Staŭleńnie dziaržaparata da movy mianiajecca na lepšaje. Piša Ihar Słučak.
Na staronkach «Našaj Nivy» pytańniu zachavańnia i raźvićcia biełaruskaj movy nadajecca šmat uvahi. Nie tak daŭno byŭ nadrukavany artykuł pad nazvaj «Jeśli nie vładiejetie russkim, to sovietuju zaniaťsia jeho izučienijem», dzie byli pryviedzieny prykłady krajnie niehatyŭnaha staŭleńnia niekatorych čynoŭnikaŭ da biełaruskaj movy, ich ahresiŭnaje niežadańnie vieści spravavodstva, chacia b i častkova, na biełaruskaj movie.
Ale čas idzie i
pohlady niekatorych piersanažaŭ taho artykułu pakrychu źmianiajucca. I što bolš važna, źmianiajucca jany, choć i nie chutka, na ŭzroŭni dziaržavy ŭ cełym.
Tak, źmianiła svajo staŭleńnie da biełaruskaj movy ŭ lepšy bok Ministerstva enierhietyki, choć raniej prosta nieadnarazova ŭ svaich listach vykazvała padziaku «za projavlennuju zabotu i iniciativu po sochranieniju nacionalnych ciennostiej». Ciapier adkazy na zvaroty z hetaj ustanovy biełaruskamoŭnyja i nijakich składanaściej dla ich pierachod na biełaruskamoŭje nie vyklikaŭ.
Navat prafiesar N.Suša, jaki kazaŭ u svaim liście, što kali Vy «nie vładiejetie odnim iz hosudarstviennych jazykov — russkim, to sovietuju Vam zaniaťsia jeho izučienijem. Izučiv russkij jazyk, Vy tiem samym smožietie podniať svoj kulturnyj urovień i nieskolko rasširiť imiejuŝijsia u Vas kruhozor», ciapier pačaŭ pisać pa biełarusku. Ale pazicyju svaju nie źmianiŭ, i napisaŭ znoŭ usio vyšej skazanaje, ale tolki na biełaruskaj movie.
Ministerstva adukacyi paličyła niekarektnym davać acenku vykazvańniam rektara Minskaha instytuta kiravańnia Sušy, ale adznačyła, što «Ministerstva adukacyi moža vykazać tolki svaju pazicyju — heta dobrazyčlivyja i vietlivyja adnosiny da ludziej niezaležna ad ich vieravyznańnia i movy, na jakoj jany razmaŭlajuć» i dziela infarmacyi dało spasyłku na artykuł 9.22 Administracyjnaha kodeksu — «Parušeńnie zakanadaŭstva ab movach». Padajecca, svaje vyvady ministerstva ŭsio ž zrabiła.
Svaje vysnovy taksama zrabiła i administracyja Zavadskoha rajona Minska.
Jak paviedamiła namieśnica staršyni administracyi Ł.Baranoŭskaja, rektaru PUA «Minski instytut kiravańnia» administracyjaj Zavadskoha rajona Minska nakiravana piśmo ab niedapuščalnaści niekarektnych dziejańniaŭ pry padrychtoŭcy adkazaŭ na zvaroty hramadzian.
Miž tym, akramia prafiesara Sušy, usio jašče zastajucca i inšyja čynoŭniki, uparta nie žadajučyja vieści spravavodstva pa‑biełarusku i vykazvajučyja pahardu da movy nacyi, na ziamli jakoj jany žyvuć.
Ale nie budziem śpiašacca ź ich acenkami, vierahodna ŭ bližejšym časie jany sami pierahledziać svaju pazicyju.
A ab tym, što adnosiny da biełaruskaj movy pačynajuć mianiacca na dziaržaŭnym ŭzroŭni, śviedčyć list z pałaty pradstaŭnikoŭ, dzie deputat Jaŭhien Mielnikaŭ infarmuje, što «Prajekt Zakona Respubliki Biełaruś « Ab zvarotach hramadzian i jurydyčnych asob» praduhledžvaje ŭžyvańnie biełaruskaj movy. Tak zhodna artykułu 12 zakonaprajekta padača zvarotaŭ ažyćciaŭlajecca na biełaruskaj abo ruskaj movie. Artykuł 18 abaviazvaje davać adkazy na movie zvarotu».
Tamu, kali zakon budzie pryniaty, možna budzie pavinšavać usich, chto padtrymlivaŭ piersanalnuju inicyjatyvu «Spravavodstva pa‑biełarusku!» ź pieršymi pieramohami.
Pakrysie ŭsie razam my vierniem biełaruskaj movie status adzinaj dziaržaŭnaj movy ŭ Biełarusi.
Aznajomicca z adkazami čynoŭnikaŭ pa pytańni pieravoda spravavodstva na biełaruskuju movu možna pa spasyłcy ihar-sluchak.livejournal.com.
