Pryčynami straty vałasoŭ mohuć słužyć samyja roznyja faktary, u tym liku stres, źmianieńnie dyjety, fizičnyja nahruzki i navat narkoz. Niahledziačy na toje, što ŭ toj ci inšaj stupieni z ałapiecyjaj sutykajecca bolš za tracinu mužčyn, hetaja tema zastajecca tabujavanaj, a samo zachvorvańnie vyklikaje masu kompleksaŭ siarod tych, chto sutyknuŭsia z takoj prablemaj. Ale ci ŭsio tak drenna?
Iryna: «Nie razumieju, čamu mužčyny, jakija stracili vialikuju kolkaść vałasoŭ, zachoŭvajuć pryčosku «les vakoł voziera» — vidavočna ž, što jana vyhladaje drenna. A voś całkam paholenyja chłopcy seksualnyja, kali jany nie chlupiki. U takich adčuvajecca mužnaść — ź imi chočacca pačać dyjałoh, a to i niešta bolšaje».
Volha: «Pry pieršym znajomstvie ja aceńvaju tvar i postać. Padčas bolš asabistaj razmovy sprabuju daviedacca pra niuansy charaktaru i finansavyja mahčymaści čałavieka. Nie skažu, što vonkavyja faktary dla mianie krytyčna važnyja, tamu, kali ŭ mužčyny dobraje pačućcio humaru i pryjemny noraŭ, astatnija «niuansy» nie buduć hrać roli».
Śviatłana: «Łysyja mužčyny adšturchvajuć na instynktyŭnym uzroŭni — kali sprava ŭ hienach, to heta moža pieradacca dzieciam, čaho b mnie nie chaciełasia. Pry hetym chłopcy z takoj prablemaj bolš starajucca na spatkańniach i prykładajuć šmat namahańniaŭ, kab spadabacca dziaŭčynie. Heta padkuplaje».
Jeva: «Viadoma, ja zvažaju na pryčosku — nie tolki ŭ mužčyn, ale i ŭ žančyn. U cełym mnie ŭsio roŭna, što ŭ kaho na hałavie: nie rastuć vałasy — što zrobiš, ale važna, kab usio było achajna. Uvohule, u mužčyn prablema abłysieńnia vyrašajecca narmalnaj stryžkaj i adzieńniem. Žančynam z hetym składaniej: dumaju, ich bulać za załysiny značna macniej».
Jaŭhienija: «Mnie łysyja mužčyny padabajucca: jość pryhožyja — prosta ahoń. Hałoŭnaje, jak kažuć, kab čałaviek byŭ dobry. I kab fihura pryhožaja. Stabilnaja praca taksama nie pieraškodzić».
Kamientar trychołaha
Havaryć pra abłysieńnie ŭ našym hramadstvie nie pryniata: mužčyny saromiejucca hetaj niemačy i tamu časta źviartajucca da trychołaha, kali situacyja ŭžo dastatkova zapuščanaja. Pry hetym pryblizna 40% mužčyn va ŭzroście ad 40—50 hadoŭ sutykajucca sa strataj vałasoŭ. U junym uzroście hety pracent nižejšy, ale ałapiecyja jak zachvorvańnie maładzieje — usio čaściej na pryjom prychodziać ludzi da 30 hadoŭ.
Fota: Unsplash
Abłysieńnie moža być vyklikana roznymi faktarami, naprykład, stresam, chraničnymi zachvorvańniami abo deficytam vitaminaŭ i minierałaŭ. Tamu, kali čałaviek pačaŭ zaŭvažać, što na hrabiancy zastajecca bolš vałasoŭ, čym zvyčajna, nie lišnim budzie prapić kurs vitaminaŭ A, V2, V5, V12, Z, Je. Taksama treba źviarnuć uvahu na ŭzrovień žaleza, kaliju, kalcyju, fosfaru, jodu, cynku i miedzi.
Adnak isnujuć i inšyja, bolš važkija pryčyny — spadčynnaść i harmanalny zboj. Na žal, spadčynnaja schilnaść da vypadzieńnia vałasoŭ praktyčna nie paddajecca lačeńniu. Cikava, što ŭ 75% vypadkaŭ ałapiecyja pieradajecca pa matčynaj linii i ŭsiaho ŭ 20% — pa baćkoŭskaj. Jašče 5% — vypadki, źviazanyja ź pieršasnym hienietyčnym zbojem.
Inšym raspaŭsiudžanym čyńnikam abłysieńnia źjaŭlajecca ŭździejańnie mužčynskaha pałavoha harmonu — testasteronu na vałasiany falikuł. Isnuje mierkavańnie, što mužčyny z takim typam abłysieńnia źjaŭlajucca vydatnymi paluboŭnikami i tamu stanoviacca bolš pryvabnymi ŭ vačach žančyn. Śpiašajusia rasčaravać: uździejańnie harmonu na vołas nijak nie źviazana z najaŭnaściu testasteronu ŭ kryvi, tamu niepasrednaj karelacyi pamiž łysinaj i seksualnym tempieramientam nie vyjaŭlena.
Biezumoŭna, na hienietyku i ŭzrost paŭpłyvać vielmi składana, ale jość parady, jakija zatrymajuć praces vypadzieńnia. Dobra dapamahaje stymulacyja skury hałavy masažorami, hiałuronavaja i tokavaja terapija. Da taho ž možna zmahacca i z samimi kompleksami: dastatkova źviarnuć uvahu na styl adzieńnia i ahulny vonkavy vyhlad. Pierasadka vałasoŭ — taksama vydatny, ale składany varyjant. Hałoŭnaje tut znajści pravieranaha śpiecyjalista i pralačyć zboj, jaki ŭ vyniku pryvioŭ da hetaj prablemy.
Čytajcie taksama:
Kolki ž u ciabie było hetych spatkańniaŭ. Vidać, nietryvałyja adnosiny