Piša Pavał Mažejka.
U hości da Milinkieviča ŭ Bieršty źjechalisia imaviernyja kandydaty ŭ prezidenty: Aleś Michalevič, Jury Hłušakoŭ dy Ryhor Kastusioŭ.
Varyjant, pry jakim Alaksandr Milinkievič nie voźmie ŭdziełu ŭ hetaj prezidenckaj kampanii, jość nadzvyčaj drennym. Heta varyjant, jaki aznačaje, što biełaruskija pravyja,
Ale
Milinkievič maje prava admovicca bałatavacca na vybarach prezidenta.U jaho jak palityka jość arhumienty na karyść takoha ci inšaha rašeńnia.
Sioleta da prezidenckaj kampanii nacyjanalnyja siły padyšli niekalkimi kvołymi kałonami. Situacyju možna ličyć dramatyčnaj. Pytańnie staić navat, ci pieražyvuć hetuju kampaniju pravyja ŭ jakaści palityčnaj siły, ci nie straciać reštki ŭpłyvu nie tolki na hramadstva, ale i ŭ samoj apazicyi.
I tamu Alaksandr
Milinkievič nie pavinien sabie dazvolić prosta zajavić pra vychad z kampanii, padparadkavać hetaje rašeńnie tolki intaresam svajoj struktury, raspylić zarobleny aŭtarytet i rejtynh. Milinkievič nie maje prava pakinuć nacyjanalnyja siły biez vyraznaha kandydata.
Inačaj hetaja kampanija moža nadoŭha pachavać pamknieńni biełaruskich pravych być siłaj, zdolnaj abaraniać nacyjanalnyja intaresy Biełarusi. Ci, prynamsi, zmušać našy ideałahična strakatyja demakratyčnyja siły zajmać ćviorduju pazicyju adnosna dačynieńniaŭ z Rasijaj ci jeŭrapiejskaha viektara Biełarusi.
Los nacyjanalnych siłaŭ zaležyć i ad taho, jak Milinkievič razyhraje svaju kartu, što jon zrobić sa svaim palityčnym darobkam.Padtrymać usich ci padtrymać niekalkich — heta nie padtrymać nikoha. U svaju čarhu składanaje, ale łahičnaje, paśladoŭnaje rašeńnie ab pieradačy svajho darobku adnamu kandydatu budzie aznačać faktyčna pryznačeńnie adzinaha kandydata ad nacyjanalnych sił. Z adpaviednymi nastupstvami: lehitymnaściu, raspaznavalnaściu, aŭtarytetam jak unutrybiełaruskim, tak i mižnarodnym.
Na prezidenckich vybarach my daŭno nie vybirajem prezidenta. Z hetym nieabchodna ličycca. Tamu razvahi, jakomu kandydatu ad apazicyi addać pieravahu: vysokamu, maładomu, padabajecca dziaŭčatam ci nie, ciahnie ci nie ciahnie być prezidentam, majuć značeńnie chiba tolki na sieminarach pa PR.
My vybirajem — ci zachavajuć nacyjanalnyja siły liderstva ŭ apazicyi i ci buduć jany zdolnyja ŭ bližejšaj pierśpiektyvie pazmahacca za źmienu ŭłady ŭ Biełarusi.
Biezumoŭna, žadać pieramohi nad Alaksandram Łukašenkam nieabchodna kožnamu apazicyjnamu kandydatu, jaki idzie siońnia na vybary, niezaležna, jak kažuć, ad partyjnaj prynaležnaści. Ale nielha, kab paśla hetych vybaraŭ praciahvałasia vajnuška, kamu nieści ściah prabiełaruskich prajeŭrapiejskich pravych sił.
Milinkievič maje mahčymaść zblizić nacyjanalnyja siły. I takim žestam moža stać jahonaja padtrymka na vybarach Ryhora Kastusiova, kandydata ad Partyi BNF.
Čamu Kastusioŭ? Bo heta kandydat ad najbolš masavaj, arhanizavanaj, zmatyvavanaj pravaj struktury.
Hety palityk maje prava być na vybarach kandydatam i nadziejaj bolšaści tych hramadzianaŭ krainy, jakija vyznajuć zhadanyja vyšej vartaści.
Milinkievič budzie paśladoŭnym, kali sa svaim dośviedam, z ahramadnym mižnarodnym aŭtarytetam stanie na hetych vybarach popleč z absalutna novym u publičnaj palitycy Ryhoram Kastusiovym.
Pa mienšaj miery, hetaja padtrymka viernie ŭzajemny davier u adnosiny i zrobić dźvie struktury, jakija stajać na nacyjanalnych pazicyjach — Ruch «Za Svabodu» i Partyju BNF — sajuźnikami nie tolki na bližejšuju kampaniju. A heta ŭžo baza dla realnaha abjadnańnia.
* * *
Pavał Mažejka — u 2005–2007 presavy sakratar Alaksandra Milinkieviča.
