Fota: MZS
Baki pahavaryli pra supracoŭnictva ŭ palityčnaj, ekanamičnaj i humanitarnaj śfierach. Jak paviedamlaje biełaruskaje MZS, Esvacini asabliva zacikaŭlena «ŭ pryciahnieńni biełaruskaha vopytu i technałohij u halinie raźvićcia sielskaj haspadarki i zabieśpiačeńnia charčovaj biaśpieki afrykanskaj krainy».
Niahledziačy na toje, što Esvacini znachodzicca vielmi daloka, jaho palityčnaja sistema moža być vielmi blizkaja novym partnioram ź Biełarusi. Karaleŭstva — apošniaja absalutnaja manarchija na afrykanskim kantyniencie. Dziaržavaj adnaasobna kiruje karol Msvaci III z dapamohaj ukazaŭ, jon ža pryznačaje premjera i ŭrad. Palityčnyja partyi ŭ Esvacini zabaronienyja jašče z 1970-ch hadoŭ, u krainie dziejničaje pastajannaje vajennaje stanovišča.
Esvacini (da 2018 hoda kraina nasiła nazvu Svazilend) — nievialikaja dziaržava biez vychadu da mora, jana miažuje z PAR i Mazambikam. Pa płoščy karaleŭstva ŭ dva z pałovaj razy mienšaje za Minskuju vobłaści, u krainie žyvie krychu bolš za 1,2 miljona čałaviek.
Bolš za pałovu žycharoŭ Esvacini žyvuć za rysaj biednaści — mienš čym na 1,25 dalara ŭ dzień. U hetaj krainie samy vysoki ŭ śviecie ŭzrovień zachvorvańnia na ŚNID. Bolšaść nasielnictva zaniataja ŭ nizkaefiektyŭnaj naturalnaj sielskaj haspadarcy na abščynnych ziemlach. Pałovu VUP, adnak, składaje śfiera pasłuh.
Ekanomika Esvacini maksimalna zaviazanaja na PAR: na hetuju krainu prypadaje 65% ekspartu i 75% impartu. Mnohija mužčyny, kab utrymlivać siemji, źjazdžajuć pracavać u PAR: hrašovyja pieravody z hetaj krainy adyhryvajuć važnuju rolu ŭ ekanomicy.
Rezka kantrastuje z takim ekanamičnym fonam ład žyćcia absalutnaha manarcha. Msvaci III žyvie ŭ 13 raskošnych rezidencyjach, jon sabraŭ park z darahich mašyn koštam u 500 tysiač dalaraŭ. U hod manarch i jahonaja siamja traciać na siabie bolš za 30 miljonaŭ dołaraŭ dziaržbiudžetu.
Siamja, darečy, u Msvaci vialikaja. Tolki pavodle aficyjnaj infarmacyi, u 55-hadovaha karala, jaki kiruje, darečy, ažno z 1986 hoda, 15 žonak, mnohich jon zaprykmieciŭ na konkursach pryhažości. Na svaich spadarožnic Msvaci tracić miljony dalaraŭ, jany jeździać na zakupy ŭ Jeŭropu i ZŠA, adpačyvajuć na elitnych kurortach. Mnohija, praŭda, sutykajucca z chatnim hvałtam: niekalki žonak navat pakinuli krainu z-za emacyjnaha vyharańnia.
Zrešty, Msvaci pakul daloka da svajho baćki: u papiaredniaha karala tady jašče Svazilenda Sabchuzy II było 70 žonak i bolš za 200 dziaciej.
Niadziŭna, što ŭ hramadstvie Esvacini źbirałasia niezadavolenaść, jakaja vypluchnułasia na vulicy ŭ 2021 hodzie. Tryhieram stała śmierć studenta kaledža pry zahadkavych abstavinach. Palicyja zajaviła, što jon zahinuŭ u avaryi, adnak inšyja studenty śćviardžali, što jaho zabili miascovyja siłaviki. Adnačasova častka deputataŭ parłamienta zapatrabavała demakratyzacyi palityčnaj sistemy.
Pratesty ŭ Esvacini. Fota: Foto24 / Gallo Images via Getty Images
Pa ŭsioj krainie pačalisia masavyja pratesty. Jany ŭzmacnilisia, kali karol zabaraniŭ dastaŭlać narodnyja pietycyi ŭ miascovyja abščynnyja orhany samakiravańnia. Msvaci pryciahnuŭ da razhonu pratestaŭ siłavikoŭ i vojska. Palicyjanty ŭžyvali śvietłašumavyja hranaty, haz, stralali pa pratestoŭcach bajavymi patronami. Zatrymanych aktyvistaŭ źbivali i katavali tokam. Pratestoŭcy ŭ adkaz na hvałt z boku siłavikoŭ palili aŭtamabili, kramy i administracyjnyja budynki. Ułady adklučali internet i mabilnuju suviaź.
Pratesty praciahvalisia try hady. Msvaci pry dapamozie hvałtu i represij udałosia pastupova zadušyć narodny ruch. U studzieni 2023 hoda ŭ svaim domie na vačach u žonki i dziaciej byŭ zabity demakratyčny lidar, były palitviazień Tułani Masieka, jaki ŭ svoj čas padavaŭ u sud na karala, a zatym byŭ adnoj z hałoŭnych fihur pratestu suprać Msvaci. Ułady zabojstva nie rasśledujuć.
Ruch za pieramieny, zastaŭšysia biez adnaho ź lidaraŭ, vytchnuŭsia. Apošniaja absalutnaja manarchija Afryki hetym razam vystajała.
Čytajcie taksama:
Prezident Batsvany pahražaje padaryć Hiermanii 20 000 słanoŭ
U Sieniehale apazicyjanier vyjhraŭ prezidenckija vybary praz 10 dzion paśla vychadu z turmy
U Iłana Maska raptam abjaviŭsia «syn z Kienii». Prosić hrošaj na «ŭźjadnańnie z baćkam»
