Ilustracyjnaje fota: «Naša Niva»
Karotkačasovaje i doŭhačasovaje adnaŭleńnie cnatlivaści: u čym adroźnieńnie?
Himien — heta miedycynskaja nazva cnatlivaści. Praceduru jaje adnaŭleńnia nazyvajuć himienapłastykaj.
Jość dva varyjanty adnaŭleńnia himienu — karotkačasovy i doŭhačasovy.
Pieršy mahčymy ŭ tym vypadku, kali ŭ žančyny ŭ anamniezie nie było ciažarnaściaŭ. U hetym vypadku chirurh sšyvaje reštki himienu chirurhičnymi nitkami, jakija za paru tydniaŭ rassmoktvajucca. Niuans u tym, što ŭ hetym vypadku efiekt karotkačasovy — paŭtorna stracić cnatlivaść treba na praciahu niekalkich tydniaŭ paśla zakančeńnia adnaŭlenčaha pieryjadu.
Ale niekatoryja miedycynskija centry krytykujuć hety mietad tamu, što kachanku moža nie spadabacca vynik. «Mužčyna, choć i adčuvaje razryŭ, ale adsutnaść kryvacioku skiroŭvaje jaho dumki ŭ niepažadanym napramku. Z usich mahčymych apieracyj himienapłastyki samaja nadziejnaja — heta ŭšyvańnie tkanki pochvy. Takaja mietodyka harantuje zachavańnie cnatlivaści da pieršaha pałavoha kantaktu, navat kali jon adbudziecca praź niekalki hadoŭ. Paśla takoj apieracyi kryvaciok u momant «pazbaŭleńnia cnatlivaści» byvaje navat bolš vyjaŭlenym, čym pry pieršaj defłaracyi».
Abodva mietady vykonvajucca pad miascovaj aniestezijaj i nie patrabujuć špitalizacyi. Adnak doŭhačasovaje adnaŭleńnie moža być praviedziena pad ahulnym narkozam pa žadańni žančyny.
Kolki kaštuje adnavić cnatlivaść u Minsku
Himienapłastyku možna zrabić navat u dziaržaŭnaj ustanovie achovy zdaroŭja. Naprykład, na sajcie relax.by paznačana, što ŭ 1-j haradskoj kliničnaj balnicy Minska adnaŭleńnie cnatlivaści kaštuje 162,24 rubla. I heta samy maleńki košt, jaki ŭdałosia znajści ŭ Minsku.
Praŭda, nie ŭdakładniajecca, pra karotkaterminovuju ci doŭhaterminovuju himienapłastyku kažuć.
U elitnych miedycynskich centrach za himienapłastyku pryjdziecca addać da dźviuch tysiač rubloŭ.
My źviarnulisia ŭ adnu z pryvatnych klinik, jakaja prapanuje klijentkam takuju pasłuhu, i spytali, ci časta biełaruski robiać himienapłastyku, a taksama nakolki heta biaśpiečnaja apieracyja i ci byvajuć paśla jaje ŭskładnieńni. Voś jaki adkaz atrymali: «Tak, my davoli časta robim himienapłastyku. Heta biaśpiečna. Ale, jak i paśla luboj apieracyi, treba viedać, jak pravilna pavodzić siabie ŭ paślaapieracyjnym pieryjadzie».
Navošta robiać himienapłastyku?
Nijakich miedycynskich pakazańniaŭ da praviadzieńnia himienapłastyki niama.
Heta robicca čysta z kulturnych mierkavańniaŭ. Choć Biełaruś nie vielmi relihijnaja i kansiervatyŭnaja kraina, dzie cnatlivaści da šlubu nadajecca vialiki sens, ale mnohim heta važna. Možna zhadać palitołaha Vadzima Baravika, jaki prapanoŭvaŭ dadavać niavińnicam bały na centralizavanym testavańni. Praŭda, dalej za ahučvańnie idei sprava nie pajšła.
Na sajcie centra płastyčnaj chirurhii «Edaran» napisana, što himienapłastyku možna zrabić, kali rychtuješsia da viasiella.
Jašče adna z pryčyn, pa viersii centra, — žadańnie zrabić bolš zajmalnym intymnaje žyćcio. Paznačana, što adnaŭleńnie cnatlivaści moža być i «padarunkam» dla kachanaha.
Na sajcie medplastic.by žančyn taksama zapeŭnivajuć, što himienapłastyka — heta dobry padarunak mužu na dzień naradžeńnia ci hadavinu viasiella.
Miedycynski centr «Antes Mied» uvohule ličyć, što adnaŭleńnie cnatlivaści možna zrabić u jakaści siurpryzu mužčynu: «Taki niečakany «padarunak» dla mužčyny vielmi kaštoŭny. Tamu žančyny ŭsio čaściej źviartajucca da himienapłastyki, kab aśviažyć seksualnyja pačućci, padkreślić svajo asablivaje staŭleńnie da pałavoha partniora».
Miedycynski centr «Antes Mied» śćviardžaje, što himienapłastyka dapamoža adnavić vastryniu adčuvańniaŭ u intymnym žyćci.
Miedycynski centr «Klinika va Uruččy» pajšoŭ jašče dalej: «Paśla apieracyi možna paradavać svajho partniora, pavysić jaho libida i žadańnie intymnaj blizkaści. Takaja demanstracyja taho, na jakija achviary moža pajści žančyna dziela abrańnika, nie moža pakinuć jaho abyjakavym».
Na sajcie chirurha Alaksieja Dužaha pišacca: «Časam žančyna (ci jaje blizkija) dumajuć, što cnatlivaść — najlepšy sposab znajści dobraha muža».
A miedycynski centr «Konfidens» vybraŭ svajoj metavaj hrupaj dziaŭčat-musulmanak. Tam pišuć ab tym, što «siońnia adnaŭleńnie cnatlivaści — asabliva aktualnaja tema dla dziaŭčat musulmanskaj viery.
Mnohija ź ich pryjazdžajuć u jeŭrapiejskija krainy dla atrymańnia adukacyi i nie žadajuć viartacca dadomu, pazbaviŭšysia cnatlivaści. U svaju čarhu, u musulman seks da šlubu ličycca złačynstvam i hańbaj dla siamji. Tamu adnaŭleńnie cnatlivaści dla ich razumny šaniec zachavać honar i hodnaść, a taksama stvaryć siamju».
Sprečnaje pytańnie
Jość adzinaje pytańnie, nakont jakoha ŭ kožnaha miedycynskaha centra svajo mierkavańnie. Niama zhody ŭ tym, ci možna rabić himienapłastyku ŭ vypadku, kali žančyna navažyłasia na praceduru praz zhvałtavańnie.
Na niekatorych sajtach paznačana, što ŭ takich vypadkach adnaŭleńnie cnatlivaści moža być častkaj terapii, jakaja dapamoža achviary pieražyć traŭmatyčny dośvied. Na inšych — što paśla zhvałtavańnia rabić himienapłastyku nielha.
Mierkavańnie psichołaha pra himienapłastyku
My spytali ŭ psichołaha, što jon dumaje nakont himienapłastyki ź psichałahičnaha punktu hledžańnia.
— Ci varta rabić himienapłastyku achviary zhvałtavańnia? U miedycynskich centraŭ dyjamietralna supraćlehłyja dumki na hety kont.
— Pry pracy z traŭmaj jość taki mietad, kali čałavieku prapanoŭvajuć znoŭ pieražyć stresavy dośvied, ale ŭ biaśpiečnym stanoviščy. Tearetyčna, kali dla žančyny samym traŭmatyčnym faktam była mienavita strata cnatlivaści, to, mahčyma, himienapłastyka — heta niadrenny varyjant. Bo žančyna zmoža pierajhrać situacyju — zaniacca seksam u kamfortnych umovach z kachanym čałaviekam.
Ź inšaha boku, adnaŭleńnie cnatlivaści moža być častkaj stratehii paźbiahańnia prablemy. Važna razumieć, što himienapłastyka nie dapamoža zabycca pra sam fakt zhvałtavańnia.
Što niebiaśpiečna ŭ traŭmie? Kali ty jaje doŭha ihnaruješ, to potym ciabie rezka «nakryvaje». Jość ryzyka, što pry paŭtornaj defłaracyi budzie jašče bolšaja psichałahičnaja traŭmatyzacyja. I ŭ vyniku zamacujecca ŭjaŭleńnie ab tym, što seks — heta abaviazkova bol i pakuty.
Tamu ja raiŭ by spačatku prapracavać traŭmu ź psichołaham, a nie zapisvacca na himienapłastyku z nadziejaj, što apieracyja vyrašyć usie prablemy.
— Niekatoryja miedycynskija centry śćviardžajuć, što adnaŭleńnie cnatlivaści — heta dobry padarunak dla mužčyny. Davajcie ŭjavim situacyju: muž prosić žonku zrabić himienapłastyku, kab jana «paradavała» jaho na dzień naradžeńnia. Nakolki heta zdarovaja situacyja?
— Kali partnior prosić vas «adnavić cnatlivaść», varta zadać sabie niekalki pytańniaŭ: čamu heta važna dla majho partniora i čamu ja dumaju pra toje, kab dać inšamu čałavieku mahčymaść kiravać maim ciełam. Prablema voś u čym: kali adzin čałaviek prosić inšaha źmianić niešta ŭ arhaniźmie, manipuluje, to heta moža być prykmietaj pierakručanych adnosin. Bo faktyčna partnior žadaje ekspłuatavać čužoje cieła.
Čamu dla mužčyny važna, kab žančyna adnaviła cnatlivaść? Jon nie hatovy pryniać jaje minułaje? A svajo hatovy? Jaki naohuł sens moža być u tym, kab adpraŭlać žančynu na himienapłastyku, kali partniory buduć vydatna razumieć, što ŭsio heta — padman?
Defłaracyja ŭ mnohich vypadkach davoli balučy praces. Atrymlivajecca, partnior śviadoma choča pryčynić bol. Plus adnaŭleńnie paśla apieracyi samo pa sabie moža być balučym. Taksama nielha zabyvacca na toje, što zaŭsiody mahčymyja niejkija ŭskładnieńni.
Psichałahična žančyny ciažka pieražyvajuć lubyja hiniekałahičnyja ŭmiašańni. A tut razmova idzie nie pra niešta nieabchodnaje dla zdaroŭja. I ŭsio ž Biełaruś nie taja kraina, dzie za stratu cnatlivaści da šlubu dziaŭčynu moža zabić jaje ž siamja. Tamu va ŭsioj hetaj historyi pra adnaŭleńnie himienu bolš markietynhu, čym čahości jašče.
Ja čytaŭ pra vypadak, kali ŭ žančyny paśla himienapłastyki pačałasia anarhaźmija: jana pierastała atrymlivać zadavalnieńnie ad seksu. Ci spadabajecca taki vynik partnioru? — zadajecca pytańniem psichołah.
Čytajcie taksama:
Telepiersanaž Vadzim Baravik prapanavaŭ dadavać niavińnicam bałaŭ na CT
- koniečno. pričiem dołhovriemiennaja