Fota: AP Photo/ Evan Vucci
Na samym pačatku vystupleńnia Bajden adznačyŭ, što hod tamu pačałasia najbujniejšaja vajna ŭ Jeŭropie z časoŭ Druhoj suśvietnaj. I ŭ hetaj vajnie Ukraina praciahvaje abaraniacca i zachoŭvać niezaležnaść.
«Hod tamu pačałasia vajna i čakałasia padzieńnie Kijeva. Ja tolki što viarnuŭsia z Kijeva — i Kijeŭ mocna staić. Staić i hanarycca hetym. I hałoŭnaje, što jon volny», — adznačyŭ amierykanski prezident.
Amierykanski lidar skazaŭ, što ciapier adbyvajecca pierałomny momant u historyi, jaki vyznačyć budučyniu na dziesiacihodździ, tamu treba abaraniać pryncypy svabody.
«Dyktatar nikoli nie moža pieramahčy luboŭ naroda da svabody,
Brutalnaść nikoli nie złomić imknieńnie ludziej da svabody, a Ukraina nikoli nie daść pieramahčy Rasii, tamu što svabodnyja ludzi nikoli nie pahodziacca žyć u ciemry i niesvabodie», — padkreśliŭ jon.
Pa słovach Bajdena, paśla hoda poŭnamaštabnaj vajny ŭžo niama nijakich sumnievaŭ adnosna zachodniaj kaalicyi. Pucin, praŭda, usio jašče sprabuje pastavić pad sumnieŭ upeŭnienaść u tym, što NATA budzie abjadnanym, ale heta darma:
«Nijakich sumnievaŭ niama: NATA nie budzie padzielenym i my nie stomimsia ad Ukrainy, my budziem zaŭsiody padtrymlivać Ukrainu».
Uładzimir Pucin, pa słovach Bajdena, dumaŭ, što demakratyčnyja režymy słabyja, a aŭtakraty mocnyja. Ale atrymałasia naadvarot:
demakratyi pa ŭsim śviecie stali macniejšymi, aŭtarytarnyja režymy stali słabiejšymi. Aŭtakratam možna kazać tolki nie: nie, ty nie atrymaješ svabodu, nie, ty nie zabiareš maju krainu.
Płany Pucina paciarpieli krach i zamiest realizacyi svaich namieraŭ jon atrymaŭ całkam advarotnaje. Zamiest finlandyzacyi Ukrainy Rasija atrymała nataizacyju Finlandyi i Šviecyi.
Taksama Bajden padkreśliŭ, što ZŠA addanyja piatamu artykułu NATA:
«Heta śviaščennaja klatva — abaraniać kožny dziujm terytoryi NATA».
My praciahniem sankcyjny cisk na Rasiju, jakoha nie mieła nivodnaja kraina ŭ śviecie, zapeŭniŭ Bajden. Zachodni śviet budzie ŭvodzić novyja sankcyi. Chutka ZŠA razam ź jeŭrapiejskimi partniorami abjavić pra novy pakiet sankcyj.
Ale zachodniki — nijakija nie ahresary.
«ZŠA i jeŭrapiejskija krainy nie chočuć źniščyć Rasiju. My nie płanujem napadać na Rasiju, zachoplivać Rasiju, jak Pucin skazaŭ siońnia. My chočam žyć u miry. My nie vašy vorahi», —
źviarnuŭsia Džo Bajden da rasijan, adznačyŭšy, što rasijski prezident pry žadańni moža skončyć vajnu adnym słovam.
Čytajcie taksama:
Bajden: Biełarusy praciahvajuć zmahacca za svaju demakratyju
Bajden ździejśniŭ tajemny vizit u Kijeŭ paśla šmathadzinnaj pajezdki na ciahniku ad miažy z Polščaj
