Fota: airlines-inform.com
Avijakampanija była ŭklučanaja ŭ piaty pakiet sankcyj suprać biełaruskaha režymu, uviedzieny ŭ śniežni minułaha hoda ŭ suviazi ź mihracyjnym kryzisam na miežach Jeŭrasajuza. U abhruntavańni rašeńnia havaryłasia, što letam 2021 hoda Cham Wings pavialičyła kolkaść rejsaŭ z Damaska ŭ Minsk, jakimi pieravozilisia mihranty, što zatym nielehalna pierasiakali miežy ź ES.
Pastanova źniać sankcyi z avijakampanii była pryniataja 18 lipienia, bo sankcyi nibyta ŭžo prynieśli žadany vynik, rastłumačyŭ aficyjny pradstaŭnik kiraŭnika jeŭrapiejskaj dypłamatyi Žazepa Barela, paviedamlaje Reuters.
«Pavodle infarmacyi, pradstaŭlenaj Radzie, Cham Wings spyniła dziejańni, za jakija była ŭniesienaja ŭ sankcyjny śpis», — zajaviŭ pradstaŭnik Barela.
Pradstaŭniki avijakampanii, jakaja ŭ ciapierašni čas pracuje z tryma samalotami, jakija lotajuć u asnoŭnym pa Blizkim Uschodzie, pryvitała rašeńnie ES. Dyrektar pa raźvićci biznesu i suviaziach z hramadskaściu Usama Satea zajaviŭ u sieradu, što avijakampanija piarečyła suprać pieršapačatkovaha čornaha śpisu ES i zajaviła, što razvarot źjaŭlajecca «probliskam nadziei». Ale adnaŭleńnie palotaŭ u Jeŭropu adbudziecca nie adrazu.
