Ilustracyjny zdymak. Fota: AR
Pačała prychodzić infarmacyja pra hibiel pieršych mabilizavanych u Rasii na froncie. Naprykład, čelabinskija ŭłady aficyjna abjavili adrazu pra piać svaich žycharoŭ, jakija zahinuli. Heta adbyłosia ŭsiaho praz try tydni paśla abviaščeńnia tak zvanaj «častkovaj mabilizacyi». Pry tym, što cyvilnych abiacali vučyć miesiac, a Minabarony RF kazała, što nie budzie adpraŭlać na front niepadrychtavanych ludziej. Sapraŭdny skandał razharajecca vakoł adpraŭki mabilizavanych u Maskvie pad Svatava biez anijakaj padrychtoŭki. Jany jašče pa darozie na front trapili pad źniščalny ŭdar ukrainskaj artyleryi.
Prapahandystka Anastasija Kašavarava piša, što niekatorych kamandziraŭ «na miescach» treba rasstralać.
«Spadary aficery, vy nie majecie nijakaha maralnaha prava nasić svaje zvańni i pahony.
Vynik mabilizacyi — nienavučanych dziaciej kidajuć na pieradavuju. Čelabinsk, Jekaciarynburh, Maskva — užo prychodziać cynkavyja truny.
Vy nam kazali, što budzie navučańnie, što ich nie adpraviać praz tydzień na pieradavuju. Znoŭ chłusili?» — piša jana.
Kašavarava zaklikaje kamandziraŭ «na miescach» skazać praŭdu.
«Znajdzicie ŭ sabie mužnaść pryznać, što heta vajna. Što ničoha nie chapaje. Što ŭsio było na papiery i na vystavach. Źviarniciesia da naroda z praŭdaj i skažycie, što nam patrebna dapamoha. A nie tak, čuješ ty, idzi vajuj i dochni. Tabie skazana — biez razmoŭ idzi. Čuješ, maci, nie vyj, usie pamirajuć».
Prapahandystka ŭparta robić akcent na kamandzirach na miescach.
«Jany navat źvierchu kamand nie słuchajuć. Sałdafony», — piša jana.
«Źnizu nie bajacca pakarańnia naohuł. Pradajuć praz «Avita» ciepłavizary. Pradajuć ryštunak. Nie navučajuć mabilizavanych. Vajenkamy nie pravodziać miedahlad — u vyniku ŭ šerahach epileptyki i aŭtysty. Jany nie bajacca ni Hierasimava, ni Šajhu, ni Pucina, ni prakuraturu — nikoha. A ŭ vyšejšaha načalstva nie va ŭsich jość maralnaje prava na ich hnać, tamu što sami pra..balisia», — piša jana.
Rasijski vajskovy karespandent Raman Sapańkoŭ u svaim kanale piša zihzahapadobna, praz «nie ŭsio tak adnaznačna» (mienavita hetymi słovami), ale ŭsio adno i jon prychodzić da vysnovy, što «skrynia Pandory adčynienaja».
Ilustracyjny zdymak. Fota: AR
Jon ličyć, što biez mabilizacyi niemahčyma było abyścisia i ŭpeŭnieny, što «hibiel mabilizavanych my ŭbačym, na žal, nie raz».
Sapańkoŭ miarkuje, što «dziaržaŭnym mužam» treba pracavać z nasielnictvam.
«Kali vy praciahniecie ŭ tym ža duchu (a na źmianieńnie infarmacyjnaj daktryny niedarečna spadziavacca na vośmy miesiac SVA), to chutka atrymajecie chvalu lutaści z tyłu, vyklikanuju poŭnym nierazumieńniem, za što zahinuli baćki/mužy/syny, paśla jakoj da lutaha 1917 zastaniecca adzin krok. I vybaru ŭ vas niama nijakaha, skryniu Pandory vy ŭžo adčynili».
Kanał «Brosok manhusta» raspaviadaje, jak «hrupu mabilizavanych maskvičoŭ i žycharoŭ Padmaskoŭja adpravili ŭ zonu SVA biez navučańnia i padrychtoŭki pa rasparadžeńni hienierała Zuśko».
Kanał piša, što ŭsie jany byli pryzvanyja ŭ 27-ju motastrałkovuju bryhadu, 15-y połk u pieršyja dni mabilizacyi — 22-24 vieraśnia.
Ilustracyjny zdymak. Fota: AR
27 vieraśnia vajskovuju častku ŭ Nara-Faminsku naviedaŭ ministr abarony RF Šajhu, i jamu «ŭračysta pad kamiery presy» pakazali, jak nibyta idzie padrychtoŭka mabilizavanych.
«U sapraŭdnaści, u toj dzień jany pieršy i apošni raz byli na palihonie. Na nastupny dzień ich adpravili ŭ Vałujki Biełharodskaj vobłaści, nibyta znoŭ na pierapadrychtoŭku. Ale tam znoŭ nichto i ničomu nie vučyŭ. A 2-3 kastryčnika mabilizavanych pa rasparadžeńni hienierała Zuśko adpravili na liniju frontu, u rajon Svatava».
Pavodle infarmacyi kanała, z 3 kastryčnika na suviaź jany nie vychodziać. Častku ź ich svajaki znajšli ŭ špitalach Biełharadskaj vobłaści.
Paranienyja raspaviadajuć, što kałona mabilizavanych trapiła pad abstreł padčas nabližeńnia da linii frontu.
«Mabilizavanyja zastalisia biez kamandavańnia i biez kiravańnia. Zahadaŭ, jak dziejničać, im nichto nie addavaŭ. Tamu jany panieśli surjoznyja straty, pa fakcie nie ŭstupiŭšy ŭ pramoje bojesutyknieńnie».
Kali infarmacyja pra straty stała viadomaja rodnym mabilizavanych, jany źviarnulisia ŭ vajskovyja čaści.
«Tam im adkazali, što ludzi, jakich jany šukajuć, heta značyć ich rodnyja, nie ličacca ŭ čaści i nie ličylisia raniej. A taksama ich niama siarod mabilizavanych», — piša kanał.
Ilustracyjny zdymak. Fota: AR
«Katastrofa z mabilizavanymi na Biełharadskim kirunku naśpiavała nie adzin tydzień. <…> U Maskvie ŭ adnym viedamstvie, jakoje daŭno vyklikaje pytańni, pa-raniejšamu lubiać prymać dobryja dakłady. Tolki dobryja.
U kožnaj katastrofy jość proźvišča, imia i imia pa baćku. Hałoŭnaje, kab znoŭ na hanarovuju pasadu va ŭpraŭleńnie nad usimi ŭpraŭleńniami nie pieraviali. Lepš ich u akopy. Biez prava pryniaćcia rašeńniaŭ. Kab na sabie ŭsio vyprabavali», — nieviadoma na kaho namiakaje kanał «Dva majora», ale, vidać, nie na Pucina.
Čytajcie taksama:
«Staŭleńnie skockaje». U sacsietkach zjaviłasia videa, na jakim sotni ŭzbrojenych ludziej u Biełharodskaj vobłaści skardziacca na chaos pry mabilizacyi
Jakija rasijskija rehijony addali bolš za ŭsio mužčyn na vajnu i što Pucinu daść mabilizacyja?
