Jak paviedamlaje vydańnie «Nastojaŝieje vriemia», adna z ukrainskich śpiecsłužbaŭ atrymała dostup da asabistych pierapisak u Telegram rasijskaha hienierał-majora, načalnika štaba 58-j ahulnavajskovaj armii Uzbrojenych sił Rasii Siarhieja Miadźviedzieva. Žurnalistam vydańnia, jakim byŭ pieradadzieny dostup, atrymałasia paćvierdzić sapraŭdnaść pierapiski.
Śćviardžajecca, što ŭ joj šmat asabistaha. Naprykład, paviedamleńni nie tolki žoncy, ale i dźvium kachankam. Razam z hetym mnoha infarmacyi i pa pracoŭnych pytańniach. U adkrytym miesiendžary hienierał dasyłaŭ kaardynaty papadańnia snaradaŭ.
Niekatoryja z atrymanych dakumientaŭ, jakija ŭtrymlivajuć infarmacyju ab vajennych złačynstvach, žurnalisty vyrašyli apublikavać. Siarod ich — «Daviedka-spravazdača ab zabojstvie dvuch hramadzianskich asobaŭ vajennasłužačymi 503 msp».
Skrynšot videa: «Nastojaŝieje vriemia»
U joj apisvajucca padziei, jaki adbylisia ŭ listapadzie 2022 hoda ŭ nievialikim siale Novamichajłaŭka Biardzianskaha rajona Zaparožskaj vobłaści. Jano było akupavana ŭ pieršyja dni poŭnamaštabnaha ŭvarvańnia Rasii va Ukrainu.
Jak vynikaje sa źmiestu dakumienta, rasijski vajenny Batraz Słanaŭ razam ź niekalkimi svaimi sasłužyŭcami pajechaŭ dachaty da miascovych žycharoŭ, jakich ličyli karekciroŭščykami ŭdaraŭ ukrainskich vajskoŭcaŭ pa padraździaleńniach uzbrojenych sił Rasii. Paśla dopytu, jaki nie daŭ vynikaŭ, jany źjechali.
Praz čatyry dni vajennyja vypivali. Jak skazana ŭ spravazdačy, było «piać litraŭ chatniaha vina». Pjany Słanaŭ zhadaŭ ab dopycie i vyrašyŭ paŭtaryć jaho «z katavańniami».
Słanaŭ advioz abodvuch mužčyn u lesapark kala Novamichajłaŭki, dzie za admovu pryznacca zastreliŭ vystrałami ŭ hałavu. Na hetym rasijski vajenny nie spyniŭsia. Viarnuŭšysia ŭ siało, jon zabraŭ žančynu, jakaja była žonkaj adnaho zabitaha i siastroj druhoha. Pa darozie ŭ mašynie jon sprabavaŭ jaje zhvałcić, ale zasnuŭ. U vyniku žančyna źbiehła.
Žurnalisty zdoleli vyśvietlić, što Batraz Słanaŭ maje niekalki sudzimaściej. Na im dva kradziažy i niekalki DTZ u pjanym stanie z paciarpiełymi. Apošni pryhavor — hod kałonii strohaha režymu z pazbaŭleńniem prava kiravańnia na čatyry hady — jon atrymaŭ za dva dni da pačatku vajny.
Ale ŭžo praź niekalki miesiacaŭ mužčyny apynuŭsia ŭ šerahach rasijskaj armii, dzie jaho, nasupierak niekalkim pryhavoram za kiravańnie ŭ pjanym stanie, uziali kiroŭcam. Słužyŭ Batraz Słanaŭ u padraździaleńni «Štorm», kudy biaruć źniavolenych i parušalnikaŭ zahadaŭ.
Pa fakcie zabojstva zaviali kryminalnuju spravu. Było vyśvietlena, što achviary nijakim čynam nie byli źviazany z ukrainskimi siłavikami.
Čytajcie jašče:
Hienierał FSB u adstaŭcy prahnazuje, što ŭkraincam udasca vyjści nazad da Azoŭskaha mora
