Apošniaja spravazdača — u lipieni
14 vieraśnia ministr achovy zdaroŭja Dźmitryj Pinievič vykazvaŭsia pa situacyi z zachvorvańniem na COVID-19 u krainie:
«U Biełarusi rehistrujecca nievialiki rost zachvorvańnia na VRI (vostryja reśpiratornyja infiekcyi), hryp i kavid, adnak temp pryrostu ŭ dva razy nižejšy, čym uvosień 2021 hoda».
Ci sapraŭdy pryrost nie taki ŭžo i vialiki? Abo čas dastavać maski z antresolaŭ užo nadyšoŭ?
Na zapyt pra dakładnyja ličby pa śviežych zachvorvańniach na kavid, Minzdaroŭja dało karotki adkaz: «Nijakich niama».
I heta adpaviadaje palitycy «adkrytaści» danych pa kavid, jakuju abvieściła ministerstva ŭ traŭni. Tady viedamstva paviedamiła, što bolš nie budzie kožny dzień publikavać spravazdačy pa roście zachvorvańniaŭ na kavid, kolkaści pamierłych i h.d.:
«U suviazi z tym, što ŭ krainie rehistrujecca nievialikaja kolkaść pacyjentaŭ ź infiekcyjaj COVID-19, Ministerstva achovy zdaroŭja z 11 maja budzie abnaŭlać statystyčnyja danyja 1 raz na miesiac — štomiesiac pieršaha čysła».
Apošniaja spravazdača była ŭ lipieni — zhodna ź joj, za maj-červień zafiksavali bolš za 11 tysiač vypadkaŭ. Ni ŭ žniŭni, ni ŭ vieraśni čynoŭniki statystyku nie nazyvali.
Kantrol nad situacyjaj z COVID-19, jaki choča tranślavać ministr achovy zdaroŭja, na siońnia publična nie padmacavany nivodnaj ličbaj. My nie viedajem ni kolkaści zachvarełych, ni kolkaści ciažkich vypadkaŭ, ni tym bolš pra śmierci ad karony (u Litvie, naprykład, zafiksavana 9 śmiarotnych vypadkaŭ ad karony ŭ vieraśni).
U krainach-susiedziach druhi tydzień fiksujecca rost kolkaści zarehistravanych vypadkaŭ infikavańnia na kavid, a taksama śmiarotnych vypadkaŭ.
Pryrost zachvarełych adnosna minułaha tydnia składaje:
- Polšča: +36%, 29 047 novych vypadkaŭ za tydzień, 206 śmierciaŭ z pačatku miesiaca,
- Litva: +44%, 7 325 novych kiejsaŭ, 9 śmierciaŭ,
- Łatvija: +31%, 6 493 novych vypadkaŭ, 18 śmierciaŭ.
Pa Biełarusi danyja adsutničajuć.
Majučy letašnija źviestki, paličym. Pinievič skazaŭ, što «tempy pryrostu» zachvarełych u dva razy mienšyja (50%), čym tempy minułahodniaj vosieni.
Tak vyhladaje temp letašniaha rostu zachvorvańnia na kavid u Biełarusi pa aficyjnaj statystycy. Najvyšejšy pryrost u 23% my nazirali na pačatku vieraśnia 2021 hoda. U adpaviednaści sa słovami ministra, ciapierašni pryrost musić być udvaja nižejšy, a heta značyć — kala 10-12%. Praŭda, biełaruskaja karcinka nie ŭpisvajecca ŭ karcinu rehijonu.
U niekatorych paliklinikach u dzień fiksujuć pa 40 novych vypadkaŭ kavidu
U adnoj ź minskich paliklinik raskazvajuć, što dniami była narada nakont karanavirusa.
«Skazali brać bolš mazkoŭ, — dzielicca terapieŭt. — Biarom ich u tych, u kaho jość padazreńnie na karonu, u ciažarnych i pažyłych. Asnoŭnyja simptomy ciapierašniaha štama — tempieratura i bol u horle».
Doktar zaŭvažaje, što raniej jany rabili mazki čaściej, bo za vyjaŭlenyja vypadki kavid miedyki mieli dapłaty. Ciapier, kali dapłat niama, vyjaŭlenyja vypadki mała na što ŭpłyvajuć.
U niekatorych minskich paliklinikach u dzień fiksujuć kala 30—40 novych vypadkaŭ kavidu (u razhar zimovaj chvali stanoŭčych testaŭ było ŭ 4 razy bolš). Pastupovy rost zachvorvańniaŭ adznačajuć z pačatku vieraśnia.
«Kali ŭ žniŭni ŭ nas na adździaleńnie było ad pary da 10 vizitaŭ na dom da pacyjentaŭ z tempieraturaj (heta nie abaviazkova karona), to ciapier pa 20—30 na dzień. Ale heta istotna mienš, čym ŭ papiaredniuju chvalu — tady ŭ kancy studzienia było pa 60—80 vizitaŭ z tempieraturaj na adździaleńnie».
U hetaha štama niama takoha simptomu, jak strata niuchu
Doktarka Alena pracuje ŭ adnym z pryvatnych miedyčnych centraŭ Minska. Naprykancy žniŭnia pa ŭnutranym rašeńni tut viarnuli masačny režym i tempieraturny manitorynh. Na ŭmovach ananimnaści doktarka raskazała, jak bačyć situacyju vakoł COVID-19 sa svajho pracoŭnaha miesca.
«Vierasień sam pa sabie miesiac, kali idzie rost: paśla leta dzieci źbirajucca ŭ kalektyvy — i pačynajecca.
Pryvatnyja miedycynskija centry, jak moj, nie majuć prava zajmacca lekavańniem karanavirusnaj infiekcyi, i kali jość paćvierdžany testam vypadak, to my nakiroŭvajem pacyjenta dalečvacca ŭ palikliniku pa miescy žycharstva», — kaža lekarka.
«Treba razumieć, što ŭ Biełarusi ciapier kavidam moža być usio. Daktaram dazvolili stavić dyjahnaz COVID-19 biez łabaratornaha paćviardžeńnia. Tamu mała chto zdaje testy i niešta daśleduje».
Ci lohka adroźnić karanavirusnuju infiekcyju ad hrypu ci VRI biez testu?
«Simptomy hetych zachvorvańniaŭ padobnyja i biez łabaratornych daśledavańniaŭ na 100% być upeŭnienaj ciažka, — kaža Alena. — Kali idzie chvala zachvorvańnia, nam kažuć, što nie varta ŭsich adpraŭlać na analizy, a dyjahnaz treba stavić pa klinicy zachvorvańnia. Toje ž i z karonaj.
U hetaha štama niama takoha simptomu, jak strata niuchu. Mocny bol u horle jość, vysokaja tempieratura taksama, ale nie va ŭsich. Jak pacyjenty raskazyvajuć, hetaja chvala pieranosicca lahčej za inšyja».
Doktarka miarkuje, što pa vialikim rachunku najaŭnaść łabaratornaha testu na mietodyku lekavańnia nijak nie ŭpłyvaje. Surjoznaj izalacyi, jak toje raniej było, užo niama. Tamu ŭ biełaruskich realijach, z punktu hledžańnia daktaroŭ i pacyjentaŭ, sens rabić testy hublajecca.
Pry hetym doktarka dadaje, što karonavirus vysokakantahijoznaja infiekcyja, zaraznaja, tamu pažadana vytrymlivać samaizalacyju pry mahčymaści.
Pryvatnym vypadkam padzialiłasia mahilaŭčanka Safija, jakaja ŭ vieraśni zachvareła na COVID-19 druhi raz. Žančyna pracuje ŭ dziaržustanovie, viadzie pryjom hramadzianaŭ:
«U piatnicu ja była na pryjomie. A ŭ subotu ŭžo adčuła siabie błaha: była tempieratura, mocny bol u horle. Na paniadziełak ja vyklikała doktarku z palikliniki. Jana vypisała schiemu lačeńnia, pastaviła dyjahnaz VRI. Ale ŭ mianie stareńkija baćki, i ja nie chaču ryzykavać ichnym žyćciom. Ja patłumačyła doktarcy situacyju i paprasiłasia na test».
Pra pazityŭny vynik testu Safija daviedałasia na nastupny dzień, atrymała pradpisańnie na samaizalacyju. Paśla jana naviedvała palikliniku, kab pierapisać dyjahnaz z VRI na karonu. Pa jaje słovach, da adnaho doktara siadzieła 15 pacyjentaŭ.
Nahadajem, što ŭ minułuju chvalu kavidu, jakaja była ŭzimku, statystyka Minzdaroŭja ŭ asobnyja dni dachodziła da 8 tysiač novych vypadkaŭ. U vierasień letaś kolkaść novych aficyjnych vypadkaŭ u razhar chvali składała amal 2 tysiačy.
