Miesca raźmiaščeńnia budynka piersijarni na płanie horada i jaho hałoŭny fasad. Z knihi «Madžarskija: armianski rod u historyi Biełarusi».
Daśledčykam udałosia adšukać vyjavu Słuckaj piersijarni 1797 hoda pry padrychtoŭcy fundamientalnaj manahrafii pra stvaralnikaŭ manufaktury «Madžarskija: armianski rod u historyi Biełarusi».
Pamyłka pajšła ad knihi «Našy kaścioły. Minskaja archidyjacezija», apublikavanaj u 1913 hodzie ksiandzom i historykam Juzafatam Žyskaram, dzie było źmieščana fota dvuchpaviarchovaha muravanaha budynku ŭ Słucku, padpisanaha jak «byłaja fabryka litych pajasoŭ».
Kamianica biblijateki Słuckaha jezuickaha kalehiuma, jaki prymali za budynak piersijarni.
Ale, jak davodziać daśledčyki, u słuckich piersijaraŭ nikoli nie było muravanych budynkaŭ. Ksiondz Žyskar, vidavočna, nie źbiraŭsia ŭvodzić u zman čytačoŭ, a prosta zafiksavaŭ haradskuju lehiendu, jakaja bytavała ŭ Słucku na miažy XIX i XX stahodździaŭ. Muravany dvuchpaviarchovy budynak sapraŭdy znachodziŭsia pobač ź miescam kolišniaj piersijarni, ale byŭ budynkam biblijateki byłoha jezuickaha kalehiuma. U kalehiumie ŭ kancy 1760-ch z usioj vierahodnaściu vučyŭsia Lavon Madžarski, syn zasnavalnika słuckaj manufaktury i jaje budučy kiraŭnik.
Frahmient płana horada 1792 hoda. Pad ličbaj 5 — biblijateka jezuickaha kalehiuma, pad ličbaj 9 — słuckaja piersijarnia. Z knihi «Słuck na starych płanach»
Jak viadoma, fabryka z 1760-ch hadoŭ raźmiaščałasia ŭ byłych kazarmach hrand-muškiecioraŭ, dvuch charakternych vyciahnutych budynkach, adlustravanych na mnohich płanach horada. Paśla śmierci Karala Stanisłava Radziviła ŭ 1790 hodzie i pierachodu Słucka pad uładu Rasijskaj impieryi ŭ 1793 piersijarnia pačała zaniepadać.
U kancy 1790-ch hadoŭ źjaviŭsia prajekt pieraabstalavańnia častki budynkaŭ pad kazarmy Nizoŭskaha piachotnaha pałka rasijskaj impieratarskaj armii. Prajekt pieraabstalavańnia («Kvartał, hdie nynie naznačajetsia vystroiť kazarmy dla odnoho bataliona Nizovskaho połku, i hdie sostojat vietchije kniazia Radiviła šiołkovyje fabriki»), składzieny ŭ 1797 hodzie minskim hubiernskim architektaram Fiodaram Kramieram, tak i nie byŭ realizavany na praktycy, ale dziakujučy jamu zachavaŭsia vyhlad budynka, važnaha dla biełaruskaj historyi.
Słuckaja mini-CEC na miescy kolišniaha jezuickaha kalehiuma i manufaktury pajasoŭ. Fota: Minskenierha
Siońnia na terytoryi byłoj piersijarni i jezuickaha kalehiuma nie zastałosia nivodnaha histaryčnaha budynka — na ich miescy za savieckim časam pabudavanaja mini-CEC № 2.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Vyjšła kniha pra stvaralnikaŭ Słuckaj piersijarni
U Słucku pastavili pamiatny znak z pamyłkaj u imieni piśmieńnika, ale čynoŭniki jaje nie pryznajuć