Vyjava: vecteezy
U nievialikaj łabaratoryi łondanskaha špitala Guy's and St Thomas' hospital daśledčyki pracujuć z «achviaravańniami» ŭ vyhladzie śviežych fiekalij. Kožny ŭzor uzvažvajuć, praviarajuć na patahiennyja mikraarhanizmy, filtrujuć, centryfuhujuć i zatym vysušvajuć, pierš čym pieratvaryć u parašok, jaki potym u vyhladzie kapsuł buduć prymać pacyjenty.
Navukoŭcam daŭno viadoma, što kišačnik žyvioł, u tym liku čałavieka, poŭny bakteryj, virusaŭ i inšych mikraarhanizmaŭ. Ale tolki niadaŭna my zrazumieli, nakolki važnyja ŭsie hetyja malusieńkija arhanizmy. Mikrabijom — heta nie prosta našy pasažyry, a žyćciova važnaja častka zdarovaha cieła. Udzielniki mikrabijomu dapamahajuć rasščaplać ježu, vyrablać chimičnyja rečyvy, jakija rehulujuć arhanizm, u jakim jany i žyvuć, a taksama dušać rost inšych škodnych dla nas vidaŭ bakteryj.
Adnym z hetych škodnych vidaŭ bakteryj, dla padaŭleńnia jakich raspracoŭvajucca kapsuły, źjaŭlajecca Clostridium difficile — bakteryja, jakaja na siońnia vypracavała ŭstojlivaść da mnohich antybijotykaŭ. Piać kapsuł mohuć pieraadoleć paŭtornuju infiekcyju Clostridium difficile.
Ideja pracesu, viadomaha jak «transpłantacyja fiekalnaj mikrabijoty» (TFM), palahaje na tym, kab skapijavać ekasistemu kišačnika zdarovaha čałavieka i ŭznavić jaje ŭ čałavieka, čyj mikrabijom nie ŭ paradku.
I heta pracuje. TFM užo źjaŭlajecca standartnym srodkam dla lačeńnia infiekcyj C. difficile u Brytanii i zaraz daśledujecca ŭ jakaści srodku suprać samych roznych zachvorvańniaŭ: ad sindromu razdražnionaha kišačnika da raśsiejanaha sklerozu. Ale TFM — heta tolki pačatak revalucyi mikrobnaj miedycyny.
Daśledčyki miarkujuć, što zamiest siońniašniaha adnosna hrubaha padychodu da kapijavańnia mikrabijomu całkam budučynia lažyć u naładžvańni mikrabijomaŭ dla zadavalnieńnia patrebaŭ kankretnaha pacyjenta.
Akramia «fu»-faktaru — jaki, jak kažuć daśledčyki, maje tendencyju adrazu ž źnikać, kali pacyjentam pakazvajuć dokazy taho, što mietad pracuje — TFM sutykajecca ź niekalkimi prablemami. Vidavočna, sam achviaravany stuł niemahčyma standartyzavać: jon rozny ŭ roznych donaraŭ i rozny ŭ roznyja momanty ŭ adnaho i taho ž donara.
Tamu hety mietad lačeńnia ciažka rehulavać paśladoŭna. ZŠA i Kanada pakul razhladajuć tabletki TFM jak doślednyja leki. U Italii, Niderłandach i Bielhii TFM razhladajecca jak pierasadka tkanak. Brytanija ž ličyć jaje lekavym srodkam, što dazvalaje brytanskim miedykam być bolš hnutkimi ŭ rehulavańni.
Zastajecca adkrytym pytańnie, ci stanie mahčymym vylečvać chraničnyja zachvorvańni z dapamohaj TFM. Niekatoryja hastraenterołahi ličać, što navat kali zamianić uvieś mikrabijom, pieravahi ad lačeńnia buduć časovymi, kali nie vylekavać asnoŭnaj pryčyny.
Vyprabavańni z bakteryjami miž tym uskładniajucca deficytam samich bakteryj, vyrablenych u adpaviednaści z dastatkova vysokimi standartami biaśpieki. Tamu navukoŭcy raspracoŭvajuć taksama mietady vytvorčaści, jakija adpaviadali b nieabchodnym strohim praviłam. U Čykahskim univiersitecie razrablajuć śpiecyjalnuju ŭstanoŭku, jakaja zmoža vyrablać bakteryi partyjami pa 50 litraŭ i spadziajucca, što atrymajuć siertyfikacyju da kanca hetaha hoda. Kali heta adbudziecca, to ŭžo ŭ pačatku novaha hoda navukoŭcy spadziajucca pravieści kliničnyja vyprabavańni manipulacyi ź mikrabijomami pry zachvorvańniach piečani.
Pramysłovaść taksama demanstruje zacikaŭlenaść. Niekalki bijatechnałahičnych firmaŭ nieŭzabavie majuć raspačać vyprabavańni novych mietadaŭ. U krasaviku 2023 h. amierykanskaje Upraŭleńnie pa kantroli za praduktami i lekami (hałoŭny amierykanski rehulatar) uchvaliła pradukt pad nazvaj SER-109 — terapieŭtyčny mikrabijom dla vykarystańnia suprać paŭtornych infiekcyj C. difficile. Ciapier daśledčyki vypraboŭvajuć novy preparat SER-155 dla pacyjentaŭ, jakija pieranieśli transpłantacyju kryviatvornych stvałavych kletak (heta mietad lačeńnia takich zachvorvańniaŭ, jak lejkiemija, pry jakim stvałavyja kletki kaściavoha mozhu pierasadžvajucca dla ŭmacavańnia imunnaj sistemy pacyjenta). Hety praces, pry jakim pacyjentu časta naznačajuć vysokija dozy antybijotykaŭ, moža surjozna paškodzić mikrabijom, što ŭskładniaje baraćbu ź niebiaśpiečnymi infiekcyjami. Pieršyja vyniki, pa słovach daktaroŭ, vyhladajuć šmatspadzieŭnymi, tamu niekatoryja ŭžo nazyvajuć novyja preparaty lekami nastupnaha pakaleńnia.
Čytajcie taksama:
Jak miljardy mikraarhanizmaŭ u kišečniku mohuć umacavać vaša psichičnaje zdaroŭje
