22 asoby zatrymana na padychodach da budynku KDB. Kala 50 čałaviek pastavili śviečki na pł. Niezaležnaści.
Darja Korsak z partretam muža Alaksandra Atroščankava.
Udzielnikam akcyi pahražaŭ asabista nam.načalnika HUUS Mienharvykankamu Maksim Hryščanka.
Praź ličanyja chviliny partret vyrvali z ruk ludzi ŭ cyvilnym.
Žurnalistam pieraškadžali pracavać ludzi ŭ spartovaj vopratcy.
Pieradaje radyjo «Svaboda»:20:35 Čałaviek, jaki maliŭsia za Statkieviča i pastaviŭ jahony partret kala pomnika — były palitviazień Valer Siadoŭ, jaki nia raz ładziŭ performansy (prynosiŭ vatoŭku da pomnika Leninu i h.d.). Paśla taho, jak spadar Siadoŭ krychu adyšoŭ ad pomnika archaniołu Michaiłu, jaho zatrymali. Partret Statkieviča taksama vychapili ludzi ŭ čornym.
20:10 Kala Čyrvonaha kaściołu zaraz znachodziacca kala troch dziasiatkaŭ ludziej, jany śpiavajuć «Mahutny Boža». Pryjšoŭ stały čałaviek z partretam Mikoły Statkieviča, pračytaŭ malitvu.
19:45 Da kaściołu praciahvajuć iści ludzi, iduć siemjami, staviać śviečki. Zachodziać u kaścioł, idzie prachodzić imša.
19:30 Kala Čyrvonaha kaściołu, la skulptury archanioła Michaiła, ludzi staviać śviečki. Tut na hetyja chviliny prykładna paŭsotni śviečak. Prysutnyja raspaviadajuć, što im nie dali dałučycca da akcyi salidarnaści la budynku KDB, adbirali partrety palitźniavolenych pa darozie. Tamu jany pajšli da Čyrvonaha kaściołu. Spačatku chacieli pastavić śviečki da prystupak Domu ŭradu, ale tudy ich nie dapuścili šerahi ludziej u čornym, jakich kala budynku vialikaja kolkaść.
Ad KDB pieradajuć reparciory "Našaj Nivy":
19:10
Akcyja kala KDB skončyłasia.
18:57
Ludzi pacichu razychodziacca. La budynka KDB zastajucca tolki supracoŭniki śpiecsłužbaŭ i vajskoŭcy.
18:46
Zatrymany aktor Svabodnaha teatra Mikita Vałodźka, jaki paŭhadzinaj raniej sprabavaŭ pastavić śviečku la budynka KDB.
18:35
Mašynu, jakoj adjazdžała z akcyi Darja Korsak, zabłakavali na vulicy Vaładarskaha.
Padyšoŭ daišnik i sprabavaŭ prymusić kiroŭcu vyjści z mašyny, kab ludzi ŭ cyvilnym zabrali Darju.
Ale chucieńka padbiehli žurnalisty i fotakory — i ludzi ŭ cyvilnym schavalisia ŭ svoj mikraaŭtobus, a daišnik taksama źbieh. Mašyna adbita. Darja ŭ atačeńni žurnalistaŭ idzie da mietro.
18:26
Jak paviedamili vidavočcy, tolki što na vulicy Kamsamolskaj dvoje supracoŭnikaŭ u cyvilnym zatrymali vysokaha chłopca ŭ śvietłaj kurtcy z kapiušonam. Skrucili i zapchnuli ŭ mašynu.
18:25
Žurnalista «Svabody» Aleha Hruździłoviča adpuścili, papiarednie ścioršy videa.
18:23
Baćka Nasty Pałažanki Uładzimir Michajłavič raspavioŭ, što atrymaŭ siońnia ad dački list. List napisany na arkušy farmatu a4, napisany rukoj dački, kaža Uładzimir Michajłavič.
List vielmi badziory, Nasta dziakuje ŭsim za pieradačy i paštoŭki, piša, što trymajecca dobra, i prosić ličyć jaje ŭ dalokaterminovym adpačynku ŭ dalokaj krainie.
18:22
Kolkaść tych, kamu ŭdałosia prabicca da budynka KDB vyrasła da 10 čałaviek. Častka trymaje partrety viaźniaŭ amierykanki.
Darja Korsak (žonka A. Atroščankava) padyšła sa źničkaj i partretam muža da kraja prajezžaj častki. Jaje atačyli čatyry čałavieki ŭ cyvilnym.
18:15
Padyšoŭ da budynka KDB jašče adzin čałaviek (paźniej vyśvietliłasia, što heta aktor Svabodnaha teatra Mikita Vaładźko), jaki zapaliŭ śviečku, adrazu paśla hetaha, da jaho padyšli dva supracoŭniki KDB.
Adzin vyrvaŭ śviečku, a kali małady čałaviek pasprabavaŭ viarnuć śviečku, to supracoŭnik KDB skazaŭ, što ŭ chłopca jość adna chvilina, kab syści adsiul, bo inakš jahonyja akulary raźlaciacca na drobnyja kavałki.
18:00
Pakul pierad budynkam KDB sabrałasia kala dvuch dziasiatkaŭ žurnalistaŭ i pakul adna ŭdzielnica akcyi — Darja Korsak, žonka aryštavanaha Alaksandra Atroščankava. Jana trymaje ŭ rukach partret muža. Supracoŭniki śpiecsłužbaŭ zatrymlivajuć mierkavanych udzielnikaŭ akcyi na padychodach (kala hatela «Minsk» i Makdonaldsa).
Vielmi šmat ludziej u cyvilnym, šmat ludziej u vajskovaj formie biez nadpisaŭ na śpinach i bedžaŭ.
Zatramany žurnalist radyjo «Svaboda» Aleh Hruździłovič, jaho paviali ŭ budynak KDB.
Darja Korsak kaža, što nie baicca być zatrymanaj, bo maksimum, što joj pahražaje, heta 15 sutak administracyjnaha aryštu.
«Heta ništo, ŭ paraŭnańni z 15 hadami, što pahražajuć majmu mužu».
Supracoŭniki KDB pavodziać vielmi niervova, pahražajuć žurnalistam, što kali jany nie buduć trymać navidavoku akredytacyju, to im pahražaje zatrymańnie.
Nahadajem, miesiac tamu, 19–20 śniežnia byli aryštavanyja siem kandydataŭ u prezidenty, šerah ich pradstaŭnikoŭ i žurnalistaŭ. Heta stała startam dla biesprecedentnaj kampanii represij suprać palityčnaj apazicyi. U krainie prajšli sotni pieratrusaŭ i zatrymańniaŭ, a łukašenkaŭskija ŚMI raźviazali paklopnickuju kampaniju. Na dumku ministraŭ zamiežnych spraŭ krain ES, heta było vyklikana tym, što Łukašenka ŭ sapraŭdnaści nie vyjhraŭ vybaraŭ i tamu choča źniščyć palityčnych apanientaŭ.
***
Nahadajem, što ŭ arhanizacyi masavych biesparadkaŭ abvinavačvajucca 32 čałavieki, 28 ź ich utrymlivajucca pad vartaj (ź ich čatyry kandydaty ŭ prezidenty — Uładzimir Niaklajeŭ, Andrej Sańnikaŭ, Aleś Michalevič i Mikałaj Statkievič, Vital Rymašeŭski byŭ vypuščany ź SIZA 1 studzienia i znachodzicca pad padpiskaj ab niavyjeździe),
4 — pad padpiskaj ab niavyjeździe. Z 16 padazravanych 5 znachodziacca pad vartaj, 9 — pad padpiskaj ab niavyjeździe, 2 — znachodziacca za miežami krainy.
Akramia hetaha, dvum asobam, zatrymanym 18 śniežnia, pradjaŭlenaje abvinavačvańnie ŭ asabliva złosnym chulihanstvie.
