Hitanas Naŭsieda. Fota: R. Dačkaus/Prezidentūra
«Dumaju, što my šmat zrabili, kab Litva była bolš ustojlivaj da enierhietyčnaha i ekanamičnaha šantažu Rasii. I siońnia, kali ja hladžu na niekatoryja inšyja krainy Zachodniaj Jeŭropy, ja baču vialiki šlach, jaki Litva prajšła za krychu bolšy čas», — skazaŭ litoŭski prezident.
Jon nahadaŭ, što Litva abviaściła siabie całkam niezaležnaj ad rasijskich enierhanośbitaŭ, tady jak, da prykładu, Hiermanija razhladaje roznyja varyjanty ekanomii enierhii ŭ zimovy pieryjad.
«Možna vyrazna ŭbačyć, što palityka, jakaja nie mieła nijakich iluzij u dačynieńni da Rasii, spracavała značna lepš, čym tak zvanaja realpolitik, jakaja ciapier źjaŭlajecca hałaŭnym bolem niekatorych zachodnich dziaržaŭ.
Ja razumieju ich stanovišča, ale heta ŭ čarhovy raz paćviardžaje, što Litva pajšła pravilnym šlacham. I čym chutčej inšyja zachodniejeŭrapiejskija krainy vybieruć hety ž šlach, tym lepš i lahčej budzie dla ŭsich», — padsumavaŭ Naŭsieda.
U toj ža čas jon pierakanany, što Hiermanija zmoža pieražyć samyja składanyja «hod-paŭtara» i taksama pazbavicca ad zaležnaści ad Rasii.
«Ja spadziajusia na doŭhaterminovuju vakcynacyju suprać Rasii. Inšymi słovami, nie budzie palitykaŭ, jakija praz hod-paŭtara buduć kazać: nam znoŭ treba ŭmacavać stasunki (z Rasijaj), bo Rasija byccam by źmianiłasia ci pajšła na peŭnyja sastupki. Vielmi niebiaśpiečna kiravacca takimi iluzijami», — dadaŭ prezident Litvy.
