Prybytki biełaruskich bankaŭ bjuć rekordy

Vychad biełaruskaj bankaŭskaj sistemy z kryzisu ŭ najaŭnaści — banki ŭ hetym hodzie istotna pavialičyli svoj prybytak.

Pryčym, kali pahladzieć na strukturu prybytku bankaŭskaj sistemy, možna kanstatavać, što banki, jakija naležać zamiežnym inviestaram, — davoli mocnyja kankurenty dziaržbankaŭ.

Pa stanie na 1 kastryčnika prybytak, atrymany biełaruskimi bankami, dasiahnuŭ rekordnych 1, 205 trłn rubloŭ. Dla paraŭnańnia: za anałahičny pieryjad minułaha hoda prybytak bankaŭ składaŭ 764,4 młrd rubloŭ. Takim čynam, prybytak bankaŭskaha siektara ŭ hetym hodzie vyras na 57,6%.

Najbujniejšymi hulcami na rynku, kali mierać pa prybytku i aktyvach, pa-raniejšamu zastajucca dziaržbanki.

U studzieni-vieraśni «Biełarusbank» zarabiŭ 328,2 młrd rubloŭ prybytku, «Biełahraprambank» — 184,2 młrd, «Bielinviestbank» — 77,8 młrd rubloŭ prybytku. Na dolu ŭsich dziaržbankaŭ prychodzicca bolš za 600 młrd rubloŭ prybytku (49,9% ad ahulnaha abjomu prybytku).

Druhuju pałovu prybytku na rynku zarablajuć u asnoŭnym kamiercyjnyja banki, kantralavanyja zamiežnym kapitałam.

«Pryjorbank» — najbujniejšy kamiercyjny bank Biełarusi, jaki ŭvachodzić u aŭstryjskuju bankaŭskuju hrupu Raiffeisen, — atrymaŭ za pieršyja dzieviać miesiacaŭ hetaha hoda 179,4 młrd rubloŭ prybytku (+28,8% da studzienia-vieraśnia minułaha hoda).

U svaju čarhu, «BPS-Bank», pradadzieny ŭ kancy minułaha hoda rasijskamu «Śbierbanku», pavialičyŭ za pieršyja dzieviać miesiacaŭ 2010-ha pamier prybytku na 41,8% u paraŭnańni z anałahičnym pieryjadam minułaha hoda. Prybytak banka za studzień-vierasień hetaha hoda skłaŭ 95,9 młrd rubloŭ.

Prybytak «Biełhazprambanka», što naležyć rasijskaj hrupie «Hazpram», na 1 kastryčnika byŭ roŭny 63,4 młrd rubloŭ (49,1% u paraŭnańni sa značeńniem, dasiahnutym za hod da hetaha).

Prybytak «Biełźniešekanombanka», jaki try hady tamu kupiŭ rasijski «Źniešekanombank», byŭ roŭny na 1 kastryčnika 52 młrd rubloŭ (rost na 75,1% u paraŭnańni sa studzieniem-vieraśniem minułaha hoda).

Bank «Maskva-Minsk», jaki naležyć rasijskamu «Banku Maskvy», atrymaŭ za studzień-vierasień prybytak u pamiery 51,9 młrd rubloŭ, pavialičyŭšy pamier svajho prybytku na 38,2% u paraŭnańni z anałahičnym pieryjadam minułaha hoda.

Prybytak «MTBanka», jaki naležyć sumiesnamu pradpryjemstvu amierykanskaha inviestfonda Horizon Capital i aŭtamabilnaha chołdynha «Atłant-M», byŭ roŭny na 1 kastryčnika 30,4 młrd. rubloŭ (74,3% u paraŭnańni z anałahičnaj dataj minułaha hoda).

Pryvatnyja banki, što naležać rezidentam Biełarusi, zajmajuć niaznačnuju dolu na rynku. Tak, dola «Trastbanka», «RRB-Banka», «Technabanka», «Jeŭrabanka» ŭ ahulnym abjomie prybytku skłała 1,3% pa vynikach za studzień-vierasień, u ahulnym abjomie aktyvaŭ — 1,1%.

Sumarny prybytak usich pryvatnych bankaŭ, u tym liku kantralavanych zamiežnym kapitałam, skłaŭ na 1 kastryčnika 654,5 młrd rubloŭ (50,1% ad ahulnaha abjomu prybytku).

Z ulikam dynamiki za apošnija hady možna havaryć pra dźvie tendencyi na bankaŭskim rynku. Pieršaja — prykmietny rost prybytku biełaruskich bankaŭ. Kali paraŭnoŭvać z 2006 hodam, kali dola zamiežnaha kapitału ŭ bankaŭskaj sistemie była nievialikaj, to prybytak bankaŭskaj sistemy Biełarusi pavialičyŭsia ŭ 4 razy, navat krychu bolš.

Druhaja tendencyja — rost doli niedziaržaŭnych bankaŭ u ahulnym abjomie prybytku. Da prodažu biełaruskich bankaŭ zamiežnym inviestaram raskład na rynku byŭ taki: dola dziaržbankaŭ u ahulnym abjomie prybytku 4 hady tamu składała bolš za 70%. Na dolu niedziaržaŭnych bankaŭ prychodziłasia tady mienš za 30% prybytku.

Ciapier usio inakš: prybytak bankaŭskaj sistemy raźmierkavany prykładna paroŭnu pamiž dziaržaŭnymi i niedziaržaŭnymi bankami.

Druhuju pałovu prybytku, jak adznačałasia vyšej, na rynku zarablajuć u asnoŭnym kamiercyjnyja banki, kantralavanyja zamiežnymi inviestarami.

Pazityŭny vynik prychodu zamiežnaha kapitału ŭ bankaŭski biznes Biełarusi składajecca jašče i ŭ źnižeńni pracentnych stavak pa kredytach,

adznačaje dyrektar departamienta mižnarodnych i fondavych apieracyj ZAT «Alfa-Bank» Siarhiej Muchanaŭ.

Nahadajem, što ŭ 2008 hodzie rasijski kansorcyum «Alfa-Hrup» kupiŭ biełaruski «Miežtarhbank», na bazie jakoha i było stvoranaje ZAT «Alfa-Bank».

«Kali my vychodzili na biełaruski rynak, staŭka pa valutnych kredytach jurydyčnym asobam składała 12%, — uzhadvaje Siarhiej Muchanaŭ. — Ciapier siaredniaja staŭka pa kredytach dla bujnych jurydyčnych asobaŭ vahajecca ŭ rajonie 8% hadavych. Takim čynam, pracentnaja staŭka za dva hady źniziłasia napałovu. Heta vynik u tym liku i prychodu zamiežnych inviestaraŭ u bankaŭskuju sistemu».

Razam z tym, davodzicca kanstatavać, što pakul u bankaŭskaj sistemie Biełarusi zastajecca vysokim upłyŭ dziaržbankaŭ, niahledziačy na masavy prychod u siektar zamiežnych inviestaraŭ.

U pryvatnaści, dziaržbanki pakul praciahvajuć daminavać pa abjomie aktyvaŭ.

Dola dziaržbankaŭ u ahulnym abjomie aktyvaŭ pieravyšała na 1 kastryčnika 73%.

Praŭda, pryvatnyja banki ŭ hetym płanie dziaržbankam nie asabliva zajzdrościać.

Sprava ŭ tym, što aktyvy dziaržbankaŭ rastuć vysokimi tempami šmat u čym za košt absłuhoŭvańnia dziaržprahramaŭ, jakija miarkujuć vyłučeńnie kredytnych resursaŭ na lhotnych umovach. Udzielniki rynku adznačajuć, što dziaržprahramy ciahnuć uniz prybytkovaść dziaržbankaŭ.

U hetym sensie pryvatnyja banki mohuć pavodzić siabie samastojna — jany nie zajmajucca lhotnym kredytavańniem, vydajuć resursy vyklučna na rynkavych umovach, što dazvalaje im naroščvać nie tolki aktyvy, ale i prybytak.

Daviedka Naviny.by. Bankaŭski siektar Biełarusi na 1 kastryčnika uklučaŭ 31 dziejny bank. Pryciahnieńniem układaŭ nasielnictva zajmajucca 24 banki, kredytavańniem — 31 bank, apieracyjami z kaštoŭnymi mietałami — 10, raźmiaščeńniem ablihacyj siarod nasielnictva — 5. Aktyvy biełaruskich bankaŭ da 1 kastryčnika pieravysili 106 trłn rubloŭ, pavialičyŭšysia za studzień-vierasień na 28,3%.

naviny.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH