Niamieckija karabli «ŭspłyli» na Dunai ŭ Sierbii
Ekstremalnaja śpioka i zasucha ŭ krainach Jeŭropy hetym letam vysušvajuć mnohija vadajomy kantynienta, adkryvajučy vačam roznyja abjekty, kaliści nadziejna schavanyja pad vadoj.
U sierbskim Prachavie ŭzrovień vady ŭ Dunai nastolki źniziŭsia, što ahaliŭ pareštki 20 vajskovych karabloŭ Treciaha rejcha, zatoplenych u 1944 hodzie pry adstupleńni niamieckaj čarnamorskaj fłatylii pad naciskam savieckich vojskaŭ.
Choć bolšaść sudnaŭ pachavanyja pad piaščanymi vodmielami, niekatoryja ź ich viežaŭ, mačtaŭ, karpusoŭ i kamandnych mastkoŭ prykmietna vystupajuć nad vadoj, što surjozna abciažarvaje sudnachodstva. Sudnachodny ŭčastak zvuziŭsia sa 180 da 100 m.
Ryzyka ŭ tym, što vajskovyja karabli byli zatoplenyja z bojezaradami. U Sierbii aścierahajucca, što nieaściarožnyja pavodziny dajvieraŭ i inšych cikaŭnych mohuć pryvieści da detanavańnia starych tarpied i snaradaŭ.
U Ispanii turysty śpiašajucca ŭbačyć staražytny dalmien i carkvu
U centralnaj Ispanii zasucha ahaliła Huadalpieral, dahistaryčny dalmien.
Niamiecki archieołah Uha Obiermajer raskapaŭ artefakt u siaredzinie 1920-ch hadoŭ. Kruh ź dziasiatkaŭ miehalityčnych kamianioŭ, jaki taksama nazyvajuć «ispanskim Stoŭnchendžam», datujecca 5000 hodam da našaj ery. Kamiani znachodziacca ŭ vadaschoviščy Valdekańjas, jakoje z-za zasuchi zapoŭnienaje ŭsiaho na 26 adsotkaŭ.
Ciapier u archieołahaŭ jość mahčymaść vyvučyć relikvii, jakija źjaŭlalisia śvietu tolki čatyry razy. Miascovyja histaryčnyja i turystyčnyja asacyjacyi ŭžo vystupajuć za pieramiaščeńnie kamianioŭ Huadałpieral u muziej abo ŭ inšaje miesca na sušy. Na ich dumku, heta stanie novaj «prynadaj» dla turystaŭ. Ale miascovyja łodačniki suprać: artefakt, jaki vystupaje z vady, staŭ vielmi papularny, tak što ad achvotnych pahladzieć na «ispanski Stoŭnchendž» niama adboju.
Abmialełaje sioleta vadaschovišča Saŭ pakazała śvietu i turystam zatoplenuju ŭ 1962 hodzie carkvu San-Roma. Ciapier jana stała miascovaj słavutaściu, a mer haradka Viłanova-de-Saŭ Žaan Ryjera maje namier surjozna abmiežavać płyń achvotnych jaje ŭbačyć. U horadzie zusim nie rady «suchomu turyzmu»: viziciory vytoptvajuć bierahi, pakidajuć paśla siabie hory śmiećcia, sprabujuć dabracca da carkvy, a hałoŭnaje, jany pavialičvajuć raschod vady, arandujučy haścinicy abo apartamienty ŭ akruzie.
Kamiani voziera Harda stali miescam dla fotasiesij
U Italii ŭ kancy červienia zasucha ahaliła patanułuju baržu časoŭ Druhoj suśvietnaj vajny, jakaja spačyvaje na dnie raki Po.
A ŭ lipieni vody raki Tybr apuścilisia tak nizka, što źjaviŭsia zvyčajna zatopleny rymski most I stahodździa da n. e.
Na dekaracyi fantastyčnaha filma stała padobnaje abmialełaje voziera Harda: ahalilisia vybielenyja skały, tak što turysty pryjazdžajuć siudy nie tolki zaharać, ale i fatahrafavacca.
U Vialikabrytanii ŭzrovień vadaschovišča staŭ takim nizkim, što na pavierchni źjavilisia ruiny valijskaj vioski, zatoplenaj u XIX stahodździ.
Račnyja kruizy pa Rejnie prypynienyja
Abmialełyja reki Hiermanii prynosiać straty arhanizataram račnych kruizaŭ. Tak, u niamieckim miastečku Kaŭb uzrovień Rejna źniziŭsia da 36 sm, i heta pry tym, što sudnachodstva tut całkam stratnaje ŭžo pry 40-santymietrovym uzroŭni vady.
Miascovyja ŚMI ŭžo nazvali hetuju situacyju «dramaj na Rejnie»: kłasičnyja maršruty kruizaŭ stali niemahčymyja. Sudnachodnyja kampanii i turapieratary vymušanyja dziejničać pa situacyi: ciepłachod vykarystoŭvajuć tolki jak płyvučy hatel, a dla pierasoŭvańniaŭ turystaŭ pa maršrucie davodzicca vykarystoŭvać aŭtobusy.
U Hiermanii strojać piesimistyčnyja prahnozy: jašče adno takoje leta, i ŭsie turapieratary, jakija pracujuć na Rejnie, prosta masava zbankrutujuć.
U fantannaj stalicy Francyi adklučyli fantany
U Francyi ŭ niekatorych miescach amal całkam vysachli ŭčastki Łuary. Nu a viadomy svaim 41 fantanam Piern-le-Fanten, siaredniaviečny horad na poŭdni Francyi, adklučyŭ znakamityja fantany. Tradycyja havoryć, što pitnaja vada z hetych fantanaŭ prymušaje zakachacca, ale, vidavočna, što heta adbudziecca ŭžo nie ŭ hetym hodzie.
Pavodle acenak Jeŭrakamisii, zasucha ŭ niekatorych rehijonach Jeŭropy moža praciahnucca da listapada 2022 hoda. U pieršuju čarhu heta tyčycca Partuhalii i Ispanii. Na kaniec žniŭnia amal u pałovie jeŭrapiejskich krain dziejničaje papiaredžańnie ab zasusie. Zasuchu-2022 užo nazyvajuć samaj mocnaj za apošnija 500 hadoŭ.
