Biełaruskaja mastačka Darja Siamčuk stvaraje raboty pad psieŭdanimam Ciemra. Jaje piersanalnyja vystavy prachodzili ŭ Prazie i Varšavie.
Fota: sajt mastački
Zmročnaje imia dziaŭčyna abrała nie vypadkova: praz svaju pracu jana imkniecca źviarnuć uvahu na aktualnyja prablemy sučasnaści. Darja kaža:
«Z dapamohaj svajho kanceptualnaha mastactva ja apuskajusia ŭ ciomny i balučy bok čałaviečaj natury. Ja kirujusia vieraj u toje, što, dziakujučy tvorčaści i samavyjaŭleńniu, možna natchnić na pieramieny i addać daninu pavahi achviaram niespraviadlivaści».
Fotazdymki: Hanna Šot
Ciemra doŭha dumaje nad kanceptam karcin, staranna źbiraje infarmacyju. Ale taki padychod zajmaje šmat času i tamu abmiažoŭvaje kolkaść rabot, jakija mastačka moža stvarać u hod — za hety termin u jaje vychodzić usiaho niekalki novych pałotnaŭ. Darja zadumałasia, jak pašyryć hety pakazčyk:
«Kožnamu mastaku patrebnaja małaja forma, jakaja sychodziła b u narod. U jakaści takoj ja abrała chustki».
Fotazdymki: Hanna Šot
Raspracoŭvajučy kalekcyju, majstarka adrazu vyklučyła ŭžyvańnie šoŭku — chaciełasia, kab vyraby adpaviadali viehanskim standartam. Tak za asnovu byŭ uziaty sučasny paliester.
Fotazdymki: Hanna Šot
U chustkach zašyfravanyja dva mietapasłańni. Pieršaje nahadvaje pra Biełaruś:
«Usie maje pracy prasiaknuty biełaruskim kodam. Žyvučy ŭ emihracyi, ja ŭbačyła, što biełarusy sprabujuć zachavać svaju samabytnaść i šukajuć simvały, jakija dapamahali b im adroźnivać «svaich» u natoŭpie. Sama ja taksama adčuvaju hetuju nieabchodnaść».
Fotazdymki: Hanna Šot
Kab stvaryć reč, z dapamohaj jakoj čałaviek moh by raskazać pra svaje karani, Darja upryhožyła chustki biełaruskimi słovami, napisanymi «łacinkaj». Frazy niasuć u sabie ŭspaminy ab domie i dobra zrazumiełyja kožnamu: BIEŁARUSAČKA, SPADČYNA. Darečy, mienavita takija nazvy majuć karciny, pa matyvach jakich zrobleny aksiesuary.
Fotazdymki: Hanna Šot
Druhi pasył zaklikaje kuplać pracu mastakoŭ, jakija žyvuć ciapier. Ciemra tłumačyć:
«Mnie zdajecca, ludzi časam zabyvajucca pra kaštoŭnaść mastactva i jaho pryznačeńnie. Sučasny hladač nie razumieje, jakuju važnuju rolu adyhryvaje ŭ zachavańni i prasoŭvańni biełaruskaj kultury. Mnie b chaciełasia nahadać, što mastakam važnaja padtrymka i zvarotnaja suviaź».
I dadaje: «Mastactva adlustroŭvaje i farmuje kulturu jak hledača, tak i maju. Tamu padtrymlivajcie lubimych mastakoŭ!»
Fotazdymki: Hanna Šot
Prezientacyja chustak projdzie ŭ Varšavie 16 listapada. Pieršaja kalekcyja budzie limitavanaj — usiaho 35 rečaŭ.
