Ciapier zaviaršajucca ramontnyja raboty ŭ Žyrovickim Śviata-Uśpienskim sabory. Pavodle słoŭ namieśnika ministra kultury Siarhieja Sarakača, da 2025 hoda, akramia biahučaha ramontu ŭ chramie, płanujecca vykanać restaŭracyju i adnaho z najstarejšych u krainie ikanastasa.
U Žyrovičy ŭžo vyjazdžali śpiecyjalisty Nacyjanalnaha mastackaha muzieja, supracoŭniki «Biełrestaŭracyi», jakija vyvučali situacyju. Było praviedziena abśledavańnie stanu ikanastasa, vyjaŭleny tyja elemienty, jakija nieabchodna adnavić abo poŭnaściu zamianić. Raboty, na dumku namieśnika ministra, čakajucca surjoznyja. Jon spadziajecca, što srodki na ich buduć adšukany.
Vyhlad ikanastasa da 2009 hoda
Pieršapačatkova va Uśpienskim sabory byŭ tolki centralny ikanastas, pabudavany kala 1730 hoda, jaki dobra zachavaŭsia da našych dzion. U 1779 hodzie dla rośpisu hetaha ikanastasa, jak i ikanastasa Jaŭlenskaj carkvy, byŭ zaprošany majstar Ryhor Miadźviedski. Ikanastas sabora vykanany ŭ charakternym styli baroka. Źviartajuć na siabie ŭvahu abrazy apostałaŭ, centralnaja vyjava «Spasa Usiedziaržyciela» ŭ siarebranaj ramie. Bakavy ikanastas chranałahična adnosicca da ramontu chrama ŭ 60-ja hh. XIX st., a taksama siarebranyja šaty na vyjavach.
Pastupovaja zamiena biełaruskich baročnych abrazoŭ na «psieŭdaruskija»
U 2009 hodzie pa błahasłavieńni Patryjaršaha Ekzarcha ŭsiaje Biełarusi Mitrapalita Minskaha i Słuckaha Fiłareta siem staradaŭnich abrazoŭ ź ikanastasa Uśpienskaha sabora byli pieradadzieny Žyrovickim manastyrom u Nacyjanalny mastacki muziej Respubliki Biełaruś. Baročnyja abrazy byli zamienieny na sučasnyja, jakija vykananyja ŭ nibyta «staražytnaruskim styli» inakiniaj Anfisaj. Hetyja abrazy źjaŭlajucca dysharmaničnymi ŭ dačynieńni da baročnaha ikanastasa i baročnych interjeraŭ chrama.
Ci viernucca ŭ ramkach restaŭracyi histaryčnyja abrazy abo ich kopii, namieśnik ministra kultury nie paviedamiŭ.
Čytajcie taksama:
Pad Navahrudkam adnavili kapličku. Ramont jaje niečakanym čynam sastaryŭ
