Ilustracyjny zdymak, stvorany štučnym intelektam
Vydańnie The Insider padzialiłasia vynikami sumiesnaha z kanałam 60 minutes i Der Spiegel rasśledavańnia. Žurnalisty zdoleli adsačyć maršruty zamiežnych pajezdak słužačych Hałoŭnaha raźviedvalnaha ŭpraŭleńnia Rasii (HRU), jakija papiaredničali vypadkam dziŭnych atak na supracoŭnikaŭ amierykanskich dypłamatyčnych pradstaŭnictvaŭ za miažoju.
U vyniku takich atak ludziam raptoŭna stanaviłasia drenna, jany adčuvali mocny cisk ci bol u vušach, prystupy młosnaści i paniki. Paciarpiełyja havaryli ab adčuvańniach dziŭnych hukaŭ — ci mocnaha šumu ci vysokaha huku, nastupstvaŭ ad jakoha jany nie mahli pazbavicca doŭhi čas.
Miedycynskija testy pakazvali ŭ niekatorych paciarpiełych ślady traŭmaŭ asobnych učastkaŭ hałaŭnoha mozhu. Adzin z samych maštabnych vypadkaŭ adbyŭsia ŭ 2016 hodzie i zakranuŭ supracoŭnikaŭ amierykanskaha i kanadskaha konsulstvaŭ u Havanie. Z-za hetaha jon atrymaŭ nazvu «havanski sindrom».
Apaznańnie HRUšnikaŭ
Raźviedsłužby ZŠA da apošniaha času zajaŭlali, što ŭ ich niama danych adnosna datyčnaści da vypadkaŭ «havanskaha sindromu» inšych krain. Adnak žurnalisty zdoleli parazmaŭlać z paciarpiełymi. U dvuch vypadkach jany apaznali supracoŭnikaŭ vajskovaj čaści 29155 HRU Rasii jak ludziej, jakich bačyli pierad paškodžańniem svajho zdaroŭja.
U pieršym vypadku adzin z paciarpiełych supracoŭnikaŭ amierykanskaha konsulstva ŭ Frankfurcie na zdymku, jaki praz pasrednikaŭ pakazali jamu žurnalisty, paznaŭ mužčynu, jakoha bačyŭ za niekalki tydniaŭ da ataki kala žyłoha kompleksu, dzie pražyvajuć supracoŭniki misii. Jon fatahrafavaŭ terytoryju. Paśla taho, jak ź nieznajomcam pasprabavali pahavaryć, jon chutka syšoŭ.
Na zdymku byŭ supracoŭnik HRU, jaki ŭ kancy vieraśnia —pačatku kastryčnika 2016 hoda znachodziŭsia ŭ Jeŭropie.
U druhim vypadku paciarpiełaja žonka amierykanskaha dypłamata ŭ Tbilisi paznała pa zdymku maładoha čałavieka, jakoha bačyła kala svajho doma niepasredna paśla taho, jak adčuła na sabie ŭździejańnie mahutnaj hukavoj chvali 7 kastryčnika 2021 hoda. Jana navat zmahła jaho sfatahrafavać.
Žurnalisty zdoleli vyśvietlić, što ŭ toj čas za miažoju znachodziŭsia načalnik vajskovaj čaści 29155 Andrej Aviarjanaŭ i jaho syn Albiert. Mienavita apošniaha i bačyła kala svajho doma paciarpiełaja.
Žurnalisty adznačajuć, što supracoŭniki hrupy 29155 namahajucca nie latać napramuju ŭ krainu pryznačeńnia, kab apieracyi było składaniej adsačyć pa pieralotach. Adnak, supastaŭlajučy pracoŭnyja vylety z Rasii kamand HRUšnikaŭ z epizodami «havanskaha sindromu», jany vyjavili cikavyja supadzieńni.
Naprykład, u 2021 hodzie pierad incydentam u Tbilisi hienierał Aviarjanaŭ i jaho kamanda ździajśniajuć jašče niekalki pracoŭnych pajezdak — u Białhrad (Sierbija) i Chanoj (Vjetnam), jakija taksama supali z epizodami «havanskaha sindromu».
Inšyja padobnyja vypadki pieramiaščeńniaŭ hrup ahientaŭ HRU byli vyjaŭlenyja ŭ Kitai padčas rali «Šaŭkovy šlach» u 2016-2017 hadach. A samo rali, jak vyśvietlili žurnalisty, vykarystoŭvałasia dla prykryćcia pieramiaščeńnia ahientaŭ.
Pieramiaščeńni ahientaŭ supali ź incydentami z supracoŭnikami amierykanskich konsulstvaŭ u Šanchai, Piekinie i Huančžoŭ. I takich vypadkaŭ mahło być značna bolej, śćviardžajecca ŭ rasśledavańni.
Adnak žurnalisty adznačajuć, što akramia pieršych dvuch vypadkaŭ apaznańnia, niama pramych dokazaŭ datyčnaści HRU da hetych apieracyj.
Zahadkavaja licenzija
Pralić bolš śviatła na datyčnaść da dziŭnych atak na dypłamataŭ dapamahli dakumienty, jakija zdoleli atrymać žurnalisty.
Ź ich vynikaje, što adzin z supracoŭnikaŭ vajskovaj čaści 29155 padpałkoŭnik HRU Ivan Ciarenćjeŭ atrymaŭ hrant Fonda pierśpiektyŭnych daśledavańniaŭ na indyvidualnuju rabotu pad nazvaju «Patencyjnyja mahčymaści nielatalnaj akustyčnaj zbroi pry vajennych (bajavych) dziejańniach u horadzie».
Fota: The Insider
Nieviadoma, što heta za zbroja. Žurnalisty vykazvajuć zdahadku, što jaho ŭździejańnie hruntujecca na mikrachvalevym vypramieńvańniem.
Jany źviartajuć uvahu, što ŭ adnoj z paciarpiełych byŭ dyjahnastavany sindrom Minova — defiekt, pry jakim u paŭkružnym kanale ŭnutranaha vucha stvarajecca maleńkaja ščylina. U vyniku čałaviek pačynaje adčuvać samyja niaznačnyja huki kštałtu mirhańnia ci ruchu vočnych jabłyk.
Hety sindrom — vielmi redkaja źjava, vyvučeńniem jakoj u Rasii zajmajecca Vajenna-miedycynskaja akademija. A kankretna doktar Siarhiej Čepier, jaki źjaŭlajecca kansultantam hienierała Aviarjanava.
Vypadak Vjetnama
Adzin z žurnalistaŭ, Chrysta Hrozieŭ, jaki pravodzić rasśledavańnia dla The Insider, dapaŭniaje infarmacyju pra zbroju.
Jon śćviardžaje, što ŭ 2021 hodzie rasijski bok padzialiŭsia z vjetnamcami technałohijaj «akustyčnaha vypramieńvalnika LRAD» i «karotkachvalevaha abstalavańnia dla skanavańnia čałaviečaha cieła». Jana była vykarystana dla atak na amierykanskich dypłamataŭ u Chanoi.
LRAD, što rasšyfroŭvajecca jak «akustyčnaja pryłada dalokaha dziejańnia» — heta hukavaja zbroja, jakaja vypuskaje nakiravany huk nadzvyčaj vysokaj hučnaści.
Amierykanskija vajskoŭcy vykarystoŭvajuć hetyja pryłady dla pieradačy papiaredžańniaŭ u palavych umovach, naprykład, dla infarmavańnia ludziej, źmieščanych za pierymietram vajskovaj bazy.
Ale kali pakinuć niekatoryja sistemy LRAD uklučanymi na maksimalnuju hučnaść, to ŭzrovień hukavoha cisku moža dasiahać 162 decybieł. Bolevy paroh čałavieka składaje kala 130 decybiełaŭ.
Hruntujučysia na svaich daśledavańniach, Hrozieŭ padazraje, što Rasija adpraŭlaje zamiežnym uradam padobnyja zbrojevyja technałohii, jakija mohuć być skarystany dla napadaŭ i vyklikajuć «havanski sindrom».
Pryčyny i nastupstvy
Navošta Kramlu mahli spatrebicca takija ataki? Dakładnaha adkazu nichto nie viedaje, ale z razmovaŭ z dypłamatami jasna, što stratehija padziejničała: mnohija supracoŭniki nie chočuć pracavać pa rasijskim kirunku, razumiejučy, što mohuć stać invalidami i pry hetym navat nie atrymać naležnaj dapamohi ― bo mnohija z paciarpiełych sutykalisia z tym, što ich skarhi śpisvali na psichičnaje rasstrojstva.
Žurnalisty spadziajucca, što paśla taho, jak jany zdoleli vyjavić šmat pramych ukazańniaŭ na suviaź incydentaŭ z apieracyjami vajskovaj čaści 29155 HRU, amierykanskija ŭłady mohuć pieraasensavać svajo staŭleńnie da «havanskaha sindromu» i pačać paŭnavartasnaje rasśledavańnie incydentaŭ.
Čytajcie jašče:
