Adrazu ŭ niekalkich rasijskich rehijonach iduć pieratrusy ŭ žurnalistaŭ, paviedamlaje «Bi-bi-si».
Ich źviazvajuć sa spravaj ab «vajennych fejkach» suprać Illi Panamarova, jaki pražyvaje ŭ Kijevie.
U Maskvie siłaviki pryjšli ź pieratrusam da fatohrafa Rusłana Suchušyna. «Supracoŭniki zajavili, što śledčyja dziejańni pravodziacca z-za pastoŭ, jakija haniać vojska RF, a taksama z-za «suviazi ź Illom Panamarovym».
U Jekaciarynburhu ranicaj u čaćvier ź pieratrusami pryjšli da hałoŭnaha redaktara «Viačernich viedamaściaŭ» Uładzisłava Postnikava. Pavodle apublikavanaha videazapisu, siłaviki vyłamali dźviery ŭ kvatery žurnalista, ale ŭnutry nikoha nie vyjavili. Taksama paviedamlajecca, što pieratrusy prajšli ŭ ramkach spravy ab «vajennych fejkach». Pośnikaŭ moža być źviazany z antyvajennym prajektam «Utro fievrala».
Prajšoŭ pieratrus u Rastovie-na-Donie ŭ žurnalistki RusNews Beły Nasibian. Pierad hetym žurnalistka vyjaviła, što ŭ jaje zabłakavanyja bankaŭskija rachunki.
Siłaviki pryjšli taksama da žurnalista Siarhieja Nosava ŭ Arłoŭskaj vobłaści i administratara krajaznaŭčaha partała «Arlec» Viktara Zyranava — jon žyvie ŭ padmaskoŭnym Reutavie.
Adbyŭsia pieratrus u Ciumieni ŭ žurnalistki Julii Hłazavaj z «Sibir.Realii».
Akramia taho, paviedamlajecca pra pieratrusy ŭ padmaskoŭnym Adzincovie— u čatyroch žurnalistaŭ i dyrektara partała «Adzincova-infa» Andreja Astravuchava. Jany taksama źviazany z spravaj ab «vajennych fejkach», adnak, pa dadzienych «AUS-infa», jano było zaviedziena z-za siami publikacyj na sajcie partała. Pra suviazi partała ź Illoj Panamarovym ničoha nie viadoma.
Illi Panamarovu pradjaŭlenaje abvinavačvańnie ŭ raspaŭsiudžvańni «fejkaŭ» pra rasijskuju armiju «pa matyvach palityčnaj, ideałahičnaj, rasavaj, nacyjanalnaj abo relihijnaj nianaviści», za što praduhledžana da 10 hadoŭ pazbaŭleńnia voli. U Rasii jon zavočna aryštavany.
