Heta ŭžo nie pieršaja sproba dziaržavy stvaryć sietku łajalnych błohieraŭ, pryčym nie tolki siarod školnikaŭ, ale i ŭ studenckim kole. Raniej, naprykład, hetuju temu aktyŭna prasoŭvaŭ BRSM.
U ich jość svaja internet-premija «IT Youth» (adna ź niaścipłych naminacyj — «Za papularyzacyju dziejnaści BRSM»), a ź niadaŭnich časoŭ jašče i sumiesny ź Ministerstvam infarmacyi konkurs dla maładych žurnalistaŭ i błohieraŭ «Pres-kod».
Stvarać kadry dla dziaržaŭnaj prapahandy, vidać, davieryli i rajonkam z centrami kulturami — «Naša Niva» zaŭvažyła, što amal adnačasova ŭ roznych rehijanalnych ŚMI pačała źjaŭlacca infarmacyja pra ŭłasnyja škoły błohieraŭ. My pahladzieli, jaki kantent tam daviarajuć zdymać moładzi.
U Dokšycach funkcyjanuje nie prosta škoła błohieraŭ, a cełaja Akademija. Adnym ź pieršych zadańniaŭ dla ich stała acanić pracu novaha cira na bazie ahrasiadziby «Marhavica».
Zadalisia błohiery pytańniem, chto chutčej — jany ci supracoŭniki MNS. Adkaz nie toje kab niečakany: «Błohiery mohuć imhnienna stvarać kantent, a voś apranajucca chutčej ratavalniki».
Ale biez palityki nie atrymałasia: maładzionaŭ padradzili zapisvać ahitacyjnyja videaapytanki pierad vybarami.
U Horkach ź pieršym siezonam škoły błohieraŭ niešta nie atrymałasia — vynikaŭ asabliva nie vidać, tamu niadaŭna jany zapuścili novy nabor.
Abiacajuć padtrymku ekśpiertaŭ i zaprošanych žurnalistaŭ. U minułym hodzie siarod ich była, naprykład, studentka žurfaka Nastaśsia Hatoŭčykava, jakaja ŭ intervju rajoncy dzialiłasia:
«Maru pracavać na telebačańni ŭ «Pule Pieršaha».
Hod tamu anansavali kastynh u błohiery Babrujska. «My zrabili staŭku na pakaleńnie digital i alfa. Dla ich škoła žurnalistyki — heta ŭčorašni dzień, a škoła błohieraŭ i kantent-mejkieraŭ — sučasnaść i adkrytyja mahčymaści», — zaachvočvali supracoŭniki babrujskaja dziaržaŭnaj presy.
Hałoŭnym vynikam pracy škoły staŭ śpiecprajekt «Biełaruś pamiataje», pryśviečany Dniu pieramohi.
U Klimavičach škoła błohieraŭ nazyvajecca «Lidar». Tematyka videa — miascovyja rajonnyja mierapryjemstvy, vystavy chatnich žyvioł.
U Krupkach maładzionaŭ časta padklučajuć da akcyj pamiaci achviar vajny.
A voś hadavancam haziety «Biarezinskaja panarama» davieryli raspavieści, jak pierapracoŭvajecca małako na miascovym pradpryjemstvie «Zdravuška-miłk».
Na Homielščynie maštaby zaachvočvańnia błohierstva dasiahnuli cełych źlotaŭ. Štohod u błohaśfiery ŭznaharodžvajuć maładzionaŭ u niekalkich uzrostavych katehoryjach: 14-17 hod i 18-24. Siarod apošnich pieramožcaŭ, naprykład moładzievaja redakcyja «Śvietłahorskich navin» pad nazvaj «New FISHki».
Karespandenty za svoj tvorčy šlach paśpieli šmat: naviedvali aviečkafiermu, źbirali ŭradžaj i prachodzili instruktaž pa ratavańni ludziej z vady.
Hod tamu ŭ Viciebsku adkryli cełuju miedyjałabaratoryju. Čaściej jana vykarystoŭvajecca dla praviadzieńnia majstar-kłasaŭ ź inšymi błohierami, papularnymi pa mierkach Biełarusi.
Ëść u łabaratoryi i svoj tyktok, i pakul samymi kreatyŭnymi rolikami tam źjaŭlajucca niejranaviny. Viadučy — štučny intelekt Bahdan Zavirucha, jakoha my ŭžo bačyli ŭ prahnozie nadvorja na telekanale.
Tyktokaŭ z navinami u akaŭncie miedyjałabaratoryi, praŭda, pakul usiaho try.
Miedyjaanalityk: «Niezajzdrosny los čakaje takija prajekty»
Starejšy analityk Media IQ Paŭluk Bykoŭski kaža, što sproby čynoŭnikaŭ stvaryć kamandy svaich błohieraŭ nahadvaje jamu časy pierabudovy SSSR:
«Farmalnym kamsamolskim važakam u tych ža škołach raptam źvierchu zahadali stać niefarmalnymi lidarami. Ale heta tak nie pracuje. Kali havorka pra škoły błohieraŭ pry redakcyjach dziaržaŭnych ŚMI i BRSM, to naŭrad ci budzie realizavana toje, što zajaŭlajecca. Bo kab hetyja ludzi dumali jak błohiery, to jany b pa-inšamu prasoŭvali svoj kantent u siecivie. Ale takim čynam možna znajści maładych ludziej z peŭnymi pierakanańniami abo kanjunkturščykaŭ, jakija sapraŭdy ŭtvorać puł łajalnych błohieraŭ.
Asobnaje pytańnie, ci zdolejuć jany zrabicca papularnymi? Aŭtarytarny režym stavicca varoža da luboj inicyjatyvy źnizu, navat łajalnaj. Tamu, chutčej za ŭsio, takija prajekty čakaje niezajzdrosny los», — ličyć analityk.
U toj ža čas błohiery, jakija krytykavali režym Łukašenki, užo prajšli praz turmu ci adbyvajuć svoj termin za kratami.
Čytajcie taksama:
«Ja byŭ vatnikam». Novy TOK ź Siarhiejem Piatruchinym
Zhubilisia ŭ biełaruskim jutubie? Voś ažno 17 kanałaŭ — znojdziecie svoj
Čym ciapier zajmajucca błohiery-jabaćki, jakija prasłavilisia ŭ 2020-m
