Aleś Pietraškievič. Krynicy i kałamuć. Uspaminalny apovied. Minsk: Miedysont. - 2008. 415s., 300 as.
Aŭtaru histaryčnaj trahiedyi «Priłaskať i uničtožiť» pra stvareńnie BNR, dramaturhu i piśmieńniku, Alesiu Pietraškieviču jość što raspavieści.
Jak čałavieku, jaki chłapčukom stajaŭ pierad rasstrełam, kali niemcy, pomściačy za skinuty partyzanami ciahnik, chacieli rasstralać žycharoŭ najbližejšaj vioski. Jak śviedku epochi – rektar minskaha Instytutu kultury i zahadčyk adździełu kultury CK KPB jon jak nichto inšy dobra viedaje suploty mašeraŭskaj palityki ŭ dačynieńni da kultury i biełaruščyny. Jak navukoŭcu, adnamu z redaktaraŭ Biełaruskaj savieckaj encykłapiedyi, stvaralniku ŭnikalnaj, 140-tomnaj, knižnaj sieryi «Pamiać», jakaja zanatavała vajennuju chroniku va ŭsich rajonach Biełarusi.
Litaraturaznaŭca Arsień Lis ličyć Pietraškievičavy ŭspaminy adnoj z najlepšych knih, što źjaŭlalisia ŭ biełaruskaj miemuarystycy za apošnija hady. «Aleś Lavonavič nadta praŭdziva, realistyčna pieradaŭ atmaśfieru paślavajennaj i mašeraŭskaj Biełarusi. Padziei hramadskaha žyćcia padadzienyja vielmi krytyčna: čynoŭniki takija, jakija jany jość, kamsamolski ruch — biez prycharošvańniaŭ».
