Para čornaha i biełaha busłoŭ vyvieła ptušaniat u Hiermanii. Fota: az-online.de
Z 19 sakavika vakoł hniazda biełych busłoŭ u niamieckim Ludery kipieli žarści: čatyry busły bilisia za prava tut ahniezdavacca. Raniej paznačany ludźmi busieł Hienrych u vyniku pieramoh i čakaŭ na hniaździe svaju daŭniuju partniorku Ilzu. Ale zamiest jaje źjaviłasia nastojlivaja Isida — samka čornaha busła: Hienrych jaje prahaniaŭ, ale ŭ vyniku pryniaŭ.
Z 14 krasavika niezvyčajnaja para ŭžo nasiedžvała jajki. U mai ŭ hniaździe vyłupilisia niezvyčajnyja buślaniaty: biełyja z šeraj hałavoj. Ciapier jany ščaśliva rastuć na białkovaj dyjecie z čarviakoŭ, hryzunoŭ, žab i ryby.
Druhaja para z čornaha i biełaha busłoŭ u 2023 hodzie była zaŭvažanaja ŭ Čechii ŭ miastečku Horni Čerekieŭ (Horní Cerekev), tolki čornym tam byŭ samiec. Paśla niekalkich kapulacyj jaho, praŭda, prahnaŭ samiec biełaha busła, ale jajki samka ŭ vyniku adkłała.
Sparvańnie čornaha i biełaha busłoŭ u Čechii. Fota Jan Ipri
Zvyčajna čorny i bieły busły viaduć rozny ład žyćcia i redka sustrakajucca. Biełyja busły mohuć žyć kałonijami zvyčajna pobač z čałaviekam, a čorny hniazdujecca adzinkavymi parami ŭ lasach abo harach i viadzie davoli skrytny ład žyćcia.
Cikava, što ŭ 2020-2021 hadach u adnoj ź viosak u Kleckim rajonie čorny busieł haniaŭ biełych busłoŭ ź ich hniozdaŭ, ale taksama sprabavaŭ — biespaśpiachova — zalacacca i da samki biełaha busła.
A ŭ inšym češskim miastečku Chinaŭ (Chýnov) hetaj viasnoj niezvyčajnaja para ŭtvaryłasia ź dźviuch samak biełaha busła. Jany abiedźvie ŭ pačatku maja adkłali jajki ŭ adno hniazdo.
Arnitołahi adznačajuć, što heta pieršaja rehistracyja adnapołaj pary ŭ biełych busłoŭ. U inšych vidaŭ ptušak homaseksualnyja pary sustrakajucca davoli časta.
Za pavodzinami ptušak sočać praz kamieru na hniaździe. Abiedźvie buślichi dabudoŭvali hniazdo, vitali adna adnu klokatam, zatym razam adkłali 8 jajek, što i stała paćviardžeńniem taho, što heta dźvie samki.
Adna ź ich i raniej zajmała heta hniazdo, ale ŭ pary z samcom. Ich hniezdavańnie było paśpiachovym: letaś para vyhadavała troch ptušaniat. Ale hetaj viasnoj samiec nie viarnuŭsia. Paźniej prylacieła inšaja samka busła, jakaja zastałasia na hniaździe razam ź pieršaj.
Arnitołahi nie raźličvali, što ź jajek chtości vyłupicca, bo kamiera nie zafiksavała kapulacyj na hniaździe, a za jaho miežami busły zajmajucca kachańniem redka. Ale častka jajek akazałasia apłodnienaj: z vaśmi jajek vyłupiłasia piać ptušaniat. Praŭda, troje ptušaniat paśla zahinuła, jašče adno, słaboje, zabrali ŭ centr reabilitacyi, a adno pakinuli ŭ hniaździe.
Čytajcie taksama:
Kala Zasłaŭja busieł źjeŭ śmiećcie i pamior
Hłuskija enierhietyki pierasialili busła, z-za jakoha ŭ vioscy prapadała elektryčnaść
Red. , nu vy žžocie 🤣