Dźmitryj Słuk. Kałaž: «SB»
Adnych karajuć vializarnymi terminami, inšym — dajuć adkupicca.
Starejšy śledčy Śledčaha ŭpraŭleńnia USK pa Minsku Andrej Ščahłoŭ raspavioŭ pra prysud Dźmitryju Słuku, jakomu za danat «Kibierpartyzanam» u 0,4 bitkoina (na momant pieravodu — kala 2 000 dalaraŭ) prysudzili 8,5 hoda pazbaŭleńnia voli.
«Nadajučy kvalifikacyju tym ci inšym dziejańniam čałavieka, my ŭ pieršuju čarhu vyvučajem jaho asobu i stupień jaho radykalnaj skiravanaści. My vyśvietlili, što Słuk sačyŭ za dziejnaściu dadzienaha farmavańnia, padtrymlivaŭ jaho, tamu i adpraŭlaŭ hrošy», — rastłumačyŭ śledčy łohiku, čamu adnyja płaciać vielizarnyja adkupnyja za danaty, a inšych kidajuć u turmu.
Śledčy nastojvaje na tym, što nie maje značeńnia, kali arhanizacyja pryznana ekstremisckaj ci terarystyčnaj. «Pryznańnie ich takimi — heta vynik dziejnaści, a nie adpraŭny punkt dla kvalifikacyi dziejańniaŭ. Pa zakonie adkaznaść nadychodzić za finansavańnie dziejnaści, ale nijak nie kankretnaha farmavańnia», — małazrazumieła tłumačyć jon.
Ale jość tyja, kamu dajuć adkupicca, praŭda, šalonymi hrašyma. U artykule heta nazyvajecca «pravam na pamyłku».
Mieniedžara pa prodažach Jahora Čyrejčyka, jaki zadanaciŭ u adnu z arhanizacyj 100 dalaraŭ, vyzvalili ad kryminalnaj adkaznaści, «dali mahčymaść raskajacca i viarnucca da žonki i małaletniaha dziciaci».
— U jaho byŭ adzin płaciež, a padčas śledčych mierapryjemstvaŭ my pryjšli da vysnovy, što jon nie radykał, a čałaviek, jaki prosta spatyknuŭsia. Jon pryznaŭ pamyłku.
«Mužčyna pieraličyŭ bolš za 30 tysiač biełaruskich rubloŭ na rachunak arhanizacyi, jakaja ŭziała na siabie kłopaty, źviazanyja z vychavańniem bolš za 280 dziaciej-sirot», — raspavioŭ Andrej Ščahłoŭ.
Jašče adzin prykład «humanizmu» sistemy. Alaksandr Darafiejeŭ, hramadzianin Kazachstana, «paśpiachovy ajcišnik», jaki ŭ Biełaruś pierajechaŭ u 2019-m, zrabiŭ u 2020 hodzie danat bolš za tysiaču dalaraŭ.
«Jaho zatrymali. Adnak užo na dopytach Darafiejeŭ pryznaŭ vinu, ščyra raskajaŭsia i dobraachvotna pieraličyŭ na raźlikovy rachunak Respublikanskaha navukova-praktyčnaha centra dziciačaj ankałohii, hiematałohii i imunałohii bolš za miljon biełaruskich rubloŭ!» — piša vydańnie.
«Adnak dla tych, chto śviadoma vyrašyŭ parušyć zakon, nijakich paturańniaŭ nie budzie», — dadaje prapahanda.
Čytajcie taksama:
Za danaty biełaruskim dobraachvotnikam va Ukrainie prahramistu dali šeść hadoŭ kałonii
Biełarusy raskazali, jak na miažy ich prymušali pryznacca ŭ danatach
