Kandydatka ŭ prezidenty ad Respublikanskaj partyi, byłaja ambasadarka ZŠA Niki Chejli vychodzić na scenu dla ŭdziełu ŭ debatach respublikancaŭ. 6 śniežnia 2023 hoda, Taskałusa, štat Ałabama. Fota: Justin Sullivan / Getty Images
Žyvyja, ale surjoznyja, kiemlivyja, ale źmiastoŭnyja vystupy Niki Chejli na debatach — heta palityčnaja atletyka najvyšejšaj proby. Adna siarod mužčyn, jakija pierakrykvajuć i pierabivajuć jaje, jana adkazvaje śpiecyfična žanočaj chaładnakroŭnaj, ale kancentravanaj ahresijaj. Jana łunaje jak źniščalnik i bje jak rakieta, tak apisvaje jaje manieru debatavać The Wall Street Journal.
I ŭsio heta dapamahło vyrvacca na druhoje miesca ŭ rejtynhach papularnaści respublikancaŭ — praŭda, ź vielizarnym adryvam ad pieršaha. Były prezident Donald Tramp praciahvaje lidziravać u Respublikanskaj partyi, majučy 59% padtrymki, vyjaviła novaje apytańnie na zamovu Wall Street Journal. Tym časam Chejli, u minułym pasoł ZŠA ŭ AAN i hubiernatarka Paŭdniovaj Karaliny, zaniała druhoje miesca z 15%, trochi-trochi abyšoŭšy hubiernatara Fłarydy — u Rona Desancisa 14%. Nivodzin inšy kandydat nie nabiraje dvuchznačnych ličbaŭ.
Prezidenckija debaty respublikancaŭ adbylisia 6 śniežnia ŭ Taskałusie, štat Ałabama. Donald Tramp admoviŭsia ŭ ich udzielničać — dakładniej, admoviŭsia ŭdzielničać u lubych debatach padčas prajmeryz. Na scenu, akramia Chejli i Desancisa, vyjšli pradprymalnik Viviek Ramasvami i eks-hubiernatar Ńju-Džersi Krys Kryści — ahułam čatyry čałavieki.
WSJ paviedamlaje, što padtrymka Trampa ŭ apytańni, praviedzienym u kancy listapada — pačatku śniežnia, nie źmianiłasia ŭ paraŭnańni z apytańniem, jakoje časopis zładziŭ čatyry miesiacy tamu, u toj čas jak rejtynh Chejli padros na siem punktaŭ.
«O, lublu, kali da mianie stolki ŭvahi. Dziakuj vam za heta»
Hledačy zrazumieli, chto pieramahaje ŭ debatach, zadoŭha da ich zakančeńnia: pa škvale napadak supiernikaŭ. Ramasvami nazvaŭ jaje biespryncypovaj i «fašystkaj». Desancis nazvaŭ jaje nieefiektyŭnaj. Kryści nazvaŭ jaje niepaśladoŭnaj.
«O, lublu, kali da mianie stolki ŭvahi, — paryravała Chejli z tonkaj uśmieškaj. — Dziakuj vam za heta».
Na debatach Chejli adstojvaje tradycyjnyja kansiervatyŭnyja pazicyi, asudžaje rost biudžetnych vydatkaŭ i zaklikaje da žorstkaha padychodu da zamiežnaj palityki. Taksama jana pazicyjanuje siabie jak nieprymirymuju prychilnicu žorstkaha kursu ŭ pytańniach nacyjanalnaj biaśpieki.
U sieradu jana pavodziła siabie ŭ tym ža duchu, a mienavita — papiaredziła ab uzajemaźviazanaści pahroz, ź jakimi sutykajecca Amieryka z boku Irana, Rasii i Kitaja. Jana raskrytykavała Trampa, choć i miakčej, čym niekatoryja inšyja vystupoŭcy, zajaviŭšy, što były prezident byŭ słaby ŭ dačynieńni da Kitaja, pry im vyrasła dziaržaŭnaja zapazyčanaść i jon byŭ «chaatyčny».
Jana admachnułasia ad napadak supiernikaŭ na svaich donaraŭ z Uoł-stryt: «Jany prosta zajzdrościać». I jana viedała, jak, kali treba, padniacca nad sutyčkaj: kali nadyšoŭ momant adkazać na asabliva raźjušanuju tyradu Ramasvami ŭ jaje bok, Chejli čmychnuła: «Adkazvać na heta — tolki čas marnavać».
Niki Chejli i hubiernatar Fłarydy Ron Desancis padčas debataŭ. Fota: Justin Sullivan / Getty Images
Supierniki abvinavačvajuć byłuju ambasadarku ŭ tym, što pa hetym i inšych pytańniach jana nie maje akreślenaj pazicyi, a kaža toje, što choča pačuć kankretnaja aŭdytoryja.
Chejli rezka krytykavała Trampa ŭ 2016 hodzie, ale potym abaraniała jaho, kali pracavała ŭ jahonym kabiniecie; jana asudziła jaho paśla biesparadkaŭ u Kapitolii 6 studzienia 2021 hoda, potym zajaviła, što nie budzie bałatavacca suprać jaho, a paśla ŭsio adno ŭklučyłasia ŭ honku.
Tramp zajaviŭ, što ŭ jaje «mazhi kurynyja», ale atakavać jaje jamu ciažej, čym, skažam, Desancisa.
Ci sustreniecca Chejli adnojčy z Trampam?
Tamu z kandydataŭ, jaki lepš za inšych vystupić na debatach, mahčyma, udasca kansalidavać vakoł siabie tych respublikancaŭ, jakija nie chočuć Trampa. Ale jakaja imaviernaść, što takoje moža nasamreč adbycca?
Dobra trymajučysia na debatach, Chejli pavysiła svaju pryvabnaść dla niekatorych vybarščykaŭ.
Adnak biez udziełu Trampa debaty vyhladali druharadnym telešou, adznačaje palityčnaja ahladalnica WSJ Moli Boł.
Pa jaje słovach, ahulnaja karcina zastajecca niaźmiennaja: bolšaść respublikancaŭ padtrymlivaje Trampa, procilehły łahier raskołaty. Mahčymaść, što Chejli vyjdzie na scenu debataŭ z Trampam — nie kažučy ŭžo pra Bajdena — pakul zastajecca pryvidnaj.
Čytajcie taksama:
Voś jak Tramp choča źmianić ZŠA ŭ vypadku svajoj pieramohi
Sienat ZŠA zabłakavaŭ pytańnie ab dapamozie Ukrainie. Bajden nazvaŭ heta «palityčnym šantažom»
Time nazvaŭ čałavieka hoda. Vybar dosyć niečakany (abo čakany)
