Fota: BiełTA
U kramach elektratechniki hety tavar jašče nie źjaviŭsia. Niama navinki ni na sajcie «Haryzonta», ni ŭ internet-kramach.
«Pieršy biełaruski noŭtbuk vychodzić na rynak u madeli H-book MAK4. Heta ajčynnaja raspracoŭka, stvoranaja na asnovie pieradavoha dośviedu i technałohij. Heta sučasny kampjutar, jaki pa svajoj jakaści i pradukcyjnaści paraŭnajem sa znakamitymi brendami. Aparatnaja asnova H-book MAK4 raspracavana na pracesarach Intel Core 11 pakaleńnia, jakija zabiaśpiečvajuć pakazčyki bieśpierabojnaj pracy i vysokaj pradukcyjnaści jak va ŭmovach ofisnaj i chatniaj pracy, tak i pry vykanańni zadač vysokaj sistemnaj nahruzki, zachoŭvajučy pry hetym vyklučnuju aŭtanomnaść», — raskazaŭ BiełTA hienieralny dyrektar «Haryzonta» Jury Pradko.
Hiendyrektar raskazaŭ, što «nad stvareńniem praduktu pracavała vialikaja kamanda dyzajnieraŭ, inžynieraŭ, raspracoŭščykaŭ, schiematechnikaŭ, prahramistaŭ, vytvorcaŭ, markietołahaŭ ź mižnarodnym vopytam raboty».
Charaktarystyki biełaruskaha noŭtbuka. Fota: Tochka.by
Madel na i-3 pracesary pradajecca za 1599 rubloŭ, piša Tochka.by. Raniej paviedamlałasia, što biełaruski noŭtbuk u bazavaj kamplektacyi z dyjahanallu 15,6 calaŭ abydziecca ŭ sumu ad 1300 rubloŭ, ale, jak patłumačyŭ kansultant, vyjšła krychu daražej-z-za łahistyki.
Cikava, što ŭ adździele prodažaŭ pradpryjemstva «Haryzont», kudy telefanavała «Naša Niva», nie stali nazyvać canu.
«Cen u mianie niama. Prychodźcie na vystavu ŭ Galleria Minsk, tam možna pahladzieć noŭtbuki i ceny», — adkazali ŭ adździele.
Madel Asus z takimi charaktarystykami kaštuje kala 650 jeŭra.
U 2023-m u prodažy źjaviacca noŭtbuki z i-5 i i-7 pracesaram. Abiacajuć, što i-5 budzie na 200-300 rubloŭ daražej, piša Tochka.by.
Sieryjnaja vytvorčaść noŭtbukaŭ musiła startavać u listapadzie, ale zatym jaje pieranieśli na śniežań. U 2023 hodzie płanujuć vypuścić kala 80 madelej.