Rasija pavinna budavać adnosiny ź Biełaruśsiu na dziełavoj asnovie 14
Zajaviŭ ministr finansaŭ Rasijskaj Fiederacyi Alaksiej Kudryn.
Rasii nieabchodna budavać adnosiny ź Biełaruśsiu, jakija zajšli ŭ tupik, na dziełavoj asnovie, zajaviŭ 5 kastryčnika žurnalistam u Maskvie vice-prem`ier rasijskaha ŭrada, ministr finansaŭ RF Alaksiej Kudryn.
«Ja zhodny, što rasijska-biełaruskija adnosiny zajšli ŭ tupik, ja byŭ siarod tych ludziej, jakija skazali pra heta raniej za ŭsich», — cytuje Kudryna RIA Novosti. Razam z tym, ličyć vice-prem`ier, rasijskaje kiraŭnictva pavinna «budavać adnosiny na dziełavoj asnovie».
Kudryn taksama padkreśliŭ, što Rasija pavinna budavać uzajemaadnosiny ź Biełaruśsiu ŭ ramkach vypracavanych pryncypaŭ i mižnarodnych adnosinaŭ.
Ministr finansaŭ nahadaŭ, što ciapier płanujecca čarhovaje pasiadžeńnie savieta ministraŭ Sajuznaj dziaržavy.
Nahadajem, 4 kastryčnika pres-sakratar prezidenta Rasii Natalla Cimakova zajaviła žurnalistam, što «ŭ apošni čas adnosiny ź biełaruskim kiraŭnictvam, vidavočna, zajšli ŭ tupik». Pavodle jaje słoŭ, «z ulikam tych kamientaryjaŭ, jakija daŭ prezident Biełarusi, hetyja adnosiny nie buduć raniejšymi».
1 kastryčnika na pres-kanfierencyi dla rasijskich žurnalistaŭ Alaksandr Łukašenka rascaniŭ svaje adnosiny ź Dźmitryjem Miadźviedzievym i prem`jer-ministram Rasii Uładzimiram Pucinym jak «kiepskija, kali nie skazać horš». Jon uskłaŭ adkaznaść za «ŭsio, što ciapier adbyvajecca vakoł Biełarusi», na «kučku vysokapastaŭlenych rasijskich čynoŭnikaŭ». «Kali budzie vola rasijskaj dziaržavy, rasijskaj elity, to na praciahu troch miesiacaŭ, maksimum paŭhoda, my nie prosta vybudujem adnosiny, nie prosta vierniemsia na toj uzrovień adnosinaŭ, jaki isnavaŭ, ale i značna jaho pierasiahniem», — skazaŭ Łukašenka.
U svaju čarhu, Dźmitryj Miadźviedzieŭ u videabłohu rezka raskrytykavaŭ biełaruskaje kiraŭnictva. «U apošni čas, — zajaviŭ jon, — kiraŭnictva Biełarusi pryniało na ŭzbrajeńnie antyrasijskuju rytoryku. Pieradvybarnaja kampanija tam całkam i poŭnaściu pabudavanaja na antyrasijskich siužetach. Prezident Łukašenka ŭ svaich vykazvańniach vychodzić daloka za ramki nie tolki dypłamatyčnych praviłaŭ, ale i elemientarnych čałaviečych pravił prystojnaści».
