryčym cieła, šyja i hałava pavinny skłaści viertykalnuju liniju, a ruki lažać na ściohnach. Paśla treba zrabić udych, sahnucca napierad i, abchapiŭšy halonki, apuścić korpus cieła da dotyku hrudźmi padłohi. Varta pačakać da źjaŭleńnia bolevych adčuvańniaŭ — i viarnucca ŭ zychodny stan. I ŭśviadomić: aby za što patent nie dajuć.
Biełaruskaja narodnaja hulnia
Alaksandr Dranicki vyrašyŭ kinuć boj zamiežnaj «Manapolii». Aŭtar zaŭvažaje, što jana zaskładanaja dla małych dziaciej, i prapanuje svaju nastolnuju hulniu. Jakaja, vidać, zadumlałasia jak nadzvyčaj prostaja... Cytata ź instrukcyi: «Naprykład, «4a. 9t» aznačaje, što kartka vyniata sa stosika raskładu i pakładzienaja ŭ siektary 2 u stosik kartak typu T, pryčym indeks «a» aznačaje, što adbyłosia pieršaje paśla pierakładki za numaram vyniaćcie čarhovaj hulniavoj kartki». Hulnia pakul što nie pastupiła ŭ pramysłovuju vytvorčaść, tamu amatary jašče nie mohuć vykładać kartki ŭ pravilnym paradku.
Inšyja karysnyja vynachodnictvy:
— pryłada dla vyznačeńnia bijałahična aktyŭnych kropak na ciele čałavieka;
— «padmiatalna-prybiralnaja» pryłada;
— hlicerynavaja sumieś dla vydaleńnia śniežna-ledzianych utvareńniaŭ;
— sposab zamiaščeńnia adzinkavaha adsutnaha zuba vałakonna-kampazitnym niazdymnym pratezam;
— pryłada dla rasčesvańnia i abrazańnia parastkaŭ žuravinaŭ.
Što treba dla atrymańnia patenta:
1) zajava pra vydaču patenta;
2) apisańnie vynachodnictva, jakoje raskryvaje jaho z paŭnatoj, dastatkovaj dla ažyćciaŭleńnia;
3) formuła vynachodnictva, jakaja vyražaje jaho sutnaść i całkam zasnavanaja na apisańni;
4) čarciažy ci inšyja materyjały, kali jany nieabchodnyja dla razumieńnia sutnaści vynachodnictva;
5) refierat.
