Fota: Getty Images
Jak anhlijskija ultras stali modnymi trendsetarami
Novy trend vyjšaŭ z ruchu «Ultras». Ruch «Ultras» — asablivaja katehoryja spartyŭnych fanataŭ. Heta jany stvarajuć atmaśfieru padčas matčaŭ: prynosiać barabany i fajery. Pry hetym, akramia lubovi da sportu, ultras viadomyja svajoj vajaŭničaściu i chulihanstvam.
Anhlijskija fanaty, jakija naležali da ruchu i asabliva słavilisia luboŭju da bojek, imknulisia znajści elemienty adzieńnia, jakija pa-za miežami stadyjonaŭ adroźnivali b ich ad prychilnikaŭ supraćlehłaj hrupy. Pry hetym adkryta vykarystoŭvać fanackuju atrybutyku było nielha, kab lišni raz nie pryciahvać uvahi palicyi.
Tak, u 1970-ja hady ŭ maładziožnym paŭsiadzionnym harderobie stali źjaŭlacca rečy, niejmaviernyja dla pradstaŭnikoŭ starejšaha pakaleńnia taho času: spartovyja harnitury, krasoŭki i schavanyja pad viatroŭkami kašuli-poła z łahatypami kłubaŭ. Stvarajučy aŭtfity, adny fanaty sprabavali prytrymlivacca firmovych koleraŭ ulublonaj kamandy, inšyja — vybirali asobnyja brendy.
Naratyŭ, što peŭnaja marka moža stać «uniformaj» udzielnikaŭ «Ultras», zamacavała kino.
Kadr sa stužki «Firma»
Naprykład, paśla vychadu na ekrany filma «Heta — Anhlija» firma Ben Sherman stała papularnaj u skinchedaŭ. Padčas praviadzieńnia mižnarodnych matčaŭ pa klatčastych kašulach možna było vyznačyć amatara futboła ź Vialikabrytanii.
Fota: zatrymańnie futbolnaha fanata ŭ kašuli ad Ben Sherman. Šefiłd, 1971 hod
Druhi film — «Chulihany Zialonaj vulicy» — zrabiŭ papularnym brend Stone Island. Asablivaj pavahaj siarod radykalnych fanataŭ ciapier karystajucca ich kurtki: jany vydatna abaraniajuć ad choładu, vietru i daždžu, a taksama dosyć tryvałyja, kab pieražyć čarhovuju bojku.
Kadr ź filma «Chulihany Zialonaj vulicy», hałoŭny hieroj u płaščy ad brenda Stone Island
U 1980—1990-ja chulihanskaj ramantykaj ruchu stali natchniacca viadomyja brendy: Burberry, Aquascutum, Prada, Armani, Ralph Lauren, Henri Lloyd, Paul & Shark pačali vyrablać madeli, aryjentavanyja na amataraŭ futboła.
Kadr z kino «Firma», hałoŭny hieroj u płaščy ad Burberry
Zrešty nie ŭsie marki byli radyja lubovi zaŭziataraŭ. U 1982 hodzie viadomy vytvorca spartovaha abutku New Balance apynuŭsia ŭ centry reputacyjnaha skandału. Radykalnyja fanaty i prychilniki nacyjanalistyčnych pohladaŭ acanili jakaść pradukcyi i pačali chadzić na razborki ŭ hetych krasoŭkach. U vyniku brendu pryjšłosia prykłaści šmat namahańniaŭ, kab pierastać asacyjavacca z uniformaj ahresiŭnych fanataŭ i adeptaŭ ultrapravych pohladaŭ.
U siaredzinie dzievianostych — nulavych uzmacnieńnie žorstkaści ŭład da ultras pryviało da źmien unutry samoj subkultury. Fanaty stali prajaŭlać mienš ahresii za miežami stadyjonaŭ — heta aznačała, što adziavacca ŭ futbolny mierč ciapier było biaśpiečna dla zvyčajnych ludziej.
Śpiavak Oasis Lijam Hałachier (źleva) i jaho brat, hitaryst Noeł Hałachier (sprava), u futbołkach «Mančester Sici», 1994 hod. Fota: Kievin Kamins / Getty Images
A takija muzyčnyja kalektyvy, jak Oasis i Happy Mondays, jakija vykarystoŭvali elemienty fanackaha adzieńnia dla stvareńnia svaich łukaŭ, vyvieli spartovyja rečy ŭ masy, dalokija ad sportu.
Błokkor zavajoŭvaje sacsietki
Siońnia luboŭ da futbolnych cišotak pieražyvaje druhoje naradžeńnie, dla ich navat prydumali asobnuju nazvu — «błokkor». Słova pajšło ad anhlijskaha «bloke» — što na słenhu brytanskich futbolnych jutubieraŭ aznačaje «bratka / bro», i ad «core» — abaznačeńnia roznych stylovych napramkaŭ.
Fota: instahram
Aŭtar termina — amierykanski tyktok-błohier Brendan Chantli. Jašče ŭ 2021 hodzie chłopiec apisaŭ hetaj nazvaj svoj paŭsiadzionny łuk, jaki składaŭsia z fanackaj majki i džynsaŭ. «Samy haračy trend 2022-ha — błokkor», — napisaŭ jon u svaich sacsietkach. Post zavirusiŭsia, a sam trend pačaŭ nabirać abaroty.
Siońnia tolki ŭ tyktoku bolš za 450 miljonaŭ ludziej šukajuć infarmacyju, jak stylizavać futbolnyja majki z paŭsiadzionnym adzieńniem, praz adnajmienny chešteh. Haračy trend padtrymlivajuć i suśvietnyja znakamitaści. Naprykład, aŭtfit sa spartyŭnaj cišotkaj zrabiła śpiavačka Ryjana.
Fota: sacsietki śpiavački Ryjany
Admysłovym šykam ličacca majki minułych siezonaŭ. Adnu z takich nadzieła amierykanskaja zorka armianskaha pachodžańnia Kim Kardašjan. Jana źjaviłasia na publicy ŭ redkaj čornaj futbołcy PSŽ siezona 2001/2002. Paźniej, u lutym 2023-ha, Kardašjan pieraapranułasia ŭ retraformu «Romy» siezona 1997/1998.
Fota: sports.ru
Hety łuk pajšoŭ na karyść italjanskamu kłubu: tolki za dva dni kolkaść internet-zapytaŭ z nazvaj kamandy pavialičyłasia ažno na 3000%.
Što prapanujuć brendy
Marki adzieńnia taksama sprabujuć uhnacca za trendam. Naprykład, spartovy brend Adidas vypuściŭ futbolnyja majki z bavoŭny, kamfortnyja dla paŭsiadzionnaj noski. Admietnaja rysa novych cišotak — adsutnaść łahatypaŭ sponsaraŭ kamandaŭ.
Fota: instahram brenda
U svaich ekśpierymientach z błokkoram łondanski brend Wales Bonner pajšoŭ jašče dalej. Na padmostkach Tydnia mody ŭ Paryžy jaho dyzajniery prezientavali novy pohlad na kašulu Adidas Jamaica: jana stała bolš prytalenaj i paŭsiadzionnaj.
Fota: instahram brenda
Adnak najvyšejšym stylistyčnym piłatažam zastajecca ŭmieńnie znachodzić futbolnyja cišotki ŭ sekand-chendach. Tak modniki traplajuć adrazu ŭ dźvie aktualnyja tendencyi — błokkor i bieražlivaje staŭleńnie da pryrody i adzieńnia.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
