Jaŭhien Pryhožyn, rasijski miljarder i kiraŭnik PVK «Vahnier». Fota ź jahonaha telehram-kanała
Jaŭhien Pryhožyn zadajecca pytańniem, čamu ŭkrainskaja armija nie pierachodzić u kontrnastup, choć, pryznaje jon, maje dla hetaha siły i srodki? Pryhožyn prychodzić da vysnovy, što za hetym moža krycca śviadomaja taktyka Zachadu: pryvieści Rasiju da punktu kipieńnia, kab stomlenaja biaskoncaj vajnoj kraina ŭzarvałasia zsiaredziny.
Pryhožyn, były kryminalnik, jakoha Uładzimir Pucin nabliziŭ da siabie i zrabiŭ miljarderam, čałaviek absalutna zaležny ad Kramla, jakomu davieryli kiravać pryvatnaj vajskovaj kampanijaj «Vahnier», jakaja ŭjaŭlaje saboj ciapier adnu z samych bajazdolnych siłaŭ RF, bačyć unutry Rasii ŭpłyvovyja siły, jakim taksama vyhadny taki scenar.
Artykuł napisany typovym dla Pryhožyna vicijevatym słoham, kali sensava nahružanyja pasyły ŭpakavanyja ŭ rułony ideałahičnaj upakoŭki.
«Ukrainskaja armija sabrała dastatkovuju kolkaść siłaŭ, — piša Pryhožyn. — Kala 200 tysiač užo dastatkova padrychtavanych bajcoŭ, jakija prajšli dvuch-trochmiesiačnuju padrychtoŭku i zładžvańnie, hatovyja da vykanańnia bajavych zadač.
Kolkaść uzbrajeńnia i bojeprypasaŭ całkam dastatkova dla taho, kab hetyja 200 tysiač pajšli ŭ nastup pa roznych napramkach. Hatovyja da kontrnastupleńnia vojski znachodziacca ŭ rajonach zasiarodžvańnia — im usiaho chapaje», — piša Pryhožyn, jaki maje dostup da danych rasijskaj raźviedki.
Na pohlad Jaŭhiena Pryhožyna, doŭhaja abarona ŭkrainskimi vojskami Bachmuta i pastajannyja pieranosy daty pačatku kontrnastupu — śviadomy płan.
«Anhłasaksy strymlivajuć Zialenskaha» i prytarmožvajuć nastup, piša nabližany da Pucina.
«ZŠA nie patrebna chutkaja vajna. Im patrebnaja vajna, jakaja pryviadzie da źmieny pierakanańniaŭ «hłybinnaj dziaržavy» i jaje pieramohi».
Pryhožyn zapazyčvaje ź leksikonu amataraŭ teoryj zmoŭ hety termin «hłybinnaja dziaržava». Ën tłumačyć jaje jak supolnaść kaladziaržaŭnych elitaŭ, jakija dziejničajuć niezaležna ad palityčnaha kiraŭnictva dziaržavy, majuć ciesnyja suviazi i ŭłasny paradak dnia. Kaho maje na ŭvazie Pryhožyn, jon pakazvaje prykładami. Ën nazyvaje Chadarkoŭskaha, Čubajsa, Frydmana, Dvarkoviča — biznesoŭcaŭ i čynoŭnikaŭ, jakich adnosili da libieralnaha kryła postsavieckaj rasijskaj elity. Adnak namiakaje na prysutnaść ludziej z takimi pohladami i intaresami i ŭnutry ciapierašniaj ułady ŭ Rasii jak na fiederalnym, tak i na rehijanalnym uzroŭni.
Na pohlad Pryhožyna, «mnohija z tych, chto jašče ŭčora padtrymlivaŭ śpiecapieracyju, siońnia znachodziacca ŭ sumnievach, albo kateharyčna suprać taho, što adbyvajecca. Pradstaŭnikam hłybinnaj dziaržavy chočacca terminova viarnucca da svajho zvyčajnaha žyćcia, starych zvyčak i kamfortu».
Takija ludzi «na naradach maŭčać, vykazvajuć svaje sumnievy. A pry pryniaćci rašeńniaŭ pa biurakratyčnych pracedurach tarmoziać tyja ci inšyja dziejańni, nakiravanyja na pieramohu ŭ hetaj vajnie».
Kiraŭnik PVK «Vahnier» biez aptymizmu aceńvaje stan rasijskaj armii. Ci moža być takoje, što «VSU ŭprucca ŭ abaronu RF, paniasuć surjoznyja straty, paśla čaho pačniecca kałasalnaje kontrnastupleńnie vojskaŭ RF da miežaŭ DNR, abo da Dniapra, ci ŭvohule da Polščy»? Pryhožyn adkazvaje dalikatna: «uličvajučy siońniašniuju dynamiku i prablematyku, takoje kontrnastupleńnie, skažam miakka, nie vielmi imaviernaje».
Pryhožyn miarkuje, što bolš realny inšy varyjant, što «ŭkrainskaja armija raspačnie kontrnastupleńnie i dzieści zdoleje prarvać abaronu».
«U hetym vypadku ŭ vojsku, jakoje hadami siabie ličyła adnym z najlepšych vojskaŭ śvietu, mohuć pačacca spačatku ŭpadnickija nastroi, a potym situacyja dehraduje, jak heta ŭžo było paśla prajhranych vojnaŭ pačatku XX stahodździa — Finskaj, Japonskaj — i trahičnych padziej 1917 hoda».
«Heta moža pryvieści da hłabalnych źmienaŭ u rasijskim hramadstvie. Narod užo šukaje vinavatych u tym, što my nie samaja mocnaja armija ŭ śviecie, a ŭ hetaj situacyi buduć šukać «krajnich», — zaścierahaje Pryhožyn.
Pryhožyn prapanuje zvalić vinu za pravał impieryjalistyčnaj vajny va Ukrainie na «ŭnutranych vorahaŭ», u tym liku ŭ dziaržaparacie.
«I hetymi «krajnimi» stanuć, biezumoŭna, pradstaŭniki «hłybinnaj dziaržavy». Heta značyć tyja ludzi, jakija na siońniašni dzień, nie prykładvajučy namahańniaŭ da vajennaj apieracyi, znachodziacca jak maha dalej ad teatra vajennych dziejańniaŭ, sprabujuć nie stracić svaje kapitały, žyć zvykłym žyćciom, a heta absalutna nieprymalna dla stomlenaha ad vajny i jaki hublaje smak pieramohi naroda».
Heta, na dumku Pryhožyna, dazvolić advieści narodny hnieŭ za prajhranuju vajnu i šmatlikija čałaviečyja achviary ad kiraŭnictva Rasii»
«Pry hetym viarchoŭnaj uładzie Rasii ničoha nie pahražaje, bo jana simvał nacyjanalnaha jadnańnia i supracivu Zachadu, a heta asnova siońniašniaha isnavańnia i hałoŭnaje tłumačeńnie lubych prablem dla patryjatyčnych sił unutry Rasii».
Vykazaŭšy hetyja niedvuchsensoŭnyja pahrozy kryptalibierałam, Pryhožyn prahavorvaje i inšy mahčymy varyjant: pastavić niejkuju tłustuju kropku ŭ śpiecyjalnaj vajennaj apieracyi. I heta moža być zajava ab jaje zaviaršeńni.
«Idealny varyjant — heta abjavić ab zakančeńni SVA, paviedamić usim ab tym, što Rasija dasiahnuła tych vynikaŭ, jakija płanavała, i ŭ niejkim sensie my sapraŭdy ich dasiahnuli.
My pieramałoli vielizarnuju kolkaść bajcoŭ USU [nasamreč, miarkujučy pa ŭsim, straty rasijskaj armii na poli boju ŭ razy pieravyšajuć ukrainskija — jak pa kolkaści zabitych i paranienych, tak i pa stračanych adzinkach techniki, pryčym straty PVK «Vahnier» asabliva vialikija — NN] i možam sami sabie dać spravazdaču ab tym, što zadačy SVA vykananyja».
Na dumku Pryhožyna, maksimum, što moža zrabić zaraz Rasija — zamacavacca na tych terytoryjach, jakija ŭžo jość.
«Rasija adrezała Azoŭskaje i vialiki kavałak Čornaha mora, zachapiła tłusty kavałak terytoryi Ukrainy i stvaryła suchaputny kalidor u Krym. Ciapier zastajecca tolki adno: namiortva zamacavacca, zapuścić kipci ŭ tyja terytoryi, jakija ŭžo jość», — prapanuje Pryhožyn.
Pryhožyn taksama z horyčču kanstatuje pravał vialikaha płana Maskvy pa likvidacyi ŭkrainskaj dziaržaŭnaści: «Kali raniej Ukraina była častkaj byłoj Rasii, to ciapier heta absalutna nacyjanalna-aryjentavanaja dziaržava».
«Nacyjanalna-aryjentavanymi» ŭ ciapierašnim rasijskim dyskursie nazyvajuć niezaležnyja nacyjanalnyja dziaržavy Uschodniaj Jeŭropy i palityčnyja siły, jakija taki kurs padtrymlivajuć.
«Hetyja pracesy z pytańniem «A navošta my tady vajavali?», biezumoŭna, zapuściać miechanizm centrabiežnych siłaŭ u rehijonach», — niekalki razoŭ prahavorvaje ŭ svaim artykule Jaŭhien Pryhožyn hety kašmarny dla Kramla scenar.
Čytajcie jašče:
U Rasii znajšli ŭžo siem mohiłak, na jakich masava chavajuć zahinułych vahnieraŭcaŭ
Rasijskija ŭłady šukajuć zamienu PVK «Vahnier» — brytanskaja raźviedka
«Padzie Krym». Pryhožyn dapuskaje, što abvał frontu moža pačacca pad Bachmutam
