Fota: pixabay.com
«Chaču padzialicca dobrym. U Minsku ŭ adnoj kaviarni ŭ čakańni žonki ja padyšoŭ da bara i paprasiŭ kavy (nie filižanku, a kubačak). Paprasiŭ zabialić viarškami. Dziaŭčyna nie ŭsio adrazu zrazumieła. Ale zrazumieła. Tut jaje paklikała žančyna i niešta padkazała. Dziaŭčyna zaŭśmichałasia, padyšła da mianie i kaža: «Dla Vas jość prezient. Adzin z našych naviedvalnikaŭ pakinuŭ cydułku», — i pakazvaje cydułku, jakaja prymacavanaja da ściany».
U toj niečakanaj cydułcy było napisana: «Tamu, chto budzie havaryć pa-biełarusku, prašu prezientavać kubačak kavy».
«Zrazumieła, kava hetym dobrym čałaviekam była apłačanaja. Było vielmi pryjemna. Ja zrazumieŭ, što i takim čynam my možam pamahčy adzin adnamu. Ja zrabiŭ toje samaje: pakinuŭ cydułku z prezientam dla biełarusa. Toje ž zrabiŭ u Mazyry (tolki ŭ piviarni). Chaj poŭnicca naš Kraj dobrymi ludźmi i ŭčynkami!» — napisaŭ Uład.
Tak zvanaja «padviešanaja kava», kali klijent apłačvaje nie tolki svaju kavu, ale i tamu, chto nie moža jaje kupić, — viadomaja zaviadzionka ŭ śviecie. Ale takaja madyfikacyja jaje vyklikała zachapleńnie ŭ čytačoŭ. «Zrablu toje samaje, na sercy adrazu tak ciopła stała!», «Heta vielmi kruta! Treba ŭziać na ŭzbrajeńnie!», «Natchniaje! Dziakuj. I heta ŭsio pra nas», — pišuć jany.
Uład raić stvarać novyja adrasy takich «pieradačak».
«U Mazyry ŭ adnoj piviarni padavali piva ŭ płastykavych kubkach, što ja nie lublu; tamu vykupiŭ u ich ža kuchal, sam papiŭ i pakinuŭ prezient dla biełarusa. Zrazumieła, što barmen (ci haspadar bara) moža prysabiečyć vaš pačastunak, ale jość spadzieŭ na dobrych ludziej».
Jašče adna jaho parada: pačastunak treba pakidać ź liku tych tavaraŭ ci pasłuh, asartymient jakich tryvały i nie mianiajecca ciaham dnia/tydnia.
