Фрагмент карты Google Maps у рэжыме спадарожніка. Чырвоным абазначана меркаванае месца размяшчэння аб'екта. Справа зверху — рэзідэнцыя Лукашэнкі
Тэхніку на тэрыторыі псіханеўралагічнага інтэрната заўважылі ў канцы чэрвеня, і з таго часу яе бачна праз плот інтэрната рэгулярна.
Тэхніка падобная да машыны Р-934УМ2 («Навальніца-6»). Гэта станцыя перашкод. Згодна з афіцыйным апісаннем, яна выкарыстоўваецца для пошуку, выяўлення, пеленгавання крыніц радыёвыпраменьвання і ліній сувязі ды іх радыёпадаўлення. Таксама машына дазваляе лакалізаваць крыніцу сігналу беспілотных лятальных апаратаў і знаходзіць іх аператараў.
Комплексы «Навальніца-6». Фота: belautoprom-g2n.jimdofree.com
Машына створаная беларускім «КБ Радар». Яна можа лавіць наземны сігнал у радыусе да 50 кіламетраў, а паветраны — да 320 кіламетраў, нават пры далёкасці палёту большай за 10 кіламетраў. Такія машыны ўжо выкарыстоўваліся ў вайсковых мэтах: у Азербайджане падчас вайны ў Карабаху і ў Лівіі на баку ўрадавых сіл.
Імаверна, паставілі іх, каб абараняць рэзідэнцыю Лукашэнкі. Да яе адтуль каля паўтара кіламетра. Невядома, ці знаходзіцца гэтая станцыя там цяпер і пры якой нагодзе яе там размяшчаюць.
Схема працы «Навальніцы». Гэта «Навальніца-С», менш магутная і больш мабільная станцыя, але прынцып вялікай такі самы. Фота: armiya.az
Ці адпавядае закону знаходжанне на тэрыторыі інтэрната вайсковай тэхнікі
Мы папрасілі юрыстаў сэрвісу бясплатнай і ананімнай юрыдычнай дапамогі Legalhub.help пракаментаваць гэтую сітуацыю з юрыдычнага пункту гледжання.
«Псіханеўралагічны інтэрнат і тэрыторыя, на якой ён месціцца, згодна з заканадаўствам мае статус установы сацыяльнага абслугоўвання. Дзейнасць інтэрнатаў рэгулюецца законам ад 22.05.2000 №395-З (рэд. ад 30.06.2022) «Аб сацыяльным абслугоўванні», пастановай Міністэрства працы і сацыяльнай абароны Рэспублікі Беларусь ад 10.01.2013 г. №5 (рэдакцыя ад 06.12.2022) «Аб зацвярджэнні палажэнняў устаноў сацыяльнага абслугоўвання», статутам, правіламі ўнутранага распарадку.
Магчымасць знаходжання на тэрыторыі інтэрната вайсковай тэхнікі або вайскоўцаў не прадугледжана ніводным з гэтых дакументаў.
Размяшчэнне сродкаў радыёэлектроннай барацьбы як крыніцы выпраменьвання можна таксама разглядаць з пункту гледжання санітарна-эпідэмічных нормаў, адміністрацыйнай адказнасці, але тут недастаткова інфармацыі.
Акрамя таго, у 2016 годзе Беларусь ратыфікавала Канвенцыю аб правах людзей з інваліднасцю. У Канвенцыі адсутнічае прамая забарона на размяшчэнне вайсковай тэхнікі на тэрыторыі, дзе знаходзяцца людзі ва ўстановах несвабоды, з псіханеўралагічнымі асаблівасцямі. Але і да мэт сацыяльнай абароны, выкладзеных у дакуменце, дачынення яна не мае. Напрыклад, сацыяльна-рэабілітацыйнымі паслугамі называецца «комплекс мерапрыемстваў па паляпшэнні якасці жыцця грамадзян, захаванні і ўмацаванні іх здароўя, у тым ліку праз стварэнне ім умоў для незалежнага пражывання і інтэграцыі ў грамадства».
Калі разглядаць размяшчэнне вайсковай тэхнікі на тэрыторыі інтэрната як элемент аховы жыцця грамадзян, то артыкул 11 Канвенцыі абавязвае дзяржаву прымаць дадатковыя неабходныя меры дзеля забеспячэння абароны і бяспекі людзей з інваліднасцю выключна ў сітуацыях рызыкі, якая ўзнікае ў час узброеных канфліктаў, надзвычайных сітуацый, стыхійных бедстваў, чаго ў Беларусі на гэты момант не назіраецца.
Такім чынам, на сёння законна трапіць на тэрыторыю псіханеўралагічнага інтэрната вайскоўцы маюць магчымасць выключна ў якасці кліентаў, ці грамадзян, якія наведваюць сваякоў, ці суб’ектаў, што аказваюць сацыяльныя паслугі».
Атрымліваецца, што вайскоўцы ахоўваюць рэзідэнцыю як у час надзвычайнай сітуацыі.
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Чытайце таксама:
З'явіліся новыя фота лагера пад Асіповічамі, куды могуць пераехаць вагнераўцы
У Беларусь прыбыла трэцяя калона ПВК «Вагнер» — «Беларускі Гаюн»
