Andrej Pačobut na sudzie. Fota: BiełTA
Adnosiny Minska z kansiervatyŭna-nacyjanalistyčnym uradam PiS byli vyklučna napružanyja. Łukašenkaŭcy vykarystoŭvali Polšču ŭ jakaści župieła, aryštoŭvali aktyvistaŭ polskaj mienšaści ŭ Biełarusi. Varšava taksama abvinavačvała Minsk u stvareńni štučnaha mihranckaha kryzisu, pik jakoha zdaryŭsia ŭ listapadzie 2021 hoda, za 4 miesiacy da napadu Rasii na Ukrainu.
Vyniki vybaraŭ u Polščy, što adbylisia 15 kastryčnika, aznačajuć, što novy ŭrad sfarmuje kaalicyja libieralna-kansiervatyŭnaj «Hramadzianskaj kaalicyi», centryscka-sialanskaj «Treciaj darohi» i «Lavicy».
Heta stvaraje chaj sabie i farmalnuju, ale nahodu dla razradki.
Ci zdarycca jana, zaležyć vyklučna ad Alaksandra Łukašenki, bo Varšava demanstravała hatoŭnaść da vypracoŭki ŭmoŭnych «praviłaŭ nienapadu».
Sihnałam pra namiery Minska stanie vyzvaleńnie ci nievyzvaleńnie Andreja Pačobuta — intelektualnaha lidara palakaŭ Biełarusi i karespandenta polskich vydańniaŭ. Mienavita ŭ adkaz na prysud Pačobutu ŭ lutym 2023 hoda Polšča zakryła pahraničny pierachod Bierastavica (Babroŭniki).
U adkaz na vyzvaleńnie Pačobuta Varšava adkryje hety pierachod, i, takim čynam, hadzińnik kanfrantacyi budzie pieraviedzieny trochi nazad.
Dla razradki spatrebiacca i inšyja kroki, ale biez vyzvaleńnia Pačobuta jana adnaznačna niemahčymaja.
U hetym pytańni jość i toj niuans, što Pačobut byŭ karespandentam «Haziety Vyborčaj», blizkaj da «Hramadzianskaj kaalicyi», lidar jakoj, Donald Tusk, i stanie, najchutčej što, novym premjer-ministram Polščy.
Pačobuta, nahadajem, aryštavali 25 sakavika 2021 hoda razam z Anžalikaj Borys i jašče niekalkimi dziejačami polskaj kultury. Astatnich aryštavanych, usie jany byli žančyny, paśla vypuścili — za ich pa prośbie Polščy chadajničaŭ eks-prezident Kazachstana Nursułtan Nazarbajeŭ. Pačobuta nie vypuścili, bo jon kateharyčna admoviŭsia padpisać prašeńnie ab pamiłavańni, što było ŭmovaj Łukašenki. U pačatku 2023-ha jaho zasudzili na vosiem hadoŭ kałonii strohaha režymu pa nadumanych abvinavačvańniach. Ën adzin ź niekalkich tysiač palityčnych źniavolenych u Biełarusi, a aktyvisty Sajuza palakaŭ — siarod tych dziasiatkaŭ tysiač hramadzian Biełarusi, suprać jakich zaviedzienyja palityčna matyvavanyja kryminalnyja spravy.
Nahadajem, što masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy sa źviestak z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ ułady.
Łukašysty pieraśledujuć usich, chto publična vystupaŭ suprać ich kiravańnia i suprać rasijskaha kantrolu nad Biełaruśsiu.
Z 2022 hoda, paśla napadu Rasii na Ukrainu, biełarusaŭ pačali pieraśledavać taksama za antyvajennyja vykazvańni abo simpatyi da Ukrainy.
Zhodna z padlikami pravaabaroncaŭ, z 2020 hoda ŭ krainie adbyłosia nie mienš za 55 tysiač palityčna matyvavanych zatrymańniaŭ. Pa infarmacyi prakuratury, zaviedziena nie mienš za 12 tysiač kryminalnych spraŭ «ekstremisckaj skiravanaści», heta značyć, palityčnaha charaktaru.
Kali vam važna toje, što robić «Naša Niva», to dapamahčy nam možna praz Patreon pa spasyłcy nižej.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
