Vice-premjer Siamaška rekłamuje mini-CEC i kacielni na miascovym palivie 2

Impartazamiaščalnyja vytvorčaści alternatyŭnych krynic enierhii pavinny być stvorany ŭ Biełarusi, zajaviŭ pieršy namieśnik prem'jer-ministra Biełarusi Uładzimir Siamaška.

Pavodle jaho słoŭ, tak zvanaja małaja, alternatyŭnaja enierhietyka apošnim časam nabyvaje ŭsio bolšuju značnaść nie tolki ŭ Biełarusi, ale i va ŭsim śviecie. U Biełarusi stavicca zadača 30–31 pracent enierhii (elektryčnaj, ciepłavoj) vypracoŭvać z adnaŭlalnych miascovych syravinnych resursaŭ. Užo realizujecca adpaviednaja prahrama, pavodle jakoj budzie pabudavana bolš jak 160 takich enierhakrynic — mini-CEC, jakija pracujuć na draŭnianych adchodach, torfie; kacielniaŭ, jakija vykarystoŭvajuć lihnin; hidraelektrastancyj, bijahazavych ustanovak. I heta prahrama ŭžo realizujecca, rastłumačyŭ Uładzimir Siamaška.

U jakaści stanoŭčaha prykładu jon pryvioŭ Pružanskuju mini-CEC (Bresckaja vobłaść): «My bačym, što alternatyŭnyja krynicy enierhii dajuć vialikuju addaču. U Pružanach dziakujučy mini-CEC na 30 pracentaŭ źnizili taryf na ciapło i haračuju vadu. Heta śviedčyć ab tym, što ŭžo siońnia takija mini-CEC mohuć kankuryravać z tymi, jakija pracujuć na hazie. Pry hetym važna, što Biełaruś moža zabiaśpiečyć svaje mini-CEC nieabchodnym syravinaj». Uładzimir Siamaška paviedamiŭ, što, pavodle danych Nacyjanalnaj akademii navuk, zapas draŭniny ŭ Biełarusi štohod pavialičvajecca na 25–32 młn. kub.m, a na pierapracoŭku idzie tolki 12,5–13 młn. kub.m, pryčym kala 30 pracentaŭ hetaha abjomu zastajecca ŭ vyhladzie draŭnianych adchodaŭ.

U liku pryjarytetaŭ u halinie małoj enierhietyki — pašyreńnie vykarystańnia ŭ narodnaj haspadarcy bijahazavych ustanovak. «Tak my vyrašajem i ekałahičnyja prablemy, źviazanyja z utrymańniem bujnych žyviołahadoŭčych kompleksaŭ, ptuškafabryk, i atrymlivajem na vychadzie enierhiju i ŭhnajeńni, — adznačyŭ pieršy vice-premjer. — I ŭ suviazi z hetym zadača, jakaja siońnia razhladajecca, — heta stvareńnie ajčynnaj vytvorčaści takich ustanovak. Dla krainy heta ekanomija valutnych resursaŭ, a taksama mahčymaść vyrablać u siabie toje, što my možam, i druhoje — zabieśpiačeńnie rabotaj svaich pradpryjemstvaŭ i svaich ludziej».

U Bresckaj vobłaści Uładzimir Siamaška naviedaŭ pradpryjemstvy, jakija ŭ toj ci inšaj stupieni ŭdzielničajuć u prajektach u halinie małoj enierhietyki: AAT «Biełaaziorski enierhamiechaničny zavod» i «Brestmaš», a taksama śmiećciepierapracoŭčy zavod, što budujecca ŭ Breście, — pieršy ŭ Biełarusi, dzie budzie prymianiacca praktyčna biezadchodnaja technałohija pierapracoŭki kamunalnaj śmiećcia i ściokaŭ z vypracoŭkaj elektryčnaj i ciepłavoj enierhii.

0

0

0

0

0

0

BiełTA

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH