Frahmient karty Google Maps u režymie spadarožnika. Čyrvonym abaznačana mierkavanaje miesca raźmiaščeńnia abjekta. Sprava źvierchu — rezidencyja Łukašenki
Techniku na terytoryi psichanieŭrałahičnaha internata zaŭvažyli ŭ kancy červienia, i z taho času jaje bačna praz płot internata rehularna.
Technika padobnaja da mašyny R-934UM2 («Navalnica-6»). Heta stancyja pieraškod. Zhodna z aficyjnym apisańniem, jana vykarystoŭvajecca dla pošuku, vyjaŭleńnia, pielenhavańnia krynic radyjovypramieńvańnia i linij suviazi dy ich radyjopadaŭleńnia. Taksama mašyna dazvalaje łakalizavać krynicu sihnału bieśpiłotnych latalnych aparataŭ i znachodzić ich apierataraŭ.
Kompleksy «Navalnica-6». Fota: belautoprom-g2n.jimdofree.com
Mašyna stvoranaja biełaruskim «KB Radar». Jana moža łavić naziemny sihnał u radyusie da 50 kiłamietraŭ, a pavietrany — da 320 kiłamietraŭ, navat pry dalokaści palotu bolšaj za 10 kiłamietraŭ. Takija mašyny ŭžo vykarystoŭvalisia ŭ vajskovych metach: u Azierbajdžanie padčas vajny ŭ Karabachu i ŭ Livii na baku ŭradavych sił.
Imavierna, pastavili ich, kab abaraniać rezidencyju Łukašenki. Da jaje adtul kala paŭtara kiłamietra. Nieviadoma, ci znachodzicca hetaja stancyja tam ciapier i pry jakoj nahodzie jaje tam raźmiaščajuć.
Schiema pracy «Navalnicy». Heta «Navalnica-S», mienš mahutnaja i bolš mabilnaja stancyja, ale pryncyp vialikaj taki samy. Fota: armiya.az
Ci adpaviadaje zakonu znachodžańnie na terytoryi internata vajskovaj techniki
My paprasili jurystaŭ servisu biaspłatnaj i ananimnaj jurydyčnaj dapamohi Legalhub.help prakamientavać hetuju situacyju ź jurydyčnaha punktu hledžańnia.
«Psichanieŭrałahičny internat i terytoryja, na jakoj jon mieścicca, zhodna z zakanadaŭstvam maje status ustanovy sacyjalnaha absłuhoŭvańnia. Dziejnaść internataŭ rehulujecca zakonam ad 22.05.2000 №395-Z (red. ad 30.06.2022) «Ab sacyjalnym absłuhoŭvańni», pastanovaj Ministerstva pracy i sacyjalnaj abarony Respubliki Biełaruś ad 10.01.2013 h. №5 (redakcyja ad 06.12.2022) «Ab zaćviardžeńni pałažeńniaŭ ustanoŭ sacyjalnaha absłuhoŭvańnia», statutam, praviłami ŭnutranaha rasparadku.
Mahčymaść znachodžańnia na terytoryi internata vajskovaj techniki abo vajskoŭcaŭ nie praduhledžana nivodnym z hetych dakumientaŭ.
Raźmiaščeńnie srodkaŭ radyjoelektronnaj baraćby jak krynicy vypramieńvańnia možna taksama razhladać z punktu hledžańnia sanitarna-epidemičnych normaŭ, administracyjnaj adkaznaści, ale tut niedastatkova infarmacyi.
Akramia taho, u 2016 hodzie Biełaruś ratyfikavała Kanviencyju ab pravach ludziej ź invalidnaściu. U Kanviencyi adsutničaje pramaja zabarona na raźmiaščeńnie vajskovaj techniki na terytoryi, dzie znachodziacca ludzi va ŭstanovach niesvabody, ź psichanieŭrałahičnymi asablivaściami. Ale i da met sacyjalnaj abarony, vykładzienych u dakumiencie, dačynieńnia jana nie maje. Naprykład, sacyjalna-reabilitacyjnymi pasłuhami nazyvajecca «kompleks mierapryjemstvaŭ pa palapšeńni jakaści žyćcia hramadzian, zachavańni i ŭmacavańni ich zdaroŭja, u tym liku praz stvareńnie im umoŭ dla niezaležnaha pražyvańnia i intehracyi ŭ hramadstva».
Kali razhladać raźmiaščeńnie vajskovaj techniki na terytoryi internata jak elemient achovy žyćcia hramadzian, to artykuł 11 Kanviencyi abaviazvaje dziaržavu prymać dadatkovyja nieabchodnyja miery dziela zabieśpiačeńnia abarony i biaśpieki ludziej ź invalidnaściu vyklučna ŭ situacyjach ryzyki, jakaja ŭźnikaje ŭ čas uzbrojenych kanfliktaŭ, nadzvyčajnych situacyj, stychijnych biedstvaŭ, čaho ŭ Biełarusi na hety momant nie nazirajecca.
Takim čynam, na siońnia zakonna trapić na terytoryju psichanieŭrałahičnaha internata vajskoŭcy majuć mahčymaść vyklučna ŭ jakaści klijentaŭ, ci hramadzian, jakija naviedvajuć svajakoŭ, ci subjektaŭ, što akazvajuć sacyjalnyja pasłuhi».
Atrymlivajecca, što vajskoŭcy achoŭvajuć rezidencyju jak u čas nadzvyčajnaj situacyi.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Źjavilisia novyja fota łahiera pad Asipovičami, kudy mohuć pierajechać vahnieraŭcy
U Biełaruś prybyła treciaja kałona PVK «Vahnier» — «Biełaruski Hajun»
