Pasoł Vienhryi Fierenc Kontra spadziajecca, što kandydaty na pasadu prezidenta Biełarusi atrymajuć realny šans raskazać narodu pra svaje prahramy.
U intervju BiełaPAN pa vynikach naviedvańnia 2 listapada pasłami krain Jeŭrasajuza Traścianca i Kurapat dypłamat adznačyŭ, što prezidenckaja vybarčaja kampanija ŭ Biełarusi prachodzić inakš, čym u Vienhryi. Pavodle jaho słoŭ, vybarčyja kampanii ŭ Vienhryi davoli šumnyja, pakolki kandydaty imknucca pakazać siabie, jany vystupajuć, pra kandydataŭ havorać i pišuć, ich pakazvajuć pa telebačańni, hetych ludziej usie viedajuć.
«U Biełarusi prezidenckaja kampanija idzie cicha, pa telebačańni havorać ab niejkich pretendentach, adnak sami jany nie źjaŭlajucca na teleekranach», — skazaŭ dypłamat.
Jon vykazaŭ nadzieju, što sioletniaja prezidenckaja vybarčaja kampanija ŭ Biełarusi budzie adroźnivacca ŭ lepšy bok u paraŭnańni z papiarednimi vybarami kiraŭnika dziaržavy.
Dypłamat nahadaŭ, što Biuro pa demakratyčnych instytutach i pravach čałavieka ABSIE «nikoli nie pryznavała transparentnymi, čystymi i sumlennymi ŭsie papiarednija vybarčyja kampanii ŭ Biełarusi».
«Chočacca vieryć, što budzie pradoŭžana taja libieralizacyja, jakaja nazirałasia padčas zboru podpisaŭ dla rehistracyi kandydataŭ na pasadu kiraŭnika dziaržavy, i ŭdzielniki palityčnaha pracesu atrymajuć realny šans raskazać narodu pra svaje prahramy», — padkreśliŭ Fierenc Kontra.