Stvaralnik «Doma tvorcaŭ» Siaržuk Doŭhušaŭ raskazaŭ Svabodzie, što meta prajektu — padtrymać represavanych biełarusaŭ, dapamahčy im. Pa-pieršaje, psichałahična reabilitavacca, a pa-druhoje — realizavacca tvorča. U vyniku pracy vośmaj rezidencyi i zjaviŭsia novy muzyčny kalektyŭ — Olia Shnip Band.
«My pravodzim konkurs zajavak, adbirajem mienavita represavanych tvorčych asobaŭ. U vośmuju pa liku rezidencyju my zaprasili mienavita arkiestravych muzykantaŭ (strunnyja, duchavyja instrumienty). Chtości raniej pracavaŭ u fiłarmonii, chtości ŭ opiernym teatry, chtości ŭ arkiestry cyrku, jość dziaŭčyna z Ukrainy.
Ideja stvareńnia novaha kalektyvu naležyć Volzie i Antonu Šnipam. Na scenie adnačasova buduć 20 muzykaŭ. Heta Varšaŭski volny arkiestr (Warsaw Freedom Orchestra) i hurt z šaści biełarusaŭ.
Na kancercie buduć hučać i soŭł, i džaz, i hospeł (žanr duchoŭnaj chryścijanskaj muzyki), i fołk. Na apošniaj repietycyi ja pierakanaŭsia, što hledačoŭ čakaje štości bujnoje, niejmaviernaje i hrandyjoznaje», — pryznajecca Doŭhušaŭ.
«Śviatło i nadzieja»
Multyinstrumientalista, saŭndpradziusara Antona Šnipa zatrymali 2 žniŭnia 2021 hodu razam ź inšymi muzykami fentezi-fołk-hurta Irdorath (Nadziejaj i Uładzimiram Kałačami, Piatrom i Julijaj Marčankami) na leciščy pad Mienskam. U «apieracyi» ŭdzielničali ŭzbrojenyja bajcy SACHR i milicyja.
Jahonaj žonki Volhi cudam tam nie było — pajechała raniej pavinšavać baćku z dniom narodzinaŭ. U śniežni 2021 hoda Antona Šnipa asudzili na paŭtara hoda kałonii. Termin jon adbyvaŭ u adnoj z samych žorstkich papraŭčych ustanovaŭ — u Navapołackaj kałonii № 1. Tam jamu ŭdałosia sustrecca ź Viktaram Babarykam. Kali Anton vyzvaliŭsia, jany z Volhaj pierajechali ŭ Polšču.
Volha Šnip — opiernaja śpiavačka i kampazitarka. Zajmajecca muzykaj z 6 hadoŭ, svoj pieršy albom zapisała ŭ 11. Potym było šmat supolnych prajektaŭ z mužam.
«Z astatnimi muzykami my paznajomilisia ŭ Polščy ŭ Domie tvorcaŭ. U kožnaha byli svaje ŭłasnyja prajekty: adzin pracavaŭ u arkiestry cyrka, druhi pijanistam u arkiestry teatru opiery i baletu, treci — kruty džazmen, čaćviorty — u prajektach ciažkaj muzyki, čaćviorty — u fołk-bendach. U kožnaha vialiki dośvied.
Padčas rezidencyi my stvaryli taki bend: dva kłavišniki (kožny sa svaimi «prymočkami«), bas-hitara, bubny, vakał). Da nas dałučylisia muzyki z Varšaŭskaha volnaha arkiestra — my raśpisali dla ich partytury). Usia muzyka majho aŭtarstva: my nie abmiažoŭvajemsia adnym žanram, ličym, što heta art-pop: tudy ŭvachodzić džaz, opiera, rok-muzyka — na luby hust.
My nie bačym siabie ŭ ahresiŭnaj baraćbie, my chočam pakazać svajoj muzykaj ludziam śviatło, nadzieju, što treba ruchacca napierad», — dzielicca Volha Šnip.
Pieršy kancert Olia Shnip Band adbudziecca 18 studzienia ŭ Varšavie na vulicy Pulawska, 114.
Čytajcie taksama:
Nadzieja Kałač z Irdorath zapisała praniźlivuju pieśniu, narodžanuju ŭ kałonii
«Nas pakarali, bo my śpiavali». Hurt Irdorath prezientavaŭ pieśniu «Zorami», napisanuju ŭ kałonii
Hurt Irdorath źbiraje hrošy na adnaŭleńnie dziejnaści. Jaho ŭdzielniki niadaŭna vyjšli z kałonii
