Pytańnie, na jakich miežach pryznanych učora «DNR» i «ŁNR» vyrašyć urešcie spynicca Kreml — nie banalnaje. Bo jość miežy, zajaŭlenyja «respublikami» jašče padčas ich uźniknieńnia 8 hadoŭ tamu, to-bok administracyjnyja miežy ŭkrainskich Danieckaj i Łuhanskaj abłaściej. A jość taja linija, jakaja skłałasia paśla bajavych dziejańniaŭ 2014—2015 hadoŭ faktyčna i jakaja składaje pryblizna tracinu ad aficyjna zajaŭlenaj terytoryi.
Jaŭna nievypadkova toje, što ni ŭ vielmi praciahłym śpičy Pucina, ni ŭ padpisanych paśla jaho dakumientach pytańnie miežaŭ «DNR» i «ŁNR» nie akreślivajecca nijak. I tamu pakidajecca vialikaja prastora dla interpretacyj. Nie tolki siarod ekśpiertaŭ i naziralnikaŭ, ale navat u samich rasijskich palityčnych kołach.
Pieršaja zajava pra heta z vusnaŭ rasijskaha čynoŭnika stała raspaŭsiudžvacca rasijskimi ŚMI ŭčora pozna ŭviečary. Sienatar ad Piermskaha kraja, namieśnik kiraŭnika kamiteta pa mižnarodnych spravach Savieta Fiederacyi Andrej Klimaŭ skazaŭ, što «DNR» i «ŁNR» pryznanyja ŭ tych miežach, u jakich jany ciapier de-fakta znachodziacca.
Užo siońnia zranku źjaviłasia novaja, supiarečnaja papiaredniaj zajava ad asoby pryblizna takoha ž uzroŭniu — staršyni dumskaha kamiteta pa spravach SND Leanida Kałašnikava. Jon skazaŭ užo pra toje, što Duma źbirajecca pryznavać «respubliki» ŭ miežach Danieckaj i Łuhanskaj abłaściej.
Nieŭzabavie asprečyła pieršaja namieśnica staršyni kamiteta pa mižnarodnych spravach Dziarždumy Śviatłana Žurava, a paśla i jon sam admoviŭsia ad svajoj papiaredniaj interpretacyi, praŭda, ź niaŭciamnaj farmuloŭkaj: «Heta pahadnieńnie ab supracoŭnictvie pamiž krainami ŭ tych miežach, u jakich jany siabie adčuvajuć, źviartajciesia da ich».
Miežy, u jakich siabie niechta «adčuvaje», paniaćcie nie nadta jurydyčnaje. Voś u «ŁNR» vice-śpikier miascovaha «parłamienta», naprykład, užo zapatrabavaŭ ad Ukrainy advieści vojski da miažy Łuhanskaj vobłaści: «Naša terytoryja — usia Łuhanskaja vobłaść, my zakličam Ukrainu dobraachvotna advieści vojski, inakš buduć pryniatyja miery». A ŭ «DNR» pra toje, što ŭ skład hetaha ŭtvareńnia musić uvachodzić usia Danieckaja vobłaść, skazaŭ sam jaje lidar Dzianis Pušylin. Ale, znoŭ ža, paśla jon zajaviŭ, što hetaje pytańnie budzie «rašacca paźniej».
Treba dumać, što takija ŭzajemnasupiarečnyja zajavy i interpretacyi buduć źjaŭlacca i paźniej, kali najbližejšym časam nie źjavicca dakumient, u jakim pytańnie miežaŭ budzie prapisana maksimalna kankretna. A jon moža i nie źjavicca, bo Pucinu vyhadnaja niapeŭnaść pa hetym pytańni.
Nievypadkova, što kali śledam za fihurami jaŭna druhasnaha značeńnia — kiraŭniki samich «respublik» siarod ich, bo jany ničoha ŭ takich spravach nie vyrašajuć, — na hetuju temu vykazalisia i na bolš vysokich uzroŭniach, to znoŭ uźnikła supiarečnaść.
Kali MZS Rasii zajaviła, što Maskva pryznaje «DNR» i «ŁNR» «u tych miežach, u ramkach jakich kiraŭnictva respublik ažyćciaŭlaje svaje paŭnamoctvy», to pres-sakratar Pucina Dźmitryj Piaskoŭ skazaŭ pra «tyja miežy, u jakich jany byli abvieščanyja i isnujuć».
Tuman napuskajecca jaŭna śviadoma. Vykazvańni asobnych palitykaŭ i čynoŭnikaŭ nikoha ni da čaho nie abaviazvajuć, mohuć być lohka dezavujavanyja jak «asabistaja dumka». Aficyjnyja zajavy farmulujucca tak, kab zachoŭvałasia mahčymaść ich roznaj interpretacyi.
Ale ŭ toj ža čas usio heta cudoŭna nadajecca dla taho, kab adsočvać reakcyju i hramadskaj dumki, i dumki mižnarodnaj supolnaści. I z ulikam hetaha prymać užo realnyja rašeńni.
Važnaść pytańnia zajaŭlenych miežaŭ «pryznanych respublik» nie čysta tearetyčnaja, ad adkazu na jaho zaležyć u tym liku toje, budzie vialikaja vajna najbližejšym časam ci nie.
Taktyčna Pucin ciapier u vyjhryšnym stanoviščy, bo maje roznyja varyjanty nastupnych dziejańniaŭ, siarod jakich, vidać, jość i časovaje spynieńnie eskałacyi dy advod vojskaŭ ad miažy z Ukrainaj biez straty tvaru. Zdabyču pad pachaj rasijski pravadyr pa-lubomu ŭžo paniasie, tamu adkaz na pytańnie, navošta było patrebna ŭsio heta nahniatańnie apošnich miesiacaŭ, u jaho, kali što, jość, i jaho ciažka asprečvać.
Kali Pucin abmiažujecca pryznańniem «DNR» i «ŁNR» i zaraz spynicca na ich miežach, jakija skłalisia de-fakta, to realnych vajennych dziejańniaŭ čakać u rehijonie ŭ najbližejšy čas naŭrad ci vypadaje.
Bo ŭ palityčnym sensie pryznańnie «respublik», viadoma, vielmi važnaja padzieja, ale ŭ realnaj rasstanoŭcy siłaŭ u rehijonie jana mianiaje nie tak šmat. Bo Pucin ŭ takim razie nie zajmaje novych terytoryj, jon faktyčna tolki lehalizuje svaju prysutnaść tam, dzie jana była i biez taho ŭsim vidavočnaja.
U novaj realnaści Rasii prosta nie treba budzie bolš chavacca, robiačy ŭ Danbasie vyhlad, što «nas tam niet», vajna robicca mienš hibrydnaj. Nieabmiežavana ž vykarystoŭvać hetuju terytoryju ŭ tym liku i jak vajenny płacdarm Pucin mieŭ usie mahčymaści i da taho, nichto jaho na joj nie moh kantralavać. I kali ciapier hetym usio i abmiažujecca, to Zachadu ciažej budzie znajści stymuł, kab nieadkładna karać Kreml z vykarystańniem usich svaich mahčymaściaŭ.
Bo tak, heta krok nadzvyčaj dziorzki, jon navat nie na miažy, ale jaŭna i za miažoj fołu. Ale ž sutnasna mianiajecca nie tak šmat, tolki što maski skinutyja.
To, moža, i nie varta zapuskać usie miechanizmy strymlivańnia, jakija rykašetam bjuć i pa nas samich? Jaŭna takija dumki buduć uźnikać u hałovach mnohich zachodnich palitykaŭ, asabliva tych, jakija i raniej nie asabliva chacieli svarycca z Pucinym i išli na heta tolki pa nieabchodnaści: nadta ŭžo nachabna jon siabie pavodziŭ.
Padobnaja situacyja, darečy, była i ŭ 2008 hodzie. Čamu Zachad dastatkova viała reahavaŭ na dziejańni Rasii ŭ 2008 hodzie ŭ Paŭdniovaj Asiecii i nie prymaŭ nijakich istotnych zachadaŭ suprać jaje ŭ jakaści reakcyi na pryznańnie dźviuch kaŭkazskich respublik? Upłyvali na heta, viadoma, roznyja faktary: i ahulnaje niežadańnie zachodnich palitykaŭ i hramadstvaŭ vajavać, i zaležnaść Jeŭropy ad ekanamičnych hiešeftaŭ z Rasijaj, i zakładzieny samimi zachodnimi palitykami za niekalki miesiacaŭ da taho precedent z pryznańniem Kosava. Ale siarod inšych matyvacyj jaŭna była taksama i takaja, što choć tyja respubliki farmalna i ličylisia častkaj Hruzii, ale de-fakta nijakaj hruzinskaj ułady ŭ ich užo šmat hadoŭ nie było. Zatoje byŭ ahramadny faktyčny ŭpłyŭ Rasii, i što z tymi respublikami ŭvohule rabić — nichto nie ŭjaŭlaŭ. Tamu peŭnaja lehalizacyja faktyčnaha stanu rečaŭ nie ŭsprymałasia, niahledziačy na aficyjnyja zajavy, jak niešta zusim nieprymalnaje. Chaj Pucin biare, usio adno heta daŭno ŭžo jahonaje faktyčna, aby tolki dalej nie išoŭ…
Pucin dalej pajšoŭ užo praz šeść hadoŭ, u 2014 hodzie. I znoŭ reakcyja na jahonyja dziejańni była choć i bolš žorstkaja, čym raniej, ale ciarpimaja.
A ŭčora Pucin zrabiŭ toje, što nichto ŭ śviecie bolš sabie nie dazvalaje, čarhovy raz. I ciapier jon sa źjedlivaj uchmyłkaj moža znoŭ hladzieć na zachodnich lidaraŭ: nu, i što vy mnie zrobicie?
Nievypadkova i sam Pucin, i ludzi ź jahonaha najbližejšaha atačeńnia adkrytym tekstam kažuć, što nie sumniajucca ŭ nakładańni sankcyj, ale da ich hatovyja. Značyć, upeŭnienyja, što ničoha sapraŭdy surjoznaha suprać ich nie ŭviaduć. Prynamsi, za pryznańnie «DNR» i «ŁNR» u faktyčna kantralavanych sieparatystami miežach.
I varta pryznać, što kali pucinskija apietyty ciapier abmiažujucca hetymi miežami, i za ich jon vychodzić nie stanie, to jość vialikaja vierahodnaść taho, što tak i budzie. Prymać sapraŭdy surjoznyja miery mienavita z-za hetych terytoryj moža akazacca nichto asabliva nie hatovy — ni Ukraina, ni jaje zachodnija sajuźniki. Choć by tamu, što jaŭna pačnucca dyskusii: a ličyć hety akt napadam na Ukrainu, za što abiacalisia aŭtamatyčnyja ciažkija sankcyi, ci nie? Ukraina ž usio adno hetyja terytoryi nie kantralavała…
Viadoma, niejkija novyja sankcyi buduć uviedzienyja. Ale kali jany akažucca znoŭ «adčepnymi» i nie buduć bić pa samych asnovach rasijskaj ekanomiki dy surjozna kranać škurnyja intaresy rasijskich elitaŭ, a da taho ž buduć zachoŭvacca šyrokija mahčymaści dla ich abychodu, to hety miechanizm asabliva pracavać nie budzie.
Tamu, pa łohicy, Pucinu na hetym etapie niavyhadna za faktyčna kantralavanyja sieparatystami miežy vychodzić, utrymańnie ŭ ich daje jamu mahčymaść lehalizavać čarhovyja terytaryjalnyja nabytki małoj kryvioj. Što dazvolić adnačasova i paciešyć asabistyja ambicyi, i, vierahodna, znoŭ pavialičyć unutrany palityčny rejtynh. Vychad ža za hetyja miežy aznačaje niepaźbiežnuju realnuju vajnu ź nieprahnazavanymi nastupstvami.
Ale i suśvietnaja historyja, i asabistaja bijahrafija Pucina śviedčać, što zvyčajnaja łohika ŭ takich vypadkach nie zaŭsiody pracuje. Jak praviła, zavajoŭniki i «źbiralniki ziemlaŭ», uvajšoŭšy ŭ smak, spynicca ŭžo nie asabliva zdolnyja.
Tamu kali Pucin i vyrašyć uziać paŭzu ciapier, to heta nie budzie praciahvacca nadta doŭha. Kali ŭčarašni akt nie budzie šmat kaštavać jamu i jahonamu atačeńniu, to nastupnaj eskałacyi treba budzie čakać užo nieŭzabavie. A kali reakcyja budzie zusim biazzubaja, to rašeńnie, što miežy «DNR» i «ŁNR» bolš šyrokija, možna pryniać i ŭvohule nieadkładna.
Tym bolš kali tumannyja farmuloŭki zachavajuć dla hetaha prastoru.
Čytajcie taksama:
Pradčuvańnie vajny i pieradziełu. Nie tolki z boku Rasii? — mierkavańnie
MZS Rasii zajaviła, što Rasija pryznaje DNR i ŁNR u miežach ich ułady. Ale kamientaryi supraćlehłyja
U Dumie zajavili ab mahčymym pryznańni «DNR» i «ŁNR» u miežach refierendumu 2014 hoda
Rasijski sienatar: Rasija pryznała «DNR» i «ŁNR» u faktyčnych miežach, a nie ŭ zajaŭlenych
Hałoŭnaje pytańnie zaraz — u jakich miežach Rasija pryznaje tak zvanyja «Danieckuju» i «Łuhanskuju narodnyja respubliki»
