Jaŭhien Hucałaŭ žyŭ u Viciebsku. U 2019 hodzie pra jaho pisali ŚMI — małady čałaviek za 10 dzion prabieh Biełaruś z poŭnačy na poŭdzień, adoleŭšy 650 kilametraŭ. Z 2015 hodu Jaŭhien arhanizoŭvaŭ pachody pa Turcyi, vadziŭ hrupy pa cikavych miaścinach. U 2020-m jaho za ŭdzieł u maršach pratestu zatrymlivała milicyja. Paśla hetaha ŭ 2021-m Hucałaŭ pierabraŭsia ŭ Turcyju. Pierajechaŭšy, daviedaŭsia, što na radzimie na jaho zaviali kryminalnuju spravu za «źniavahu dziaržaŭnych symbalaŭ» (artykuł 370 Kryminalnaha kodeksu). Tak milicyja rascaniła publikacyju satyryčnaha videa ŭ Instagram.
Paśla tureckaha ziemlatrusu 2023 hodu Jaŭhien uklučyŭsia ŭ valanterskuju dziejnaść, źbiraŭ dapamohu paciarpiełym. U krasaviku 2023-ha jon vyrašyŭ vyjechać u Jerevan, kab «abnulić» čas znachodžańnia ŭ krainie i paśla padać dakumenty na novy dazvoł na žycharstva. Ale ŭ Armenii biełarusa zatrymali prosta ŭ aeraporcie — u Biełarusi jaho padali ŭ vyšuk. Jaŭhien pasiadzieŭ trochi ŭ turmie i dabiŭsia, kab jamu dazvolili vyjechać z Armenii.
Pabłukaŭšy pa śviecie, Hucałaŭ vyrašyŭ vypravicca pa śladach sułtana Sulejmana. Toj išoŭ zavajoŭvać Eŭropu ŭ 1529 hodzie i dajšoŭ sa Stambułu až da Vieny. Ciapier Jaŭhien idzie piechatoj ź Vieny da Stambułu — heta 2,5 tysiačy kilametraŭ.
Z adnym zaplečnikam — praź siem krain
Šlach sułtana Sulejmana ź Vieny ŭ Stambuł nazyvajuć symbalem jadnańnia ludziej roznych nacyjanalnaściaŭ, relihij i kultur. Jon pačynajecca ad sabora Śviatoha Stefana ŭ Vienie. Zvany chrama byli vypłaŭlenyja z tureckich harmat. Zakančvajecca šlach la mahiły sułtana ŭ Stambule.
Jaŭhien kaža, što ŭbačyŭ niejak u internecie videa pra dziaŭčynu, jakaja išła šlacham sułtana Sulejmana. I vyrašyŭ kinuć vyklik sabie. Na pytańnie «Ty idzieš adzin?» biełarus adkazaŭ: «Jak adzin? Sa mnoj uvieś Suśviet!». Jaŭhien užo prajšoŭ praz Aŭstryju, Słavaččynu, Vuhorščynu, Charvatyju. Ciapier jon u Serbii. Napieradzie Baŭharyja, Hrecyja i Tureččyna.
U padarožža Jaŭhien padabraŭ dobry abutak, jaho zaplečnik važyć kala siami kilahramaŭ. Aproč inšaha, tam namiot i dron dla zdymak. Šlach sułtana Sulejmana absłuhoŭvajuć valantery. Jany prysłali Jaŭhienu mapu, kiepku, «pašpart padarožnika» dla piačatak i turystyčnyja daviedniki.
U Aŭstryi biełarusa najbolš uraziła «absalutnaja čyścinia» — ani na darozie, ani ŭ lesie Jaŭhien nia ŭbačyŭ «ni papierki, ni butelki». Načuje jon pieravažna ŭ namiocie, ale kali temperatura była «kala nula», to skarystaŭsia pasłuhami chostełu. U Vuhorščynie Hucałava najbolš uraziŭ horad Esterhom. Jon jašče nazyvajecca «vuhorskim Vatykanam» za bazyliku, padobnuju da rymskaj.
«Ja ciapier uspaminaju tuju bazyliku ŭ Esterhomie — i ŭ mianie prosta muraški pa skury! Heta samaje pryhožaje, što ja bačyŭ», — kaža padarožnik.
Pamiežnik nazvaŭ «krejzi menam» i pačastavaŭ kavaj
U Vuhorščynie Jaŭhien paznajomiŭsia ź miascovymi — šukaŭ miesca, dzie pastavić namiot. Jamu prapanavali spynicca la doma ŭ vioscy na bierazie Dunaju. Razmaŭlali na vuhorskaj movie praź internet-pierakładčyk.
«Ludzi haścinnyja, zaprasili na viačeru, nakarmili, napaili. Razmova tyčyłasia i palityki taksama. Jany akazalisia abaznanymi ŭ biełaruskaj sytuacyi. Kazali pra svajho premjera Orbana ŭ tym planie, što sytuacyja padobnaja ŭ niečym u ich i nas», — kaža vandroŭnik.
U Vuhorščynie ŭ Jaŭhiena zdaryŭsia i niepryjemny incydent — u niejkaj vioscy da biełarusa pryčapilisia nieviadomyja. Pavodzili siabie ahresiŭna. Jaŭhien nie razumieŭ, čaho jany chočuć. Nieznajomcy chapalisia za jahony hadzińnik. Daviałosia ich adšturchnuć i praciahnuć svoj šlach.
Pieršaj miažoj z pašpartnym kantrolem na darozie Jaŭhiena Hucałava była vuhorska-serbskaja.
«Vuhorski pamiežnik spytaŭ, kudy ja nakiroŭvajusia, na anhielskaj movie. Kali ja skazaŭ, što idu piechatoj u Stambuł, jon mianie nazvaŭ «krejzi men» i pačastavaŭ kavaj. Na serbskim baku niejki čas marudzili z maimi dakumentami, ale prapuścili i pažadali dobraj darohi, maŭlaŭ, idzi ŭ svoj Stambuł», — kaža biełarus.
Kali jon apynuŭsia na terytoryi Serbii, to niekatoryja znajomyja i padpisčyki ŭ Instagram pačali pałochać Jaŭhiena, što tami žyvuć prychilniki «russkoho mira», tam niebiaśpiečna.
«Mnie zdajecca, heta mif. Ja pierasiakaŭsia tut ź miascovymi, razmaŭlaŭ ź imi. Narmalnyja!» — śćviardžaje vandroŭnik.
Na ŭsio Jaŭhien zakładaŭ biudžet u 1,5 tysiačy eŭra. Kaža, što «dobrym danatam» jamu dapamahajuć i padpisčyki ŭ Instagram.
Što paśla Stambułu?
«Pakul nia viedaju. Moža być, pa Tureččynie pahulaju», — havoryć Jaŭhien.
Čytajcie taksama:
Brytaniec hod bieh praz usiu Afryku, kab spravicca z ałkahalizmam
Biełarus źniaŭsia ŭ papularnym amierykanskim sieryjale i raskazaŭ, što było na zdymačnaj placoŭcy
