Namieśnik dyrektara radyjo «Svaboda» kamientuje vykazvańni Emira Kusturycy ŭ Minsku.
Łukašenka i Kusturyca, fota BIEŁTA
Radyjo «Svaboda» paprasiła Nienada Peiča, namieśnika dyrektara radyjo, prakamientavać aŭtorkavyja vykazvańni kinarežysiora Emira Kustyrycy ŭ Minsku.
N.Peič, jaki staŭ pracavać na radyjo jak dyrektar paŭdniovasłavianskaj i ałbanskaj słužby ŭ 1993 h., pierad hetym, u vielmi dramatyčny pieryjad raspadu Juhasłavii, pracavaŭ na sarajeŭskim telebačańni jak białhradski karespandent, potym jak kiraŭnik adździeła navinaŭ, i ŭrešcie jak prahramny dyrektar. Peič asabista znajomy z Kusturycam i kaža, što nieadnarazova prasiŭ taho admovicca ad publičnaj padtrymki režymu Słabadana Miłošaviča.
Skažycie, jak publičnaje žyćcio Emira Kusturycy ŭsprymajecca ŭ Sierbii i, ahulna, na terytoryi byłoj Juhasłavii. Davajcie pačniem ź jahonaha pierachodu ŭ pravasłaŭje ŭ 2005 h. Ci časta zdarajecca, kab ludzi z musulmanskimi karaniami naviartalisia ŭ pravasłaŭje ŭ byłoj Juhasłavii?
Peič: U sapraŭdnaści heta vielmi redkaja praktyka. Vielmi redkaja.
I Kusturyca — adzin ź niešmatlikich, jakija zrabili heta publična.
Ja ź im vielmi dobra znajomy. Jon — hienij, što tyčycca kinamastactva. Ale što tyčycca palityki — dyk jon dakładnaja supraćlehłaść hienija.
Jon — adzin z tych, chto padtrymlivaŭ Miłošaviča, słavutaha «bałkanskaha raźnika», čałavieka, jaki byŭ adkazny za raźviazańnie vajny i za projhryš u toj vajnie. U dadzieny momant Kusturyca padtrymlivaje radykalnych nacyjanalistaŭ u Sierbii.
(…) Što tyčycca ŭsprymańnia Kusturycy radykalna nacyjanalistyčnymi kołami, dla ich jon źjaŭlajecca niekim nakštałt hieroja. Dla ludziej, jakija dumajuć inakš, jon prosta palityčny nievuk. U Bośnii sierby, z uvahi na jahony pierachod u pravasłaŭje, staviacca da jaho vielmi prychilna, ale siarod musulmanaŭ i charvataŭ nijakaj simpatyi da jaho niama.
Jakija ŭ Kusturycy palityčnyja pohlady ciapier? Ci praŭda, što jon dalej škaduje ab raspadzie Juhasłavii?
Peič: Dumaju, što tak, choć upeŭniena skazać hetaha nie mahu. Šmat ludziej škaduje ab raspadzie Juhasłavii, pa roznych pryčynach. Kusturyca źjaŭlajecca častkaj radykalnaha nacyjanalistyčnaha ruchu ŭ Sierbii. Jon udzielničaje u ichnich mitynhach, jon robić publičnyja zajavy na ichniuju karyść, jon sustrakajecca, publična i pryvatna, ź viadučymi sierbskimi nacyjanalistami. Tak što z palityčnaha hledzišča — jon sierbski nacyjanalist. Jak kažuć u Sierbii, čałaviek śvieža abiernuty ŭ niejkuju vieru źjaŭlajecca bolšym rupliŭcam, čym staryja vierniki.
Maksimiuk: Jak by vy prakamientavali zajavu, zroblenuju Kusturycam u Minsku padčas sustrečy z Alaksandram Łukašenkam? Kusturyca vykazaŭsia, što Biełaruś źjaŭlajecca adzinaj krainaj, jakaja nie dazvoliła raściahnuć svajo nacyjanalnaje dabro mižnarodnym karparacyjam…
Peič (śmiajecca):Emir, chutčej za ŭsio, mieŭ niejki pryvatny intares, kab skazać heta.
