«Patraciŭ 2 tysiačy dalaraŭ — było viesieła». Biełarus raskazaŭ, jak rabiŭ transpłantacyju vałasoŭ u Turcyi 3

Zdymak ilustracyjny. Fota: hairtalking.ru

Ad čaho zaležyć košt pierasadki vałasoŭ?

U pieršuju čarhu — ad mietadu transpłantacyi. U asnoŭnym užyvajuć dva: łapikavy FUT i biasšvovy FUE.

Pieršy — bolš tanny, ale praduhledžvaje apieracyju: u pacyjenta vydalajuć łapik skury, zvyčajna z patylicy, dzie raście dastatkova falikułaŭ, i pierasadžvajuć ich na novaje miesca. Paśla takoj pierasadki zvyčajna zastajecca śpiecyfičny šnar u donarskaj zonie i adnaŭleńnie zajmaje bolš času.

Druhi mietad apieracyi nie patrabuje: falikuły biaruć z donarskaj zony z dapamohaj admysłovaj pryłady. Arhanizm adnaŭlajecca chutčej, šnara nie zastajecca. I choć biasšvovy mietad kaštuje daražej, ciapier jaho pravodziać navat čaściej, čym FUT.

Na canu ŭpłyvaje i kolkaść hraftaŭ — heta hrupa ź niekalkich falikułaŭ. Čym bolš hraftaŭ, tym daražejšaja apieracyja. Toje ž datyčyć miesca transpłantacyi: kali vałasy pierasadžvać nie na hałavie, a, skažam, na brovach ci viejkach, cana budzie zusim inšaj.

Čamu dla pierasadki vałasoŭ jeduć u Turcyju?

Dla postsavieckich krain takija transpłantacyi ŭsio jašče źjava novaja, a voś u Turcyi hetaja śfiera raźvivajecca ŭžo 30 hadoŭ. U adnym tolki Stambule pracuje bolš za 500 klinik pa pierasadcy vałasoŭ, a pa ŭsioj krainie — bolš za tysiaču. Pry hetym ceny zachoŭvajucca davoli demakratyčnyja: u siarednim apieracyja kaštuje 2-3 tysiačy jeŭra. Časta ŭ hetu sumu ŭvachodzić nie tolki transpłantacyja, ale i žyćcio ŭ hateli, tranśfier ad aeraporta da kliniki, patrebnyja analizy i miedykamienty.

Jak vynik — vielizarny popyt na pasłuhu. U 2022 hodzie inšaziemcy vydatkavali na transpłantacyju vałasoŭ 2 miljardy dalaraŭ, paviedamlaje turecki časopis Daily Sabah. «Kali my vykažam zdahadku, što pacyjenty vydatkavali na transpłantacyju ŭ siarednim 2 tysiačy dalaraŭ, my možam śćviardžać, što ŭ 2022 hodzie kala miljona čałaviek pryjechała ŭ Turcyju dla pierasadki vałasoŭ», — pryvodzić vydańnie cytatu ad Tureckaj asacyjacyi miedycynskaha turyzmu.

«Adrazu było zrazumieła, što treba vybirać Turcyju: samaja nizkaja cana za dobry vynik, — kaža Dźmitryj Hieranin, jakomu ŭ lutym praviali apieracyju ŭ adnoj z tureckich klinik. — Pramanitoryŭ kliniki, pahladzieŭ vodhuki ŭ YouTube i znajšoŭ, na moj pohlad, aptymalny varyjant. Pracedura prajšła vydatna: vielmi ŭvažlivaje staŭleńnie piersanału, jakasnaja aniestezija.

Časta padčas pierasadki ja navat zasynaŭ na apieracyjnaj kušetcy. Było viesieła, karaciej».

Pałovu hraftaŭ pierasadzili mietadam FUE, pałovu — DHI: pieršy vykarystoŭvali dla častki hałavy, jakuju treba było całkam zasadzić novymi vałasami, a dla zahuščeńnia padyšoŭ DHI. Vynik budzie zrazumieły tolki praz hod, kali vałasy na pierasadžanych učastkach pryjduć da maksimalnaj stadyi siły i huščyni.

«Pakul što raz na miesiac adpraŭlaju ŭ kliniku fota vałasoŭ, a lekary kažuć, što treba jašče zrabić, kab było dobra. Voś niadaŭna zrabiŭ praceduru płazmaterapii, kab dapamahčy skury hałavy z rehienieracyjaj. Baluča, ale vynik prykmietny».

Fota z archiva Dźmitryja Hieranina

Za pierasadku 4 tysiač hraftaŭ Dźmitryj zapłaciŭ 2 tysiačy jeŭra. U hetuju sumu ŭvajšoŭ nie tolki košt apieracyi, ale i dźvie nočy ŭ hateli, miedykamienty i tranśfier ad aeraporta i nazad. Kvitki ŭ Turcyju i nazad jon kuplaŭ asobna.

«Siaredniuju canu vyznačyć składana. Usio zaležyć ad kolkaści hraftaŭ, technałohii i brenda kliniki. Roskid pa cenach adčuvalny: dzieści prosiać 2 tysiačy jeŭra, a dzieści — 11 tysiač».

U Turcyi pierasadka vałasoŭ časta apłačvajecca pakietna, a nie z raźliku koštu adnaho hrafta, jak u SND ci ZŠA. Naprykład, jašče ŭ adnoj stambulskaj klinicy transpłantacyja da 4000 hraftaŭ abydziecca ŭ 2300 jeŭra. U canu ŭvachodziać usio tyja ž tranśfier, žyćcio ŭ hateli i nieabchodnyja analizy.

Zdymak ilustracyjny. Fota: hairtalking.ru

Kolki kaštuje pierasadka vałasoŭ u inšych krainach

Dla paraŭnańnia ŭziatyja Biełaruś, Rasija, Polšča, Hruzija i ZŠA. Vydańnie pahladzieła, kolki čałaviek musić addać za pierasadku tych ža 4 tysiač hraftaŭ. Najpierš cikaviŭ mietad FUE — u prajsach jon sustrakajecca najčaściej.

Biełaruś

U Biełarusi pierasadku vałasoŭ robiać tolki ŭ niekalkich staličnych klinikach. Naprykład, u adnoj ź ich za pierasadku adnaho hrafta prosiać 3,75 rubla i abiacajuć adnaŭleńnie za 2-3 tydni. Heta značyć, apieracyja biez uliku pieršasnaj kansultacyi budzie kaštavać 14 800 rubloŭ.

U inšaj klinicy cana ŭžo značna vyšejšaja — 5 rubloŭ za hraft, heta značyć, 20 tysiač rubloŭ za praceduru. U hetuju canu nie ŭvachodzić vočnaja kansultacyja za 49 rubloŭ (15 jeŭra).

U treciaj klinicy pierasadka vałasoŭ tym ža biasšvovym mietadam kaštuje 4 rubli za hraft. Pryčym takaja cana dziejničaje, tolki kali vy pierasadžvajecie bolš za 1000 hraftaŭ, za mienšuju kolkaść cana bolšaja. Pamnažajučy na patrebnyja 4000 hraftaŭ, atrymlivajecca cana ŭ 16 tysiač rubloŭ.

Rasija

Ceny na transpłantacyju vałasoŭ u Rasii adroźnivajucca ŭ zaležnaści ad rehijonaŭ. Dla razumieńnia ŭziatyja kliniki Maskvy i Sankt-Pieciarburha.

U adnoj z klinik Sankt-Pieciarburha (pierasadkami tut zajmajucca z 1996 hoda, jak paviedamlaje sajt) cana adnaho hrafta dasiahaje 120 rasijskich rubloŭ (4,3 biełaruskaha). Ale ceny pamianšajucca ŭ zaležnaści ad kolkaści hraftaŭ: čym ich bolš, tym mienš treba budzie płacić. Naprykład, kali my budziem pierasadžvać 4000 hraftaŭ, biasšvovaja transpłantacyja abydziecca ŭ 280 tysiač rasijskich rubloŭ, ci 10 085 biełaruskich z raźliku 70 rasijskich rubloŭ (2,5 biełaruskaha) za hraft.

U inšaj klinicy pieršasnyja kansultacyi płatnyja i zaležać ad katehoryi lekara: apłata takoha pryjomu kaštuje ad 1500 da 5000 rasijskich rubloŭ (54-180 biełaruskich). Cana na transpłantacyju farmirujecca ŭ zaležnaści ad typu pracedury, a nie kolkaści vałasoŭ. U Maskvie pašyranaja kansultacyja lekara-trychołaha kaštuje ŭ siarednim 3500 rubloŭ. A voś sama pierasadka vałasoŭ na paradak daražejšaja za pieciarburhskuju, — kala 130 rubloŭ za hraft.

Hruzija

Cana apieracyi biasšvovym mietadam pačynajecca ad 1500 dalaraŭ. U siarednim va ŭsich klinikach adna cana — pa 2 dalary za hraft, heta značyć, apieracyja budzie kaštavać 8 tysiač dalaraŭ. Adroźnivacca budzie tolki kolkaść dadatkovych pasłuh. U Hruzii, jak i ŭ Turcyi, u košt apieracyi časta ŭklučajucca dadatkovyja servisnyja pasłuhi: žyćcio ŭ haścinicy, tranśfier i navat ekskursija pa Tbilisi (pa žadańni pacyjenta). U niekatorych klinikach hety pieralik pašyrany: tudy ž uvachodzić kansultacyja ź lekaram, nieabchodnyja analizy i płazmaterapija paśla pracedury.

Polšča

Košt adnaho hrafta ŭ Jeŭropie startuje z dvuch jeŭra i moža dasiahać 6-7 jeŭra. Polšča — nie vyklučeńnie. U adnoj z varšaŭskich klinik cana pierasadki pa mietadzie FUE budzie składać kala 8 tysiač jeŭra z raźliku 2 jeŭra za hraft. Pry pierasadcy bolš za 3 tysiač hraftaŭ cana za štuku źnižajecca da 1,5 jeŭra. U košt, darečy, uvachodzić nie tolki sama transpłantacyja, ale i płazmaterapija paśla jaje.

Jašče ŭ adnoj krakaŭskaj klinicy asobna apłačvajecca kansultacyja trychołaha: 54 jeŭra za vočnuju kansultacyju, 43 jeŭra — za anłajn-farmat. Minimalnaja cana hrafta — 2 jeŭra, transpłantacyi — 1630 jeŭra.

ZŠA

Siaredniaja cana adnaho hrafta ŭ ZŠA składaje prykładna 5,44 dalara, ale kali zahłybicca ŭ sajty klinik, to vyśvietlicca, što adzin hraft moža kaštavać 7-10 dalaraŭ, a 5 — heta dosyć redkaja cana. Navat pry samych ścipłych padlikach apieracyja budzie kaštavać 20 tysiač dalaraŭ.

 Čytajcie taksama:

«Spačatku była kryŭda na ŭvieś śviet». Babrujčanka 27 hadoŭ dahladaje syna, jaki staŭ invalidam u vyniku Čarnobyla

Što za apieracyju zrabiŭ Kirkoraŭ, kab mieć kubiki na presie? Raskazvajem miechanizm

«Niemki prasili zrabić na paznohciach kufal piva». Biełaruskija manikiurnicy raskazvajuć, jak zarablajuć za miažoj

20

2

8

7

1

6

Nashaniva.com