Ilustracyjnaje fota Drive2.ru
5 sakavika zatrymali ŭradženca Bresckaj vobłaści, jaki pracuje naładčykam abstalavańnia ŭ adnoj sa staličnych kampanij. Jaho mašynu na terytoryi Kastryčnickaha rajona Minska zaŭvažyŭ pilny milicyjant Departamienta achovy. Numarnyja ramki aŭtamabila byli z hierbam «Pahonia».
«Pakolki zaraz ukazany simvał vykarystoŭvajecca peŭnaj hrupaj hramadzian jak simvał, jaki identyfikuje i prapahanduje hramadska-palityčnyja intaresy pratesnaj nakiravanaści, było pryniata rašeńnie ab zatrymańni kiroŭcy aŭtamabila, jakim akazaŭsia N.», — havorycca ŭ materyjałach spravy.
Mužčyna pravioŭ noč u IČU, sud prajšoŭ na nastupny dzień.
Minčuk nie pryznaŭ siabie vinavatym u pravaparušeńni. Jon nie admaŭlaŭ, što na jaho mašynie byli ramki z «Pahoniaj», adnak nastojvaŭ na tym, što jon nie vykazvaŭ imi nijakich «hramadska-palityčnych intaresaŭ». Mužčyna skazaŭ, što kupiŭ mašynu hod tamu ŭžo z takimi ramkami. Tady jon spytaŭ u pradaŭca, ci nie budzie prablem z-za «Pahoni», toj adkazaŭ, što «nie pavinna być», i novy haspadar prosta praciahnuŭ vykarystoŭvać ramki.
Adnak sud paličyŭ, što heta naadvarot paćviardžaje jaho vinu, tak jak jon, kuplajučy aŭto, źviarnuŭ uvahu na simvał hierba i razumieŭ jaho značeńnie, ale nie pazbaviŭsia ramak. U vyniku situacyju pryznali pikietavańniem biez dazvołu harvykankama (č.1 art. 24.23 KaAP).
«N. demanstravaŭ na ramcy dla numarnoha znaka aŭtamabila malunak hierba P. u jakaści simvoliki pratesnaha charaktaru mienavita z metaj publičnaha vykazvańnia svaich hramadska-palityčnych intaresaŭ, što stała dastupna niavyznačanamu kołu asob, u suviazi z čym prychodžu da vysnovy, što apošni pryniaŭ udzieł u pikietavańni», — skazaŭ na zakančeńnie sudździa.
Mužčynu pryznačyli 13 dzion administracyjnaha aryštu.
Anałahičny vypadak adbyŭsia ŭ Leninskim rajonie Minska 21 lutaha. Kala 15.30 milicyjant zaŭvažyŭ na adnoj z vulic aŭtamabil z «Pahoniaj» na numarnych ramkach, kiroŭca byŭ zatrymany. Praz dva dni adbyŭsia sud.
Mužčyna, rabotnik pryvatnaj kampanii, pryznaŭ najaŭnaść ramak, ale śćviardžaŭ, što kupiŭ ich niekalki hadoŭ tamu i da ciapierašniaha času ŭžo daŭno zabyŭsia, što na ich majecca simvał «Pahoni». Jon zapeŭnivaŭ, što, pierasoŭvajučysia na svaim aŭtamabili z takimi ramkami, nie pieraśledvaŭ nijakich palityčnych metaŭ.
Sud čakana nie pavieryŭ minčuku. Jaho pryznali vinavatym u niesankcyjanavanym pikietavańni i prysudzili da 11 sutak aryštu.
Čytajcie taksama:
Siłaviki raskazali, jak skarystali ŭ svaich intaresach siamiejnuju dramu
Zaviali kryminalnuju spravu suprać Valera Rusielika
Za kamientary pra «Krokus Sici Choł» zatrymali žychara Ščučyna
