Sańnikaŭ: «Da vyzvaleńnia krainy zastałasia para tydniaŭ» dadałosia videa 49

Łukašenka źbieh u Vieniesuełu. Miljony ludziej likujuć na vulicach: «Žyvie Biełaruś!» Taki prahnoz na 20 śniežnia zrabiŭ Andrej Sańnikaŭ, kandydat u prezidenty ad kampanii «Jeŭrapiejskaja Biełaruś» u svaim televystupie 24 listapada.

Vystupaŭ pa-rasiejsku. Pramova była dobra padrychtavanaja. Čytaŭ Sańnikaŭ jaje ŭpeŭniena.

U samym pačatku jon źvinavaciŭ Jarmošynu ŭ pakryćci falsifikacyj.

Raskazaŭ, što syšoŭ z urada, kali adbyŭsia pieravarot, kali «Łukašenka niezakonna zachapiŭ uładu», paraŭnaŭ Łukašenka z «drobnymi fiurerami», šmat razoŭ nazyvaŭ jaho dyktataram.

Źvinavaciŭ kiraŭničy režym u zabojstvie lideraŭ apazicyi, u tym liku i Karpienki.

Padkreśliŭ, što jon prafiesijny dypłamat. I vyhladaŭ jon jak dypłamat. Anarchičnaja barada była akuratna padstryžanaja. Dla pieršaha vystupu jon abraŭ sini halštuk.

Tekst pieravažna čytaŭ z papierki.

Jon zhaniŭ sacyjalna-ekanamičnuju situacyju ŭ krainie: «Biełaruś stała vialikaj paciomkinskaj vioskaj». Raskrytykavaŭ Dažynki jak pakazuchu dla dyktatara. «Na hetyja hrošy možna było b vylečyć tysiačy chvorych dziaciej»

Paraŭnaŭ historyju Biełarusi z historyjaj inšych centralnajeŭrapiejskich krainaŭ.

«Łukašenka nazyvaje nas apazicyjaj, ale apazicyjaj narodu daŭno stali Łukašenka i nasielniki Drazdoŭ». Jon vysoka acaniŭ Mašerava i skazaŭ, što takoha kiraŭnika jak Łukašenka ŭ Biełarusi jašče nie było.

«Treba ŭziać pałku i vyhnać śvińniu sa svajho haroda», — pracytavaŭ jon svajho cieścia.

Raskazaŭ pra pahrozy zabojstva, pieratrus u siabie ŭdoma, pra śmierć Biabienina.

Nielha chadzić na daterminovaje hałasavańnie, — zaklikaŭ Sańnikaŭ.

Paabiacaŭ:

pierachod da demakratyčnaha ładu i padziełu ŭład,

 admienu kantraktnaj sistemy,

 adradžeńnie prafsajuzaŭ,

 pryniać ideałohiju z adukacyjnych prahram,

 palapšeńnie jakaści adukacyi i daškolnaha vychavańnia,

 admienu ŭkaza № 660,

 reformu sielskaj haspadarki — ale nie kankretyzavaŭ, jakuju,

 ruch u Jeŭropu pry zachavańni stratehičnaha partniorstva z Rasijaj.

Sańnikaŭ raskrytykavaŭ prajekt pastavak nafty ź Vieniesueły, paraŭnaŭ jaho z prajektam pavarotu paŭnočnych rek.

«Zamožnaść i ŭłasnaść» pavinny stać pradmietam honaru, skazaŭ jon. I paabiacaŭ u nastupnym vystupie prezientavać ekanamičnuju prahramu, padrychtavanuju ekanamistam Złotnikavym.

Jon zaklikaŭ «ratavać krainu». Skazaŭ, što 19 śniežnia na Płoščy źbiarucca najlepšyja mužčyny i samyja pryhožyja žančyny krainy.

Vystup byŭ takim ža papulisckim, jak i vystupy Rymašeŭskaha j Statkieviča. Ale jamu brakavała jarkich momantaŭ i emacyjnaści hetych palitykaŭ.

Mikoła Buhaj

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH