Ahulny vyhlad častki palihona «Repišča» pad Asipovičami. Punkciram abviedzienyja novyja abjekty, jakija źjavilisia na palihonie apošnimi dniami. 31 lipienia 2023 hoda.
Možna zaŭvažyć uźviadzieńnie šmatlikich fartyfikacyjaŭ, mahčyma, ziamlanak. Kala ich vidać abjekty, padobnyja da lehkavych aŭtamabilaŭ i śvietła-šerych mikraaŭtobusaŭ UAZ (tak zvanych «buchanak»), pracujuć buldoziery.
29 lipienia Ministerstva abarony Biełarusi zajaviła pra sumiesnyja vučeńni na hetym palihonie 51-j artyleryjskaj bryhady razam z «instruktarami PVK «Vahnier». Paviedamlali pra vykanańnie «ahniavych zadačaŭ z vykarystańniem kvadrakoptaraŭ».
Nie tak daŭno ŭ adnym z telehram-kanałaŭ, źviazanym z najmitami «Vahniera», źjaviłasia videa, na jakim vidać budaŭnictva lasnoha ŭmacavanaha łahiera. Ziamlanki tam abstalavanyja nievialikimi piečkami, tamu łahier moža być prydatny dla žyćcia ŭ chałodnuju paru hoda. Vyznačyć miesca zdymak dakładniej nie ŭdałosia.
Vyhlad łahiera, jaki źjaviŭsia ŭ źviazanym z najmitami «Vahniera» telehram-kanale
Na asobnych stajankach jość budaŭničaja technika, a taksama płatformy dla jaje pieravozki. Hetyja płatformy całkam supadajuć kolerami z tymi, što byli na videa telehram-kanała «Biełaruś hołovnoho mozha», jakoje raniej vieryfikavała Svaboda. Jano źniataje na babrujskaj abjaznoj trasie, kali kałona pierasiakała raku Biarezinu. Mašyny tady ruchalisia da vioski Cel, ale całkam vierahodna, što mahli da jaje nie dajechać, a zbočyć na darohu da palihona «Repišča».
Źvierchu — spadarožnikavy zdymak hruzavych aŭtamabilaŭ na palihonie. Ich vyhlad całkam supadaje z vyhladam hruzavikoŭ u kałonie vahnieraŭcaŭ, zaŭvažanaj kala Babrujska.
